મુંબઈ :એન્ફોર્સમેન્ટ ડિરેક્ટોરેટ (ED) દ્વારા પૂછપરછ પૂર્ણ થયા બાદ 27 જુલાઈના રોજ રિલાયન્સ પાવર અને રિલાયન્સ ઇન્ફ્રાસ્ટ્રક્ચર નિવેદનો જારી કર્યા છે.

બંને કંપનીઓએ તેમના નિવેદનોમાં જણાવ્યું હતું કે રિલાયન્સ પાવર લિમિટેડ અને રિલાયન્સ ઇન્ફ્રાસ્ટ્રક્ચર લિમિટેડ સંબંધિત તમામ સ્થળોએ EDની કાર્યવાહી પૂર્ણ થઈ ગઈ છે. બંને કંપનીઓ અને તેમના અધિકારીઓએ ED અધિકારીઓને સંપૂર્ણ સહકાર આપ્યો છે અને ભવિષ્યમાં પણ આપતા રહેશે.

ચાલુ તપાસ રિલાયન્સ કોમ્યુનિકેશન્સ લિમિટેડ (આરકોમ) અને રિલાયન્સ હોમ ફાઇનાન્સ લિમિટેડ (આરએચએફએલ)ને સંડોવતા એક દાયકા કરતાં વધુ જૂના વ્યવહારો સાથે સંબંધિત છે. મહત્વપૂર્ણ વાત એ છે કે રિલાયન્સ પાવર અને રિલાયન્સ ઇન્ફ્રાસ્ટ્રક્ચર બંને અલગ અને સ્વતંત્ર રીતે લિસ્ટેડ કંપનીઓ છે જેનો RCom અથવા RHFL સાથે કોઈ વ્યવસાયિક કે નાણાકીય સંબંધ નથી, તેમ નિવેદનમાં જણાવાયું છે.

નિવેદનોમાં જણાવાયું છે કે Rcom છ વર્ષથી વધુ સમયથી ઇન્સોલ્વન્સી અને બેન્કરપ્સી કોડ, 2016 હેઠળ કોર્પોરેટ ઇન્સોલ્વન્સી રિઝોલ્યુશન પ્રક્રિયામાંથી પસાર થઈ રહી છે. બીજી તરફ સુપ્રીમ કોર્ટના એક નિર્ણય મુજબ RHFLના તમામ કેસોનો સંપૂર્ણ નિકાલ કરવામાં આવ્યો છે.

નિવેદનો પ્રમાણે તેમની સામે લગાવવામાં આવેલા કેટલાક આરોપો સિક્યોરિટીઝ એપેલેટ ટ્રિબ્યુનલમાં પેન્ડિંગ છે.

આ કંપનીઓએ કહ્યું છે કે અનિલ અંબાણી રિલાયન્સ પાવર કે રિલાયન્સ ઇન્ફ્રાસ્ટ્રક્ચરના બોર્ડમાં નથી. તેથી RCom અથવા RHFLના સંબંધમાં લેવામાં આવેલી કોઈપણ કાર્યવાહીને આ બે કંપનીઓના શાસન, સંચાલન અથવા રોજિંદા કામગીરી સાથે કોઈ લેવાદેવા નથી.

ગયા અઠવાડિયે EDની કાર્યવાહીને કારણે રિલાયન્સ પાવર અને રિલાયન્સ ઇન્ફ્રાના શેરને ભારે નુકસાન થયું હતું. ગુરુવાર અને શુક્રવારે RPowerના શેરોમાં 5 ટકાનો નીચો સર્કિટ માર્યો હતો અને આખા અઠવાડિયા દરમિયાન લગભગ 12 ટકાનો ઘટાડો થયો હતો.

આરઇન્ફ્રામાં પણ બે દિવસ માટે નીચલી સર્કિટ જોવા મળી હતી અને ગયા અઠવાડિયે 11.36 ટકાનો ઘટાડો થયો હતો.