મિડલ ક્લાસ લોકો કઈ રીતે ચૂપચાપ સંપત્તિ વધારી રહ્યા છે?
બેંગલુરુના સ્ટાર્ટઅપ ફાઉન્ડર શ્યામ અચ્યુતને ભારતના મિડલ ક્લાસને લઈને આંખ ઉઘાડતી વાત કરી : દેશનો મિડલ ક્લાસ હાલમાં બે ભાગમાં વહેંચાઈ ગયો છે : એક વર્ગ અમીર હોવાનો દેખાડો કરી રહ્યો છે અને બીજો ધીરે-ધીરે અમીર બનવા તરફ આગળ
બેંગલુરુ, તા.૪: એક સમયે ઈન્ડિયન સોસાયટીની કરુડરજ્જૂ મનાતો મિડલ ક્લાસ માટે હાલનો સમય ઘણો જ કપરો છે. મધ્યમ વર્ગ માટે પહેલા સ્થિર નોકરી, દ્વિચક્રી વાહન પરથી કાર સુધીની સફર, વર્ષમાં એક વખત ફરવા જવું અને ઘર લેવું જ સૌથી મોટું સપનું હતું, પરંતુ હવે સ્થિતિ ઝડપથી બદલાઈ રહી છે.
ઘણા લોકો મોંઘા ફોન, મોંઘી કાર અને મોંઘા રેસ્ટોરાંમાં ખાવા જવામાં પોતાની કમાણી ખર્ચ કરી રહ્યા છે. આ બધા શોખ પૂરા કરવામાં મધ્યમવર્ગ લોનના બોજ હેઠળ દબાઈ રહ્યો છે. બહારથી બધા અમીર દેખાય છે, પરંતુ હકીકતમાં ખિસ્સાં ખાલી હોય છે.
લિંક્ડઈન પર વાયરલ એક પોસ્ટમાં બેંગલુરુના સ્ટાર્ટઅપ ફાઉન્ડર શ્યામ અચ્યુતને જણાવ્યું હતું કે, આજના સમયમાં લોકો દેખાડો કરવા માટે ભવિષ્યની કમાણી ખર્ચ કરી રહ્યા છે. મોંઘા ગેઝેટ, રજાઓમાં પૈસા ઉડાડવા, આ બધું માત્ર ઈન્સ્ટાગ્રામ પર સારું દેખાવા માટે થઈ રહ્યું છે. તેમણે જણાવ્યું હતું કે, ૫૦,૦૦૦ની સેલેરીમાંથી ૨૦,૦૦૦ રૂપિયા રેન્ટમાં, ૧૦,૦૦૦ રૂપિયા જુદા-જુદા ચ્પ્ત્ ભરવામાં અને વીકેન્ડના ખર્ચામાં ૫,૦૦૦ રૂપિયા જતા રહે છે. સારી એવી બચત કરવા માટે પાછળ કંઈ વધતું નથી. અમીર હોવાનું બતાવવા માટેનું આ ચક્ર જ્યારે તૂટે છે ત્યારે વ્યક્તિ દેવામાં ડૂબી જાય છે.
પરંતુ કેટલાક લોકો એવા પણ છે કે જે સમજદારી બતાવી રહ્યા છે. આ લોકો ફાલતૂ ખર્ચ કરવાથી બચી રહ્યા છે. જૂની કારથી જ કામ ચલાવી રહ્યા છે, સસ્તો ફોન ઉપયોગ કરી રહ્યા છે અને સેવિંગ કરી મ્યૂચુઅલ ફંડ્સ, શેર માર્કેટ, પ્રોપર્ટીમાં રોકાણ કરી રહ્યા છે.
શ્યામનું કહેવું હતું કે, આ લોકો ભલે અત્યારે અમીર દેખાતા ના હોય, પરંતુ ધીરે-ધીરે તેમના પૈસા વધી રહ્યા છે અને અત્યારે જેમની મજાક ઉડાવાઈ રહી છે એ લોકો જ ૧૦ વર્ષ પછી અસલી અમીર હશે.
હાલના સમયમાં મોંઘવારી, નોકરી જવાનો ડર અને ટેકનોલોજીના કારણે કામ કરવાની પદ્ધતિ બદલાઈ રહી છે. એવામાં દેખાડો કરવામાં રૂપિયા વેડફવાને બદલે યોગ્ય જગ્યાએ રોકાણ કરવું જ ભવિષ્યને સુરક્ષિત કરવાની રીત છે.
શ્યામના જણાવ્યા મુજબ, આજે મિડલ ક્લાસ બે ભાગમાં વહેંચાઈ રહ્યો છે. એક ભાગ ઉપર ઉઠી રહ્યો છે, કેમકે તે સમજદારીથી ખર્ચ કરી રહ્યો છે અને ઈન્વેસ્ટમેન્ટ કરી રહ્યો છે. બીજો ભાગ માત્ર અમીર હોવાનો ઢોંગ કરી રહ્યો છે અને દેવામાં ડૂબતો જઈ રહ્યો છે.
તેમણે કહ્યું હતું કે, જો તમે અમીર હોવાનો દેખાડો કરવા માટે પૈસા ઉડાવી રહ્યા છો, તો થોડા વર્ષો પછી મુશ્કેલીમાં મૂકાઈ જશો. પરંતુ, જો થોડા દિવસો સાધારણ વ્યક્તિ બનીને રહેશો અને બચત કરશો તો ભવિષ્યમાં અસલી અમીર તમે જ બનશો.
તેમણે સલાહ આપી હતી કે, લાઈફસ્ટાઈલ પાછળ થતા ખર્ચા ઓછા કરો, એક-એક રૂપિયાનો હિસાબ રાખો, આવકના ૨૦થી ૩૦ ટકા બચત કરો અને જવાબદારીઓ નહીં પણ સંપત્તિ ઊભી કરવા પર ફોકસ કરો. તેમનું કહેવું હતું કે, આ બધા ઉપરાંત ખાલી રૂપિયા કમાવવા પૂરતું નથી તેનું મેનેજમેન્ટ કેવી રીતે કરવું તે શીખવું પણ જરૂરી છે. કેમકે, આજે તમે જે રસ્તો પસંદ કરશો તે જ તમારું ભવિષ્ય નક્કી કરશે
(3:33 PM IST)
છેલ્લા 8 દિવસમાં સૌથી લોકપ્રિય 
