મુંબઈ :  મહારાષ્ટ્રના રાજકારણમાં એક વાયરલ વીડિયોએ હલચલ મચાવી દીધી છે. રાજ્યના ડેપ્યુટી સીએમ અજિત પવાર એક વીડિયોમાં એક મહિલા IPS અધિકારીને કથિત રીતે ગેરકાયદેસર માટી ખનન પર કાર્યવાહી રોકવા માટે દબાણ કરતા જોવા મળ્યા છે. આ વિવાદ વધતા, અજિત પવારે સોશિયલ મીડિયા પર ખુલાસો કરવો પડ્યો છે.

શું છે વીડિયોમાં?
વાયરલ થયેલા વીડિયોમાં અજિત પવાર કથિત રીતે એક NCP કાર્યકરના ફોન પરથી કરમાળાના નાયબ પોલીસ અધિક્ષક અંજના કૃષ્ણા સાથે વાત કરી રહ્યા છે. જ્યારે અધિકારી તેમને ઓળખી શકતા નથી, ત્યારે પવાર ગુસ્સામાં કહે છે, "હું ડેપ્યુટી મુખ્યમંત્રી અજિત પવાર છું. તમે મને ઓળખતા નથી? મને તમારો નંબર આપો, હું તમને વીડિયો કોલ કરીશ." આ દરમિયાન તેઓ કથિત રીતે અધિકારીને ગેરકાયદેસર માટી ખનન પર કાર્યવાહી રોકવા માટે કડક સૂચનાઓ આપે છે.

અજિત પવારનો ખુલાસો:
વિવાદ વધુ વધતા, અજિત પવારે આજે પોતાના X (પૂર્વમાં ટ્વીટર) હેન્ડલ પર સ્પષ્ટતા આપી. તેમણે લખ્યું, "મારો કાયદાકીય કાર્યવાહીમાં દખલ કરવાનો કોઈ ઇરાદો નથી, પરંતુ જમીની સ્તરે પરિસ્થિતિ શાંત રહે અને વધુ બગડે નહીં તેની ખાતરી કરવાનો હતો." તેમણે વધુમાં કહ્યું કે તેઓ પોલીસ દળ અને મહિલા અધિકારીઓનું ખૂબ સન્માન કરે છે. તેમણે વચન આપ્યું કે "રેતી ખનન સહિતની દરેક ગેરકાયદેસર પ્રવૃત્તિ સામે કાયદા અનુસાર કડક કાર્યવાહી કરવામાં આવશે."

જોકે, આ સ્પષ્ટતા પછી પણ વિપક્ષી દળો આ મામલાને જોરશોરથી ઉઠાવી રહ્યા છે અને આ ઘટનાથી મહારાષ્ટ્રના રાજકારણમાં નવો વિવાદ શરૂ થયો છે.