નવી દિલ્હી તા.૧ :હવે રાજધાની દિલ્હીમાં નામ બદલવાની પ્રક્રિયા શરૂ થઈ ગઈ છે. મુખ્યમંત્રી રેખા ગુપ્તાએ રેલ્વે મંત્રી અશ્વિની વૈષ્ણવને જૂની દિલ્હી રેલ્વે સ્ટેશનનું નામ બદલવાની ભલામણ કરી છે. દિલ્હીનું આ પહેલું સ્ટેશન છે, મુખ્યમંત્રી રેખાએ રેલ્વે મંત્રીને તેનું નામ મહારાજા અગ્રસેન રેલ્વે સ્ટેશન રાખવાનો પ્રસ્તાવ મોકલ્યો છે. પોતાના પત્રમાં તેમણે નામ બદલવાને મહારાજા અગ્રસેનને શ્રદ્ધાંજલિ ગણાવી છે.

CM રેખા ગુપ્તાએ લખ્યો પત્ર

CM રેખા ગુપ્તાએ પત્રમાં લખ્યું છે કે, 'હું તમને વિનંતી કરી રહી છું કે મહારાજા અગ્રસેનના માનમાં જૂની દિલ્હી રેલ્વે સ્ટેશનનું નામ બદલવાનું વિચાર કરો, જે એક ઐતિહાસિક વ્યક્તિત્વ હતા જેમના વારસાએ ભારતના અને ખાસ કરીને દિલ્હીના સામાજિક-આર્થિક વિકાસ પર ઊંડી અસર કરી છે.'

મહારાજા અગ્રસેન રેલ્વે સ્ટેશન 

તેમણે આગળ લખ્યું કે સ્ટેશનનું નામ બદલીને મહારાજા અગ્રસેન રેલ્વે સ્ટેશન કરવું એ તેમના યોગદાનને સાચી શ્રદ્ધાંજલિ હશે અને તે દિલ્હીના લાખો રહેવાસીઓની લાગણીઓ સાથે ઊંડે સુધી જોડાયેલું હશે, જેઓ તેમનો ખૂબ આદર કરે છે. તેમણે કહ્યું કે અગ્રસેન રેલ્વે સ્ટેશનનું નામકરણ તેમના કાયમી યોગદાનને યોગ્ય શ્રદ્ધાંજલિ હશે. મહારાજા અગ્રસેનને સામાજિક ન્યાય, આર્થિક દૂરંદેશી અને સમુદાય કલ્યાણનું પ્રતીક માનવામાં આવે છે. તેમના અનુયાયીઓ અને વંશજો હજુ પણ દિલ્હીની આર્થિક અને સાંસ્કૃતિક પ્રગતિમાં મહત્વપૂર્ણ ભૂમિકા ભજવે છે.

શું સૌથી જૂના રેલ્વે સ્ટેશનનું નામ બદલાશે?

દિલ્હીમાં ઘણા રેલ્વે સ્ટેશન છે, જ્યાં તમને દેશના લગભગ દરેક ખૂણામાં જવા માટે ટ્રેનો મળે છે. ચાંદની ચોક વિસ્તારમાં બનેલ જૂનું દિલ્હી રેલ્વે સ્ટેશન દિલ્હીનું સૌથી જૂનું રેલ્વે સ્ટેશન છે, જે 1864 માં બનાવવામાં આવ્યું હતું. આજે પણ આ સ્ટેશન લગભગ 100 વર્ષ જૂની ઇમારતમાં ચાલી રહ્યું છે. આ સ્ટેશન પર લગભગ 18 પ્લેટફોર્મ છે. જ્યાંથી દરરોજ સેંકડો ટ્રેનો ઉપડે છે.

મહારાજા અગ્રસેન કોણ છે?

મહારાજા અગ્રસેનને સૂર્યવંશી ક્ષત્રિય વંશના એક મહાન ભારતીય રાજા તરીકે યાદ કરવામાં આવે છે. તેઓ હરિયાણાના હિસાર જિલ્લાના અગ્રોહાના રાજા હતા. મહારાજા અગ્રસેનને સમાજવાદના પ્રણેતા તરીકે યાદ કરવામાં આવે છે. તેમના શાસનકાળની એક ખાસ વાત એ હતી કે તેમણે નવા પરિવારને સક્ષમ બનાવવા માટે 'એક ઈંટ, એક રૂપિયો' આપવાની પ્રથા શરૂ કરી હતી.