મુંબઈ : એક સમયે દેવાના ડુંગર નીચે દબાયેલા અને યસ બેંક દ્વારા હેડક્વાર્ટર પર કબજો કરાયા બાદ અનિલ અંબાણીના દિવસો ફરી રહ્યા હોય તેવું લાગી રહ્યું છે. પાંચ વર્ષ પહેલાં, યસ બેંકે બેંક લોન ન ચૂકવી શકવાને કારણે અનિલ ધીરુભાઈ અંબાણી ગ્રુપ (ADAG) ના હેડક્વાર્ટર રિલાયન્સ સેન્ટર પર કબજો કરી લીધો હતો. બેંકે સિક્યોરિટાઈઝેશન એન્ડ રિકન્સ્ટ્રક્શન ઑફ ફાયનાન્સિયલ એસેટ્સ એન્ડ એન્ફોર્સમેન્ટ ઑફ સિક્યુરિટી ઈન્ટરેસ્ટ એક્ટ હેઠળ અનિલ અંબાણીની ઓફિસ પોતાના કબજામાં લીધી હતી. પાંચ વર્ષ પછી, પરિસ્થિતિ અને દ્રશ્ય બંને બદલાયા, અને આજે અનિલ અંબાણીએ તે જ બેંકના ₹273 કરોડ ચૂકવીને પોતાની કંપનીને દેવામુક્ત કરી દીધી છે.

રિલાયન્સ ઇન્ફ્રાસ્ટ્રક્ચર 'કર્જમુક્ત' બની!

અનિલ અંબાણી ગ્રુપની કંપની રિલાયન્સ ઇન્ફ્રાસ્ટ્રક્ચરની સંપૂર્ણ માલિકીની સહાયક કંપની જેઆર ટોલ રોડ (JRTR) એ યસ બેંકને ચૂકવવાના ₹273 કરોડની સંપૂર્ણ લોન ચૂકવી દીધી છે. કંપનીએ વ્યાજ સહિત આ લોનને ચૂકવીને તેને દેવામુક્ત કરી છે. આ કરાર સાથે, JRTR વતી લોન ગેરંટર તરીકે કંપનીની જવાબદારીનો સંપૂર્ણ રીતે નિકાલ થઈ ગયો છે. લોન ચૂકવ્યા બાદ હવે યસ બેંક લિમિટેડ પાસે કંપનીમાં કોઈ શેર નથી.

દેવામુક્ત થતા જ શેર રોકેટ બન્યા!

કંપની દ્વારા શેરબજારને આ માહિતી આપવામાં આવી, જેના પછી રિલાયન્સ ઇન્ફ્રાના શેર ઝડપથી વધવા લાગ્યા. બજારમાં ઘટાડો હોવા છતાં, રિલાયન્સ ઇન્ફ્રાના શેર 1.81%ના ઉછાળા સાથે ₹380 પર પહોંચી ગયા.

જો આ શેરની વાત કરીએ તો, રિલાયન્સ ઇન્ફ્રાના શેરોએ છેલ્લા એક મહિનામાં 20%, એક વર્ષમાં 77% અને પાંચ વર્ષમાં રોકાણકારોના પૈસાને 10 ગણા કરી દીધા છે. કંપનીને નવા ઓર્ડર મળી રહ્યા છે, રિલાયન્સ ઇન્ફ્રામાં રોકાણ વધી રહ્યું છે અને હવે કંપનીનું દેવું પણ સમાપ્ત થઈ ગયું છે, જેના કારણે આગામી દિવસોમાં આ શેરમાં વધુ તેજીના સંકેતો મળી રહ્યા છે.

અનિલ અંબાણી માટે આ એક મોટી રાહત અને તેમની કંપનીના પુનરુત્થાનનો સંકેત છે. શું આ નવી શરૂઆત તેમને ફરીથી ઉદ્યોગ જગતમાં મજબૂત સ્થાન અપાવશે?