મુંબઈ, 14 જૂન 2025: મુંબઈના ગોવંડી વિસ્તારમાં શિવાજી નગર ખાતે આજે એક અત્યંત કરૂણ અને ભયાવહ અકસ્માત સર્જાયો હતો. શનિવારે સાંજે ઘાટકોપર-માનખુર્દ લિન્ક રોડ પર આવેલા શિવાજી નગર સિગ્નલ પાસે એક બેકાબૂ ડમ્પર ટ્રકે ચાર નિર્દોષ લોકોને કચડી નાખ્યા હતા. આ દુર્ઘટનામાં ત્રણ યુવાનોનું ઘટનાસ્થળે જ કરૂણ મોત નીપજ્યું હતું, જ્યારે એક વ્યક્તિ ગંભીર રીતે ઘાયલ થયો છે અને તેને નજીકની હોસ્પિટલમાં સારવાર માટે દાખલ કરવામાં આવ્યો છે.
ઘટનાસ્થળે રોષ અને તણાવપૂર્ણ માહોલ:
આ ભયાવહ અકસ્માત બાદ ઘટનાસ્થળે મોટી સંખ્યામાં ગુસ્સે ભરાયેલા નાગરિકો ઉમટી પડ્યા હતા. લોકોએ પોલીસને ઘેરી લેતા તણાવપૂર્ણ વાતાવરણ સર્જાયું હતું. પરિસ્થિતિને કાબૂમાં લેવા માટે લોકો દ્વારા ઘાટકોપર-માનખુર્દ લિન્ક રોડને બ્લોક કરવામાં આવ્યો હતો, જેના પરિણામે રોડની બંને બાજુએ ભારે ટ્રાફિક જામ સર્જાયો હતો.
પોલીસે તાત્કાલિક કાર્યવાહી કરીને અકસ્માત સર્જનાર ડમ્પર ટ્રકના ડ્રાઈવરને કસ્ટડીમાં લઈ લીધો છે. વિસ્તારમાં કોઈ અનિચ્છનીય ઘટના ન બને તે માટે મોટી સંખ્યામાં પોલીસ દળ તૈનાત કરવામાં આવ્યું છે.
ગોવંડીમાં તાજેતરના અન્ય અકસ્માતો
નોંધનીય છે કે, ગોવંડી વિસ્તારમાં અકસ્માતોની આ બીજી ઘટના છે. આ મહિનાની શરૂઆતમાં, ૭ જૂનની રાત્રે પણ ગોવંડી વિસ્તારમાં એક BEST બસની ટક્કરથી ૩૨ વર્ષીય પદયાત્રીનું મોત થયું હતું. મૃતકનું નામ બરકત ચાંદ શેખ હતું, જે રફીક નગર, ગોવંડીમાં રહેતા હતા અને દૈનિક મજૂર તરીકે કામ કરતા હતા. પોલીસ રિપોર્ટ અનુસાર, આ અકસ્માત રાત્રે ૯:૧૫ વાગ્યાની આસપાસ સંત નિરંકારી ભવન નજીક નવા શિવાજીનગર BEST બસ ડેપો તરફ જતા રસ્તા પર થયો હતો. FIR મુજબ, બરકત શેખ સંત નિરંકારી ભવનથી ૯૦ ફીટ રોડ તરફ ચાલી રહ્યા હતા ત્યારે તેઓ લપસી પડ્યા અને રસ્તા પર પડી ગયા. તે જ ક્ષણે BEST બસ પસાર થઈ અને તેઓ વાહન નીચે કચડાઈ ગયા. હોસ્પિટલ લઈ જતા સમયે બરકતનું મોત નીપજ્યું હતું.