નવી દિલ્હી : ભારતનો 79મો સ્વાતંત્ર્ય દિવસ નજીક છે. 15 ઑગસ્ટના રોજ દેશભરમાં ત્રિરંગો લહેરાવીને આઝાદીનો જશ્ન મનાવવામાં આવે છે. પરંતુ શું તમે જાણો છો કે રાષ્ટ્રધ્વજને ફરકાવવા અને તેના સન્માન માટે કેટલાક કડક નિયમો બનાવવામાં આવ્યા છે? આ નિયમોને 'ધ્વજ સંહિતા, 2002' તરીકે ઓળખવામાં આવે છે. આ નિયમોનું પાલન ન કરવા પર 3 વર્ષ સુધીની જેલ અથવા દંડ અથવા બંને સજા થઈ શકે છે.
 
ધ્વજ ફરકાવવાના મુખ્ય નિયમો:

ધ્વજની સ્થિતિ: ફરકાવવામાં આવતો ત્રિરંગો હંમેશા સ્વચ્છ અને ફાટેલો ન હોવો જોઈએ.

સન્માન જાળવો: રાષ્ટ્રધ્વજ ક્યારેય જમીનને સ્પર્શ ન કરવો જોઈએ.

અશોક ચક્ર: ધ્વજની બરાબર મધ્યમાં સફેદ પટ્ટી પર 24 આરા (સ્પોક્સ) વાળું અશોક ચક્ર હોવું જોઈએ.

ધ્વજનું માપ અને રંગ: ત્રિરંગાની લંબાઈ અને પહોળાઈનો ગુણોત્તર 3:2 હોવો જોઈએ. સૌથી ઉપર કેસરી, વચ્ચે સફેદ અને નીચે લીલો રંગ હોવો ફરજિયાત છે.

સમય મર્યાદા: રાષ્ટ્રધ્વજ સામાન્ય રીતે સૂર્યોદય સમયે અથવા સવારે 9 વાગ્યાની આસપાસ ફરકાવવામાં આવે છે.

નિયમોનું ઉલ્લંઘન: ધ્વજ પર કોઈપણ પ્રકારનું ચિત્ર, પ્રતીક, શબ્દ કે ફૂલ લગાવવું એ નિયમોનું ઉલ્લંઘન ગણાય છે.

રાષ્ટ્રગીત: ધ્વજ ફરકાવતી વખતે રાષ્ટ્રગીત ગાવામાં આવે છે. તે સમયે હાજર દરેક વ્યક્તિએ સીધા ઉભા રહીને ધ્વજનું સન્માન કરવું જોઈએ. રાષ્ટ્રગીત 52 સેકન્ડમાં પૂર્ણ થવું જોઈએ.

ફોલ્ડ કરવાની રીત: ધ્વજને ઉતાર્યા બાદ ફોલ્ડ કરતી વખતે, કેસરી અને લીલી પટ્ટીને સફેદ પટ્ટીની નીચે ફોલ્ડ કરવી જોઈએ.
 
આ નિયમોનું પાલન કરીને આપણે આપણા રાષ્ટ્રધ્વજના ગૌરવ અને સન્માનને જાળવી રાખી શકીએ છીએ.