જો તમારી પાસે સ્ટાર હેલ્થ ઇન્શ્યોરન્સની પોલિસી છે, તો આ સમાચાર તમારા માટે ખૂબ જ મહત્વપૂર્ણ છે. દેશભરની ૧૫,૦૦૦ થી વધુ હોસ્પિટલોનું પ્રતિનિધિત્વ કરતી એસોસિએશન ઓફ હેલ્થકેર પ્રોવાઇડર્સ-ઇન્ડિયા (AHPI) એ ગંભીર ચેતવણી આપી છે કે જો તેમની ચિંતાઓનું નિરાકરણ નહિ થાય તો ૨૨ સપ્ટેમ્બર, ૨૦૨૫ થી સ્ટાર હેલ્થના પોલિસીધારકો માટે કેશલેસ સારવાર બંધ કરી દેવામાં આવશે.
 
વિવાદનું મૂળ શું છે?
AHPI એ જણાવ્યું છે કે હોસ્પિટલો અને સ્ટાર હેલ્થ વચ્ચે ઘણા મુદ્દાઓ વણઉકેલાયેલા છે, જે દર્દીની સારવાર અને હોસ્પિટલોની નાણાકીય સ્થિરતા બંનેને અસર કરી રહ્યા છે. આ મુખ્ય ચિંતાઓમાં નીચેના મુદ્દાઓનો સમાવેશ થાય છે:

• ટેરિફમાં વધારો નહિ: આરોગ્ય સંભાળનો ખર્ચ સતત વધી રહ્યો છે, પરંતુ વીમા કંપની ટેરિફમાં સુધારો કરવા તૈયાર નથી.

• ટેરિફ ઘટાડવાનું દબાણ: હાલના ટેરિફને પણ ઘટાડવા માટે હોસ્પિટલો પર દબાણ કરવામાં આવી રહ્યું છે.

• દાવાઓમાં કાપ અને નામંજૂરી: વીમા કંપની મંજૂર થયેલા દાવાઓમાંથી પણ આડેધડ કપાત કરે છે અને અંતિમ મંજૂરી પછી પણ દાવાઓને અચાનક નામંજૂર કરી દે છે.

પોલિસીધારકો પર શું અસર થશે?
જો આ વિવાદ ઉકેલાશે નહીં અને કેશલેસ સેવાઓ સ્થગિત થશે, તો સ્ટાર હેલ્થના પોલિસીધારકોને કોઈપણ સારવાર માટે હોસ્પિટલના બિલોની સંપૂર્ણ રકમ પોતાની પાસેથી ચૂકવવી પડશે. ત્યારબાદ, દર્દીઓએ વીમા કંપની પાસેથી વળતર (reimbursement) મેળવવા માટે અરજી કરવી પડશે. આ પરિસ્થિતિ ખાસ કરીને કટોકટીના સમયે ભારે મુશ્કેલી ઊભી કરી શકે છે.

AHPI એ વીમા લોકપાલના વાર્ષિક અહેવાલનો પણ ઉલ્લેખ કર્યો છે, જેમાં સ્ટાર હેલ્થ સામે ૧૩,૩૦૦ થી વધુ ફરિયાદો નોંધાઈ હતી, જેમાંથી ૧૦,૦૦૦ થી વધુ ફરિયાદો દાવાઓને આંશિક અથવા સંપૂર્ણ રીતે નામંજૂર કરવા સંબંધિત હતી.

AHPI એ સ્ટાર હેલ્થ સાથે વાતચીત કરવા માટે ખુલ્લું હોવાનું જણાવ્યું છે અને દર્દીઓ તથા હોસ્પિટલોના હિતમાં સકારાત્મક સમાધાનની અપેક્ષા રાખી રહ્યું છે. પરંતુ જો આ મુદ્દાનું નિરાકરણ નહીં આવે તો ૨૨ સપ્ટેમ્બરથી પરિસ્થિતિ બદલાઈ શકે છે.