મેરઠ : ઉત્તર પ્રદેશના મેરઠ જિલ્લામાં રવિવારે (૧ જૂન) સવારે ભૂકંપના હળવા ઝટકા અનુભવાયા હતા. રિક્ટર સ્કેલ પર ભૂકંપની તીવ્રતા ૨.૭ માપવામાં આવી હતી. આ આંચકાથી લોકોમાં ગભરાટ ફેલાયો હતો અને તેઓ ડરના માર્યા પોતાના ઘરોમાંથી બહાર નીકળી આવ્યા હતા.
નેશનલ સેન્ટર ફોર સિસ્મોલોજી (NCS) દ્વારા આપવામાં આવેલી માહિતી અનુસાર, મેરઠમાં ભૂકંપ રવિવારે સવારે ૮ વાગ્યે ૪૪ મિનિટે આવ્યો હતો. ભૂકંપનું કેન્દ્ર મેરઠમાં જ ધરતીથી ૫ કિલોમીટર નીચે હતું. સદનસીબે, તીવ્રતા ઓછી હોવાને કારણે કોઈ જાનહાનિ કે મોટા નુકસાનના અહેવાલ નથી. જોકે, ઝટકાથી સ્થાનિક લોકો થોડા ડરી ગયા હતા અને સાવચેતીના ભાગરૂપે ઘરોમાંથી બહાર આવી ગયા હતા.
મણિપુરમાં પણ અનુભવાયા હતા ભૂકંપના ઝટકા:
નોંધનીય છે કે, ૨૮ મેના રોજ મણિપુરમાં પણ ભૂકંપના બે ઝટકા અનુભવાયા હતા. રિક્ટર સ્કેલ પર તેમની તીવ્રતા અનુક્રમે ૨.૫ અને ૫.૨ માપવામાં આવી હતી. NCS અનુસાર, ૨૮ મે, ૨૦૨૫ ના રોજ વહેલી સવારે ૧:૫૪ વાગ્યે (ભારતીય સમય મુજબ) મણિપુરના ચુરાચાંદપુર જિલ્લામાં ૫.૨ તીવ્રતાનો ભૂકંપ આવ્યો હતો. આ ભૂકંપનું કેન્દ્ર ૨૪.૪૬ ઉત્તર અક્ષાંશ અને ૯૩.૭૦ પૂર્વ રેખાંશ પર હતું, જેની ઊંડાઈ ૪૦ કિલોમીટર હતી.
તેના થોડા સમય બાદ જ બીજી વખત મણિપુરમાં ભૂકંપના ઝટકા અનુભવાયા હતા. NCS અનુસાર, વહેલી સવારે ૨:૨૬ વાગ્યે (ભારતીય સમય મુજબ) મણિપુરના નોની જિલ્લામાં ૨.૫ તીવ્રતાનો એક હળવો ભૂકંપ આવ્યો હતો. આ ભૂકંપનું કેન્દ્ર નોની જિલ્લામાં ૨૪.૫૩ ઉત્તર અક્ષાંશ અને ૯૩.૫૦ પૂર્વ રેખાંશ પર હતું, જેની ઊંડાઈ ૨૫ કિલોમીટર હતી. જોકે, આ ભૂકંપના કારણે કોઈ જાનમાલના નુકસાનના સમાચાર નથી, પરંતુ સતત બે વખત ભૂકંપ આવતા મણિપુરમાં લોકો ભયભીત થઈ ગયા હતા. ૪ ઓક્ટોબરના રોજ પણ મણિપુર-નાગાલેન્ડ સરહદી વિસ્તારમાં ભૂકંપના ઝટકા અનુભવાયા હતા, જેની તીવ્રતા ૩.૬ માપવામાં આવી હતી.
ભૂકંપ શા માટે આવે છે?
જણાવી દઈએ કે, ભૂકંપ ધરતીના અંદર થતી ટેકટોનિક પ્લેટ્સની હલચલને કારણે આવે છે. જ્યારે ધરતીની સપાટીની નીચે આ પ્લેટ્સ એકબીજા સાથે ટકરાય છે, ત્યારે અંદર જમા થયેલી ઊર્જા એક ઝટકાના રૂપમાં બહાર નીકળે છે અને ધરતી પર કંપન અનુભવાય છે.