ચાંદીના હોલમાર્કિંગથી લઈને ઓટો-પેમેન્ટ સુધી...૧ સપ્ટે.થી ઘણા મહત્વપૂર્ણ ફેરફારો થશે
૧ સપ્ટેમ્બર, ૨૦૨૫ થી કેટલાક ખાસ ફેરફારો થવા જઈ રહ્યા છે, જેની સીધી અસર સામાન્ય લોકોના ખિસ્સા પર પડશે ચાંદીનું ફરજિયાત હોલમાર્કિંગ, SBI કાર્ડના ચાર્જમાં ફેરફાર, પોસ્ટલ વિભાગની રજિસ્ટ્રી સેવાનું સ્પીડ પોસ્ટ સાથે મર્જરનો સમાવેશ થાય છે
નવી દિલ્હી, તા.૨૮: દર મહિનાની પહેલી તારીખ કેટલાક ખાસ ફેરફારો લાવે છે. ૧ સપ્ટેમ્બર, ૨૦૨૫ થી કેટલાક ખાસ ફેરફારો થવા જઈ રહ્યા છે, જેની સીધી અસર સામાન્ય લોકોના ખિસ્સા પર પડશે. આમાં ચાંદીનું ફરજિયાત હોલર્માકિંગ, SBI કાર્ડના ચાર્જમાં ફેરફાર, પોસ્ટલ વિભાગની રજિસ્ટ્રી સેવાનું સ્પીડ પોસ્ટ સાથે મર્જરનો સમાવેશ થાય છે.
૧ સપ્ટેમ્બરથી લાખો ભારતીયોને ચુકવણીમાં મુશ્કેલીનો સામનો કરવો પડી શકે છે. વીમા પ્રીમિયમ, નેટફિ્લક્સ / એમેઝોન પ્રાઇમ જેવા સબ્સ્ક્રિપ્શન અને ઓટો-પેમેન્ટ સેવાઓ અચાનક બંધ થઈ શકે છે. કારણ એ છે કે Paytm નું જૂનું UPI હેન્ડલ @paytm સંપૂર્ણપણે બંધ થઈ રહ્યું છે. આ સમાચાર લાખો ગ્રાહકો માટે મહત્વપૂર્ણ છે જેઓ હજુ પણ જૂના @paytm હેન્ડલ સાથે જોડાયેલા ઓટો-પેમેન્ટ પર આધાર રાખે છે. સમયસર પગલાં લેવાથી મુશ્કેલી ટાળી શકાય છે.
ચાંદી પર પણ શુદ્ધતાની ખાતરી આપવામાં આવશે : કેન્દ્ર સરકારે ૧ સપ્ટેમ્બરથી ચાંદીના ઝવેરાત અને સિક્કા પર હોલર્માકિંગ ફરજિયાત કરવાનો નિર્ણય લીધો છે. પહેલા ફક્ત સોના પર હોલર્માકિંગ જરૂરી હતું, પરંતુ હવે ચાંદીની શુદ્ધતાની પણ ખાતરી આપવી પડશે. આનાથી ગ્રાહકોને શુદ્ધ ઉત્પાદનો મળશે, પરંતુ ઝવેરાત ઉત્પાદકો કહે છે કે આનાથી ચાંદીના ભાવ વધી શકે છે. નોંધનીય છે કે સોનાના ભાવમાં વધારાને કારણે ઘણા રોકાણકારો અને ખરીદદારોએ ચાંદીમાં રોકાણ કરવાનું શરૂ કર્યું છે.
SBI કાર્ડના નિયમો બદલાશે
SBI એ તેના ક્રેડિટ કાર્ડ માટે કેટલાક નવા નિયમો લાગુ કરવાનો નિર્ણય લીધો છે. આ મુજબ, જો તમારું ઓટો-ડેબિટ નિષ્ફળ જાય છે, તો ૨% દંડ લાદવામાં આવશે. આ ઉપરાંત, આંતરરાષ્ટ્રીય વ્યવહારો, ઇંધણ ખર્ચ અને ઓનલાઈન શોપિંગ પર પણ ચાર્જ વધી શકે છે. ઉપરાંત, રિવોર્ડ પોઈન્ટનું મૂલ્ય ઘટાડી શકાય છે. આ ઉપરાંત, કાર્ડ સુરક્ષા યોજનામાં પણ ફેરફારો કરવામાં આવશે. ૧૬ સપ્ટેમ્બર, ૨૦૨૫ થી, બધા કાર્ડ પ્રોટેક્શન પ્લાન ધારકો આપમેળે અપડેટેડ પ્લાન વેરિઅન્ટમાં શિફ્ટ થઈ જશે.
GST સુધારા અંગે નિર્ણય
GST કાઉન્સિલની ૫૬મી બેઠક ૩ અને ૪ સપ્ટેમ્બર, ૨૦૨૫ ના રોજ યોજાશે. આ બેઠકમાં ઘણા મહત્વપૂર્ણ નિર્ણયો લેવામાં આવી શકે છે. આ બેઠકમાં કર ઘટાડા અંગે પણ નિર્ણય લેવામાં આવી શકે છે. હવે GST હેઠળ, ચાર ટેક્સ સ્લેબને બદલે બે ટેક્સ સ્લેબ (૫% અને ૧૨%) હશે.
FD વ્યાજ દરમાં ઘટાડો
થઈ શકે છે
ઘણી બેંકો સપ્ટેમ્બરમાં તેમના ફિક્સ ડિપોઝિટ વ્યાજ દરોની સમીક્ષા કરી શકે છે. હાલમાં આ દર ૬.૫% થી ૭.૫% ની વચ્ચે છે, પરંતુ આ દરોમાં ઘટાડો થવાની સંભાવના છે. જો તમે FD માં રોકાણ કરવા જઈ રહ્યા છો, તો તે જલ્દી કરવું વધુ સારું રહેશે, જેથી તમે ઊંચા વ્યાજ દરનો લાભ લઈ શકો.
રજિસ્ટ્રી હવે સ્પીડ પોસ્ટ સાથે મર્જ કરવામાં આવશે
પોસ્ટલ વિભાગે રજિસ્ટર્ડ પોસ્ટને સ્પીડ પોસ્ટ સેવા સાથે મર્જ કરવાની જાહેરાત કરી છે. આ નવો નિયમ ૧ સપ્ટેમ્બર, ૨૦૨૫ થી અમલમાં આવી રહ્યો છે. આનો અર્થ એ છે કે જો તમે કોઈપણ રજિસ્ટર્ડ પોસ્ટ મોકલવા માંગતા હો, તો તે હવે સીધા સ્પીડ પોસ્ટ દ્વારા મોકલવામાં આવશે.
(11:37 AM IST)
છેલ્લા 8 દિવસમાં સૌથી લોકપ્રિય 
