રાજકોટઃ હવામાન વિશ્‍લેષક વિશાલ પાનસૂરિયા દ્વારા આપવામાં આવેલી નવીનતમ વેધર અપડેટ મુજબ, અરબી સમુદ્રમાં સર્જાયેલી સિસ્‍ટમ્‍સ હવે વાવાઝોડા સુધી મજબૂત બને તેવી શકયતા ખૂબ ઓછી જણાઈ રહી છે. આ રાહતના સમાચાર વચ્‍ચે, આ સિસ્‍ટમ્‍સ મુંબઈ તરફ ગતિ કરી રહી હોવાથી, આગામી પાંચ દિવસ સુધી મુંબઈ, પુણે સહિત મહારાષ્‍ટ્રના દરિયાકાંઠાના વિસ્‍તારોમાં ભારે વરસાદ જોવા મળશે.

વિશાલ પાનસૂરિયાના વિશ્‍લેષણ મુજબ, ગુજરાતમાં હાલની જેમ જ અલગ અલગ વિસ્‍તારોમાં મે મહિનાના બાકીના દિવસો દરમિયાન વરસાદી ગતિવિધિ ચાલુ રહેશે. રાજ્‍યના વિવિધ ભાગોમાં છૂટાછવાયા ઝાપટાં પડવાની કે હળવાથી મધ્‍યમ વરસાદની સંભાવના છે, પરંતુ મોટા પાયે વ્‍યાપક કે ભારે વરસાદની શકયતા ઓછી છે.

આ સિસ્‍ટમ્‍સની મુખ્‍ય અસર હવે મહારાષ્‍ટ્ર પર જોવા મળશે. મુંબઈ અને પુણે જેવા મોટા શહેરો સહિત મહારાષ્‍ટ્રના દરિયાકાંઠાના વિસ્‍તારોમાં આગામી પાંચ દિવસ સુધી ધોધમાર વરસાદ પડશે તેવી આગાહી કરવામાં આવી છે. સ્‍થાનિક વહીવટી તંત્ર અને નાગરિકોને આ માટે સાવચેત રહેવા અને જરૂરી કાળજી લેવા અપીલ કરવામાં આવી છે.

આ અપડેટ ગુજરાતના ખેડૂતો અને સામાન્‍ય જનતા માટે રાહતરૂપ બની રહેશે, કારણ કે વાવાઝોડાના ખતરાથી મુક્‍તિ મળી છે. જોકે, છૂટાછવાયા વરસાદની ગતિવિધિ ચાલુ રહેતા વાતાવરણમાં ભેજ અને ગરમીનું પ્રમાણ યથાવત રહેશે તેવી શકયતા છે