નવી દિલ્‍હીઃ ચીનના તિયાનજિનમાં આજથી શરૂ થઈ રહેલા બે દિવસીય SCO સંમેલન પર દુનિયાભરની નજર ટકેલી છે. વડાપ્રધાન નરેન્દ્ર મોદી, ચીનના રાષ્ટ્રપતિ શી જિનપિંગ અને રશિયાના રાષ્ટ્રપતિ વ્લાદિમીર પુતિન SCO મંચ પર સાથે રહેશે. અમેરિકાના રાષ્ટ્રપતિ ડોનાલ્ડ ટ્રમ્પની ટેરિફ નીતિઓને કારણે ભારત-અમેરિકાના સંબંધોમાં અચાનક થયેલા બગાડને ધ્યાનમાં રાખીને વડાપ્રધાન મોદીની ચીન મુલાકાત વધુ મહત્વપૂર્ણ બની ગઈ છે.
વડાપ્રધાન મોદી મુખ્યત્વે 31 ઓગસ્ટ અને 1 સપ્ટેમ્બરના રોજ શાંઘાઈ સહયોગ સંગઠન (SCO) ના વાર્ષિક શિખર સંમેલનમાં ભાગ લેવા માટે ચીન આવ્યા છે. સાત વર્ષથી વધુ સમયના અંતરાલ પછી શનિવારે વડાપ્રધાન નરેન્દ્ર મોદી ચીન પહોંચ્યા હતા. પ્રધાનમંત્રી મોદી છેલ્લે જૂન 2018 માં SCO સમિટમાં હાજરી આપવા માટે ચીન ગયા હતા.
આ પછી, ચીનના રાષ્ટ્રપતિ જિનપિંગ ઓક્ટોબર 2019 માં બીજી "અનૌપચારિક શિખર સંમેલન" માટે ભારત આવ્યા હતા. પરંતુ જૂન 2020 માં ગલવાન ઘાટીમાં ભારતીય અને ચીની સૈનિકો વચ્ચે થયેલી અથડામણ બાદ, બંને દેશો વચ્ચેના સંબંધોમાં તણાવ હતો. બંને દેશો દ્વારા આ તણાવને દૂર કરવાના પ્રયાસો કરવામાં આવી રહ્યા હતા. આ સંદર્ભમાં, ચીનના વિદેશ પ્રધાન વાંગ યીએ તાજેતરમાં ભારતની મુલાકાત લીધી હતી.