નવી દિલ્હી : કાગળના એક એવા ટુકડાની કિંમત કોઈપણ રદ્દી કાગળ કરતાં ઓછી હશે, પરંતુ બે યુવાનોએ તેને 'શેંગેન વિઝા'ના ભ્રમમાં ખરીદવા માટે ₹31 લાખ રૂપિયા ખર્ચ્યા! આ સમગ્ર છેતરપિંડીનો પર્દાફાશ દિલ્હીના ઇન્દિરા ગાંધી આંતરરાષ્ટ્રીય (IGI) એરપોર્ટ પર થતાં જ પોલીસ વિભાગમાં ખળભળાટ મચી ગયો, અને દિલ્હી એરપોર્ટ પોલીસે આ કૌભાંડના તાર શોધવા પંજાબથી ગુજરાત સુધી દોડધામ શરૂ કરી દીધી. આ કેસમાં હવે એરપોર્ટ પોલીસે ગુજરાત મૂળના કમલકાંત સુરેશબાબુ ઝા નામના મુખ્ય એજન્ટની ધરપકડ કરી છે, અને આ મામલે કુલ ત્રણ આરોપીઓની ધરપકડ થઈ ચૂકી છે.
એરપોર્ટ પર ખુલ્લી પડી પોલ:
આ સમગ્ર ખેલની શરૂઆત 20-21 મેની રાત્રે દિલ્હીના IGI એરપોર્ટ પર થઈ હતી. તે રાત્રે, પંજાબના હોશિયારપુર શહેરના રહેવાસી તરણવીર સિંહ અને ગગનદીપ સિંહ દોહા થઈને રોમ (ઇટાલી) જવા માટે એરપોર્ટ પહોંચ્યા હતા. ઇમિગ્રેશન તપાસ દરમિયાન, આ બંને યુવાનોના પાસપોર્ટ પરનો શેંગેન વિઝા નકલી હોવાનું સહેલાઈથી પકડી પાડવામાં આવ્યું. નકલી વિઝાની જાણ થતા જ, બંને યુવાનોને કસ્ટડીમાં લેવામાં આવ્યા અને તાત્કાલિક IGI એરપોર્ટ પોલીસને સોંપવામાં આવ્યા.
31 લાખનો 'સોદો' અને ગુજરાત કનેક્શન:
એડિશનલ કમિશનર ઓફ પોલીસ (IGI એરપોર્ટ) ઉષા રંગનાનીના જણાવ્યા અનુસાર, પૂછપરછ દરમિયાન, બંને આરોપીઓએ ચોંકાવનારો ખુલાસો કર્યો કે તેમણે આ નકલી શેંગેન વિઝા માટે અધધધ 31 લાખ રૂપિયા ખર્ચ્યા હતા. આ નકલી વિઝા તેમને કમલકાંત સુરેશબાબુ ઝા નામના એક એજન્ટ દ્વારા પૂરા પાડવામાં આવ્યા હતા. બંને આરોપીઓએ પોલીસને જણાવ્યું કે તેઓ કમલકાંતને અમદાવાદમાં આવેલી VFS ઓફિસમાં મળ્યા હતા. કમલકાંતે તેમને સ્વીડન વિઝા માટે બાયોમેટ્રિક નોંધણી અને અન્ય દસ્તાવેજો કરાવી આપ્યા હતા, જેનાથી તેમને વિશ્વાસ થયો હતો.
પૂછપરછમાં એ પણ બહાર આવ્યું કે જ્યારે તેમની વાસ્તવિક વિઝા અરજી નામંજૂર કરવામાં આવી, ત્યારે કમલકાંતે તેમને નકલી સ્વીડન વિઝા પૂરા પાડ્યા હતા. આ જ નકલી વિઝા એરપોર્ટ પર પકડાયા અને તરણવીર તેમજ ગગનદીપની ધરપકડ કરવામાં આવી.
પંજાબથી ગુજરાત અને છેવટે દિલ્હીમાં ધરપકડ:
આ ખુલાસા પછી, પોલીસે કમલકાંતની શોધમાં ગુજરાતમાં અનેક જગ્યાએ દરોડા પાડ્યા હતા, પરંતુ તે પોલીસ કસ્ટડીમાંથી ભાગી જવામાં સફળ રહ્યો હતો. આખરે, ચાલાક આરોપી કમલકાંતને દિલ્હીના એક ગુપ્ત સ્થળેથી પકડી પાડવામાં આવ્યો છે, અને આ સાથે આંતરરાજ્ય નકલી વિઝા રેકેટના તાર વધુ સ્પષ્ટ બન્યા છે.
કૌભાંડના ઊંડા મૂળ:
પૂછપરછ દરમિયાન, 22 વર્ષીય કમલકાંતે જણાવ્યું કે તેણે 10મા ધોરણ સુધી અભ્યાસ કર્યો છે અને ગ્રાફિક ડિઝાઇનમાં ડિપ્લોમા કર્યો છે. તેણે થોડા વર્ષો પહેલા પંજાબ સ્થિત એજન્ટ લલ્લી ઉર્ફે રવિંદર સિંહને મળ્યો હોવાનો ખુલાસો કર્યો. એજન્ટ લલ્લીએ જ તેને વિદેશ યાત્રા માટે નકલી વિઝા દસ્તાવેજો ગોઠવવાનું કામ સોંપ્યું હતું, જેના માટે તેને ₹15 લાખની ઓફર કરવામાં આવી હતી. કમલકાંતે વધુમાં જણાવ્યું કે એજન્ટ અભિનેશ સક્સેના પાસેથી પૈસા મેળવ્યા પછી, તેણે અન્ય એજન્ટોની મદદથી આ નકલી સ્વીડન વિઝા બનાવ્યા અને મુસાફરોને તેમના પાસપોર્ટમાં તે નકલી વિઝા ચોંટાડીને પહોંચાડ્યા હતા.
આ કેસ દર્શાવે છે કે વિદેશ જવાની ઘેલછામાં યુવાનો કેવી રીતે છેતરપિંડીનો ભોગ બની રહ્યા છે, અને નકલી દસ્તાવેજોનો આ કાળો કારોબાર પંજાબથી ગુજરાત અને અન્ય રાજ્યો સુધી ફેલાયેલો છે. પોલીસ આ રેકેટના અન્ય સભ્યોને ઝડપી પાડવા માટે વધુ તપાસ કરી રહી છે.