રાવલપિંડી: પાકિસ્તાનમાં રાજકીય તણાવ અને વિરોધ વચ્ચે એક શરમજનક ઘટના સામે આવી છે. ભૂતપૂર્વ વડાપ્રધાન અને પાકિસ્તાન તહરીક-એ-ઇન્સાફ (PTI)ના સ્થાપક ઈમરાન ખાનની બહેન અલીમા ખાનુમ પર આદિયાલા જેલ બહાર ઈંડું ફેંકીને હુમલો કરવામાં આવ્યો. આ ઘટના ત્યારે બની જ્યારે તે તોશાખાના કેસની સુનાવણી માટે જેલ પહોંચી હતી અને મીડિયાને સંબોધી રહી હતી.
આ હુમલાનો વીડિયો સોશિયલ મીડિયા પર વાયરલ થયો છે, જેમાં સ્પષ્ટપણે જોઈ શકાય છે કે એક ઈંડું અલીમાના ચહેરા પર વાગે છે અને પછી તેના કપડા પર પડે છે. આ ઘટનાથી આસપાસ હાજર સમર્થકો ગુસ્સે થઈ ગયા અને 'આ કોણ છે?' એવી બૂમો પાડવા લાગ્યા. પરંતુ અલીમાએ શાંતિ જાળવી અને પોતાના સમર્થકોને 'કોઈ બાત નહીં, જાને દો' કહીને શાંત પાડ્યા.
હુમલાખોરો PTI સમર્થક:
સ્થાનિક મીડિયાના અહેવાલો મુજબ, પોલીસે પુષ્ટિ કરી છે કે આ ઘટના પાછળ બે મહિલાઓ હતી, અને તેઓ બંને PTIની જ સમર્થક હતી. તેઓ ઓલ ગવર્મેન્ટ એમ્પ્લોઈઝ ગ્રાન્ડ એલાયન્સ અને પાકિસ્તાન ક્લાર્ક્સ એસોસિએશનના સભ્યો સાથે તેમની માંગણીઓ રજૂ કરવા રાવલપિંડી આવી હતી. પોલીસે જણાવ્યું કે આ મહિલાઓએ અલીમાને પ્રશ્નો પૂછ્યા હતા, પરંતુ તેણે જવાબ ન આપતા તેમણે ઈંડું ફેંક્યું.
સમર્થકોએ હુમલાખોરોને રોક્યા:
હુમલા બાદ બંને મહિલાઓએ કારમાં ભાગવાનો પ્રયાસ કર્યો, પરંતુ ત્યાં હાજર PTI કાર્યકરોએ તેમને ઘેરી લીધા. ગુસ્સે ભરાયેલા સમર્થકોએ પથ્થરમારો કર્યો અને તેમની કારનો કાચ પણ તોડી નાખ્યો. બાદમાં પોલીસ ઘટનાસ્થળે પહોંચી અને બંને મહિલા આરોપીઓને કસ્ટડીમાં લઈને આદિયાલા ચેકપોઇન્ટ પર લઈ ગઈ.
આ ઘટનાએ પાકિસ્તાનમાં રાજકીય વાતાવરણની કડવાશને ફરી એકવાર ઉજાગર કરી છે. અલીમા ખાન પોતાના ભાઈને મુક્ત કરાવવા માટે સક્રિયપણે ઝુંબેશ ચલાવી રહી છે. આ ઘટનાથી પાકિસ્તાની રાજકારણમાં ઈમરાન ખાનના સમર્થકો અને વિરોધીઓ વચ્ચેનો તણાવ વધુ સ્પષ્ટ બન્યો છે.