નોની, ૨૮ મે, ૨૦૨૫: ભારતના ઉત્તર-પૂર્વીય રાજ્ય મણિપુરમાં આજે, બુધવારે (૨૮ મે, ૨૦૨૫) વહેલી સવારે ફરી એકવાર ધરતી ધ્રુજી ઉઠી હતી. રાજ્યમાં એક પછી એક બે ભૂકંપના આંચકા અનુભવાતા લોકોમાં ભારે દહેશત ફેલાઈ ગઈ હતી અને ઘણા લોકો અડધી રાત્રે જ ગભરાઈને પોતાના ઘરોમાંથી બહાર નીકળી આવ્યા હતા. રાહતની વાત એ છે કે, ભૂકંપને કારણે કોઈ પ્રકારની જાનમાલની નુકસાનીના સમાચાર નથી, પરંતુ લોકોમાં ભયનો માહોલ સ્પષ્ટપણે જોવા મળ્યો હતો.
ભૂકંપના આંચકાની વિગત
નેશનલ સેન્ટર ફોર સીસ્મોલોજી (NCS) દ્વારા આપવામાં આવેલી માહિતી અનુસાર, ભૂકંપનો પહેલો આંચકો વહેલી સવારે ૧:૫૪ વાગ્યે ચુરાચાંદપુર જિલ્લામાં અનુભવાયો હતો. રિક્ટર સ્કેલ પર તેની તીવ્રતા ૫.૨ માપવામાં આવી હતી અને તેનું કેન્દ્ર ૪૦ કિલોમીટરની ઊંડાઈએ આવેલું હતું.
આ પ્રથમ આંચકાના લગભગ અડધા કલાક પછી, વહેલી સવારે ૨:૨૬ વાગ્યે, નોની જિલ્લામાં બીજો આંચકો અનુભવાયો હતો. આ આંચકાની તીવ્રતા ૨.૫ માપવામાં આવી હતી અને તેની ઊંડાઈ ૨૫ કિલોમીટર હતી.
અગાઉ પણ આવી ચૂક્યા છે આંચકા
નોંધનીય છે કે, આ જ મહિનાની ૮ મેના રોજ પણ મણિપુરના ચંદેલ જિલ્લામાં ૩.૬ની તીવ્રતાનો ભૂકંપ આવ્યો હતો. ત્યારે પણ કોઈ મોટું નુકસાન થયું ન હતું. પરંતુ, હવે વારંવાર આવી રહેલા આ ભૂકંપના આંચકાઓએ સ્થાનિક લોકોની ચિંતામાં વધારો કર્યો છે.
લોકોમાં ડરનો માહોલ, તંત્ર એલર્ટ પર
સ્થાનિક લોકોનું કહેવું છે કે, ભૂકંપના આંચકા અનુભવતા જ તેઓ ઘભરાઈ ગયા હતા અને પોતાના પરિવાર સાથે તરત જ ઘરોની બહાર ખુલ્લી જગ્યામાં આવી ગયા હતા. વહીવટીતંત્ર દ્વારા પરિસ્થિતિ પર સતત નજર રાખવામાં આવી રહી છે અને કોઈપણ કટોકટીની સ્થિતિને પહોંચી વળવા માટે રાહત ટીમોને એલર્ટ પર રાખવામાં આવી છે. વારંવાર આવતા ભૂકંપના કારણે લોકોમાં સુરક્ષા અંગે ચિંતા પ્રસરી છે.