નાસિક : મહારાષ્ટ્રમાં છેલ્લા એક મહિનાથી થયેલા ભારે વરસાદે ડુંગળીના પાકને વ્યાપક નુકસાન પહોંચાડ્યું છે. જેના પગલે રાજ્યના ડુંગળી ઉત્પાદક ખેડૂતોના સંગઠને રાજ્ય સરકાર પાસે ₹૧ લાખ પ્રતિ એકરના દરે વળતરની માંગ કરી છે. આ ઉપરાંત, નેશનલ એગ્રીકલ્ચરલ કોઓપરેટિવ માર્કેટિંગ ફેડરેશન ઓફ ઇન્ડિયા (NAFED) દ્વારા પારદર્શક રીતે ડુંગળીની ખરીદી કરવાની પણ માંગ કરવામાં આવી છે.
મહારાષ્ટ્ર રાજ્ય કાંદા ઉત્પાદક સંગઠનના પ્રમુખ ભરત દિઘોલે અને નાસિક જિલ્લા પ્રમુખ જયદીપ ભદાણે દ્વારા મુખ્યમંત્રી દેવેન્દ્ર ફડણવીસને ૨૯ મેના રોજ લખેલા પત્રમાં જણાવવામાં આવ્યું છે કે, મે મહિનામાં થયેલા ભારે વરસાદને કારણે રાજ્યના જલગાંવ, ધુલે, નાસિક, અહિલ્યાનગર, છત્રપતિ સંભાજીનગર, પુણે, સોલાપુર, બીડ, ધારાશિવ, સાંગલી, બુલઢાણા, અકોલા, પરભણી અને જાલના જેવા મુખ્ય ડુંગળી ઉત્પાદક જિલ્લાઓ ખરાબ રીતે પ્રભાવિત થયા છે.
પત્રમાં જણાવાયું છે કે, ૬ મેથી રાજ્યભરમાં થયેલા ભારે વરસાદને કારણે ડુંગળીના પાકને ભારે નુકસાન થયું છે. ઘણા ખેડૂતોએ તો રવિ સિઝનનો સંપૂર્ણ પાક કાપણી પહેલા જ ગુમાવી દીધો છે. આવા ખેડૂતો માટે સંગઠને પ્રતિ એકર ₹૧ લાખનું વળતર માંગ્યું છે. આ ઉપરાંત, જે ખેડૂતોએ ડુંગળીની કાપણી કરી લીધી હતી પરંતુ સંગ્રહ ન કરી શકવાને કારણે ઉપજને નુકસાન થયું છે, તેમના માટે સંગઠને ₹૨ હજાર પ્રતિ ક્વિન્ટલ સબસિડીની માંગ કરી છે.
સંગઠનનો દાવો છે કે, રાજ્યમાં સતત થયેલા ભારે વરસાદને કારણે હજારો ટન ડુંગળી ખેતરોમાં સડી ગઈ છે, જેના કારણે ખેડૂતોને કરોડો રૂપિયાનું નુકસાન થયું છે. એસોસિએશને રાજ્ય સરકારને નુકસાનનું તાત્કાલિક અને સચોટ આકલન કરવા અને તાત્કાલિક વળતર ચૂકવવા અપીલ કરી છે. પત્રમાં એવું પણ જણાવાયું છે કે, નેફડે અને રાષ્ટ્રીય સહકારી ઉપભોક્તા સંઘે કેન્દ્રીય બફર સ્ટોક માટે કૃષિ પેદાશ બજાર સમિતિઓ (APMC) દ્વારા ખેડૂતો પાસેથી સીધા જ ₹૩૦૦૦ પ્રતિ ક્વિન્ટલના દરે ત્રણ લાખ ટન ડુંગળીની ખરીદી કરવી જોઈએ.