તું વિમાન ઉડાવવા લાયક નથી, જા ચપ્પલ સીવવાનું કામ કર
ઇન્ડિગો એરલાઇન્સના એક ટ્રેની પાઇલટે તેના ત્રણ સાથીદારો સાથે કાર્યસ્થળ પર જાતિ આધારિત દુર્વ્યવહારનો આરોપ લગાવ્યો
નવી દિલ્હી,તા.૨૪: ઇન્ડિગો એરલાઇન્સના એક ટ્રેની પાઇલટે તેના ત્રણ સાથીદારો સાથે કાર્યસ્થળ પર જાતિ આધારિત દુર્વ્યવહારનો આરોપ લગાવ્યો છે. તેણે આરોપ લગાવ્યો છે કે સાથીદારોએ તેને અપમાનજનક નામોથી બોલાવ્યો હતો અને કહ્યું હતું કે તે કૉકપીટમાં બેસવા કે વિમાન ઉડાડવા માટે યોગ્ય નથી. શરણ કુમારે એવો પણ આરોપ લગાવ્યો હતો કે તેના સાથીઓએ તેને કહ્યું હતું કે તે વિમાન ઉડાડવા માટે યોગ્ય નથી અને તેણે ચપ્પલ સીવવાનું કામ કરવું જોઈએ.
શરણના પિતા અશોક કુમારે તેમના પુત્રના, તપસ ડે, મનીષ સાહની અને રાહુલ પાટીલ વિરુદ્ધ નોંધાવેલી ફરિયાદમાં જણાવ્યું હતું કે, ત્રણેયે મારા પુત્ર પર જાતિવાદી ટિપ્પણીઓ કરી હતી. તેમણે કહ્યું હતું કે તું વિમાન ઉડાવવા માટે યોગ્ય નથી, તેને પાછું જવું જોઈએ અને ચંપલ સીવવાનું કામ કરવું જોઈએ. મારી જાતિ સાથે સંકળાયેલા જૂના વ્યવસાયનો ઉલ્લેખ કરવામાં આવ્યો હતો. તેમણે કહ્યું હતું કે તું મારા જૂતા ચાટવા માટે પણ યોગ્ય નથી. ઉપરોક્ત જાતિવાદી અને અપમાનજનક ટિપ્પણીઓ અન્ય લોકોની સામે કરવામાં આવી હતી, જે કાયદા હેઠળ ગંભીર ગુનો છે.
પોલીસમાં નોંધાવેલી ફરિયાદ મુજબ, અશોક કુમારે આરોપ લગાવ્યો છે કે, એક સાથીદારે મારા પુત્રને કહ્યું શું તારામાં હિંમત છે કે મારી સામે બેસીને મારી પાસેથી ખુલાસો માગીશ? તારી પાસે આ બિલ્ડિંગમાં ચોકીદાર બનવાની ઔકાત નથી અને તું ખુલાસો માગી રહ્યો છે? તેમની ફરિયાદના આધારે, ત્રણ આરોપીઓ વિરુદ્ધ અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમ (SC/ST એક્ટ) અને ભારતીય ન્યાય સંહિતા (BNS) ની સંબંધિત કલમો હેઠળ કેસ નોંધવામાં આવ્યો છે.
સાથીદારો દ્વારા સતત હેરાનગતિ અને ભેદભાવપૂર્ણ વર્તનનો આરોપ લગાવતા, અશોક કુમારે એમ પણ કહ્યું કે ઉપરોક્ત જાતિવાદી ટિપ્પણીઓ તેમના પુત્ર શરણની જાતિનો સ્પષ્ટ ઉલ્લેખ કરીને કરવામાં આવી હતી, જેનો હેતુ તેને અપમાનિત કરવાનો અને અનુસૂચિત જાતિના વ્યક્તિ તરીકે તેના ગૌરવ અને દરજ્જાને ઘટાડવાનો હતો. અશોક કુમારે એમ પણ કહ્યું કે તેમના પુત્ર શરણને તેની કોઈ ભૂલ વિના કરેક્ટિવ ટ્રેનિંગ લેવાની ફરજ પાડવામાં આવી હોવાથી તેના પર વધુ દુર્વ્યવહાર કરવામાં આવ્યો હતો. તેમણે આરોપ લગાવ્યો કે કામ માટે ઉપલબ્ધ હોવા છતાં તેનો પગાર કાપવામાં આવ્યો હતો, કોઈપણ માન્ય કારણ વિના તબીબી રજા કાપવામાં આવી હતી, સ્ટાફ મુસાફરી અને ACM વિશેષાધિકાર રદ કરવામાં આવ્યા હતા, અને પુરાવા વિના ચેતવણી પત્ર જારી કરવામાં આવ્યો હતો.
પીડિતના પિતા અશોક કુમારના જણાવ્યા અનુસાર, આ બધી યુક્તિઓ એટલા માટે અપનાવવામાં આવી હતી કે મારો પુત્ર દબાણમાં રાજીનામું આપે. તેમણે એવો પણ દાવો કર્યો હતો કે શરણ કુમારે ઇન્ડિગો એરલાઇન્સના સીઈઓ અને એથિક્સ કમિટીને આ બાબતની જાણ કરી હોવા છતાં, આરોપીઓ સામે કોઈ કાર્યવાહી કરવામાં આવી નથી. અશોક કુમારે કહ્યું, આ અન્યાય દૂર કરવા કે મારા ગૌરવ અને અધિકારોનું રક્ષણ કરવા માટે કોઈ કાર્યવાહી કરવામાં આવી નથી. દરમિયાન, પોલીસે શરણ કુમાર દ્વારા લગાવવામાં આવેલા આરોપોની વધુ તપાસ શરૂ કરી છે.
(10:17 AM IST)
છેલ્લા 8 દિવસમાં સૌથી લોકપ્રિય 
