13 ઓગસ્ટ, 2025: બ્રિટનમાં ફિલિપાઈન્સના રાજદૂત અને પૂર્વ વિદેશ મંત્રી ટીઓડોરો લોક્સિન જુનિયરએ ભારતીય નૌકાદળના ભરપેટ વખાણ કર્યા છે. તેમણે તાજેતરમાં ભારત અને ફિલિપાઈન્સની સંયુક્ત નૌકાદળ કવાયત પછી પશ્ચિમી દેશોના નૌકાદળો પર આકરા પ્રહારો કરતા કહ્યું કે, "આપણી પાસે કોઈ લશ્કરી સાથી નથી - બિલકુલ શૂન્ય. ફક્ત ભારતીય નૌકાદળ પાસે જ હિંમત છે, કારણ કે તેઓ જ્યાં ઇચ્છે ત્યાં જાય છે."
 
ભારત અને ફિલિપાઈન્સ વચ્ચેની આ સંયુક્ત કવાયત દક્ષિણ ચીન સાગર નજીક, ફિલિપાઈન્સના એક્સક્લુઝિવ ઇકોનોમિક ઝોન (EEZ)માં યોજાઈ હતી. આ વિસ્તાર પર ચીન પણ પોતાનો દાવો કરે છે, તેથી આ કવાયતનું વિશેષ મહત્વ છે. ભારતીય નૌકાદળના જહાજો INS દિલ્હી, INS શક્તિ, અને INS કિલ્ટનએ 3 અને 4 ઓગસ્ટના રોજ આ ઐતિહાસિક કવાયતમાં ભાગ લીધો હતો, જેમાં વ્યૂહાત્મક સંકલન, એર ડિફેન્સ અને એન્ટિ-સબમરીન વોરફેર જેવી કામગીરીઓનો સમાવેશ થતો હતો.
 
લોક્સિનનું આ નિવેદન એવા સમયે આવ્યું છે જ્યારે ચીની જહાજોએ દક્ષિણ ચીન સાગરમાં ફિલિપાઈન્સના કોસ્ટ ગાર્ડ જહાજને હેરાન કરવાનો પ્રયાસ કર્યો હતો, જેના પરિણામે ચીની જહાજો એકબીજા સાથે અથડાયા હતા. આ ઘટના બાદ લોક્સિને પશ્ચિમી દેશો પર કટાક્ષ કરતા કહ્યું કે, "પશ્ચિમી નૌકાદળો હિંમત વિનાના 'કાસ્ટ્રાટી' (ઉચ્ચ અવાજમાં ગાતા ગાયકો)ની જેમ ગાય છે." તેમણે પશ્ચિમી દેશોના ઐતિહાસિક આચરણનો ઉલ્લેખ કરતા કહ્યું કે, ફિલિપાઈન્સને કોઈ લશ્કરી સાથી મળ્યો નથી.

આ કવાયત ચીન માટે ચિંતાનો વિષય બની છે અને તેના બે યુદ્ધ જહાજોએ તેનું નિરીક્ષણ પણ કર્યું હતું. જોકે, ફિલિપાઈન્સના ચીફ ઓફ સ્ટાફ જનરલ રોમિયો બ્રાઉનરએ આ કવાયતની સફળતા પર સંતોષ વ્યક્ત કર્યો અને ભવિષ્યમાં ભારતીય સૈન્ય સાથે વધુ સંયુક્ત કવાયત કરવાની આશા વ્યક્ત કરી. ભારતીય નૌકાદળની આ સ્વતંત્ર અને નિર્ભય ભૂમિકા વૈશ્વિક દરિયાઈ સુરક્ષામાં ભારતનું વધતું મહત્વ દર્શાવે છે.