નવી દિલ્‍હી, તા.૨૨: દિલ્‍હીના મુખ્‍ય ચૂંટણી અધિકારીએ ૨૭ નોંધાયેલા રાજકીય પક્ષો સામે કડક વલણ અપનાવ્‍યું છે. છેલ્લા છ વર્ષમાં કોઈ પણ ચૂંટણી ન લડવા બદલ આ પક્ષોને કારણદર્શક નોટિસ જારી કરવામાં આવી છે. ચૂંટણી પંચે કહ્યું કે આ જનપ્રતિનિધિત્‍વ અધિનિયમનું ઉલ્લંઘન છે. વધુમાં, આ પક્ષોને ચૂંટણી પંચની યાદીમાંથી દૂર કરી શકાય છે.

અધિકારીઓએ જણાવ્‍યું હતું કે આ પક્ષોના પ્રમુખો અને મહાસચિવોને લેખિતમાં જવાબ આપવા અને મુખ્‍ય ચૂંટણી અધિકારી સમક્ષ હાજર થવા માટે સમય આપવામાં આવ્‍યો હતો, પરંતુ માત્ર ચાર પક્ષોએ જ જવાબ આપ્‍યો. મુખ્‍ય ચૂંટણી અધિકારી આર. એલિસ વાઝે જણાવ્‍યું હતું કે તેઓ ૨૭ જુલાઈ સુધીમાં ચૂંટણી પંચને રિપોર્ટ મોકલશે.

૨૦૧૯ થી ૨૭ પક્ષોએ કોઈ ચૂંટણી લડી નથીઃ અધિકારીના જણાવ્‍યા મુજબ, રાજકીય પક્ષો જનપ્રતિનિધિત્‍વ અધિનિયમ, ૧૯૫૧ ની કલમ ૨૯ હેઠળ ચૂંટણી પંચમાં નોંધાયેલા છે. નોંધણી પછી તે ચૂંટણીમાં ભાગ લઈ શકે છે. આ પક્ષોને ખાસ પ્રકારની છૂટછાટો પણ આપવામાં આવે છે. જેમાં કરમુક્‍તિ, ચૂંટણી પ્રતીક અને સ્‍ટાર પ્રચારક જેવી સુવિધાઓ ઉપલબ્‍ધ છે. પરંતુ દિલ્‍હીમાં ૨૭ પક્ષોએ ૨૦૧૯ થી કોઈ ચૂંટણી લડી નથી.

નોટિસમાં કહેવામાં આવ્‍યું છે કે, છેલ્લા છ વર્ષથી ચૂંટણી ન લડવાથી સ્‍પષ્ટ થાય છે કે પાર્ટીએ કલમ ૨૯A હેઠળ રાજકીય પક્ષ તરીકે કામ કરવાનું બંધ કરી દીધું છે. તેથી, કમિશન ભારતના બંધારણની કલમ ૩૨૪ અને જનપ્રતિનિધિત્‍વ અધિનિયમ, ૧૯૫૧ ની કલમ ૨૯A હેઠળ આ રાજકીય પક્ષોને સૂચિમાંથી દૂર કરવાનો પ્રસ્‍તાવ મૂકે છે.ચૂંટણી પંચ દ્વારા જે પક્ષોને નોટિસ મોકલવામાં આવી છે તે તમામ પક્ષો હંમેશા લોકસભા, વિધાનસભા અને મ્‍યુનિસિપલ ચૂંટણીઓમાં જોવા મળે છે પરંતુ તેમને વધારે મત મળતા નથી. ૨૦૨૫ની વિધાનસભા ચૂંટણીમાં ભાજપ અને તેના સાથી પક્ષોને ૪૭.૨ ટકા, આપને ૪૩.૬ ટકા અને કોંગ્રેસને ૬.૩ ટકા મત મળ્‍યા હતા. બાકીના રાષ્‍ટ્રીય પક્ષો, માન્‍યતા પ્રાપ્ત ન હોય તેવા પક્ષો અને સ્‍વતંત્ર ઉમેદવારોને મળીને માત્ર ૨.૪ ટકા મત મળ્‍યા.

જે પક્ષોને નોટિસ મોકલવામાં આવી છે તેમાં ભારતીય રોજગાર પાર્ટી, જન આંદોલન મોરચા, માનવ જાગળતિ મંચ, નવયુગ પાર્ટી, ઓજસ્‍વી પાર્ટી, રાષ્‍ટ્રીય જન કલ્‍યાણ પાર્ટી, જનતા સરકાર પાર્ટી, અખિલ ભારતીય મહિલા યુનાઇટેડ પાર્ટી અને આઝાદ ભારત કોંગ્રેસનો સમાવેશ થાય છે. ચૂંટણી અધિકારીએ પક્ષોને જવાબ આપવા માટે ૧૮ જુલાઈ સુધીનો સમય આપ્‍યો હતો.