News of Monday, 19th May 2025
અમેરિકાએ ભારતમાંથી 15 કેરીના શિપમેન્ટને નકારી કાઢ્યા : નિકાસકારોને 4.5 કરોડ રૂપિયાનું નુકસાન
મુંબઈમાં નિર્ધારિત પ્રક્રિયા મુજબ રેડિયેશન ટ્રીટમેન્ટ આપ્યા પછી કેરીઓને એર કાર્ગો દ્વારા અમેરિકા મોકલાઈ હતી પરંતુ લોસ એન્જલસ, સાન ફ્રાન્સિસ્કો અને એટલાન્ટા એરપોર્ટ પર યોગ્ય દસ્તાવેજના અભાવે સ્વીકારવાનો ઇનકાર કર્યો

નવી દિલ્હી: ભારતથી અમેરિકા મોકલવામાં આવેલી કેરીના અનેક કન્સાઇન્મેન્ટને અમેરિકન સત્તાવાળાઓએ નકારી કાઢ્યા છે. દસ્તાવેજોના અભાવે ઓછામાં ઓછા 15 શિપમેન્ટ નકારવામાં આવ્યા હતા. મુંબઈમાં નિર્ધારિત પ્રક્રિયા મુજબ રેડિયેશન ટ્રીટમેન્ટ આપ્યા પછી આ કેરીઓને એર કાર્ગો દ્વારા અમેરિકા મોકલવામાં આવી હતી, પરંતુ લોસ એન્જલસ, સાન ફ્રાન્સિસ્કો અને એટલાન્ટા એરપોર્ટ પર તેમને સ્વીકારવાનો ઇનકાર કરવામાં આવ્યો હતો.
ભારતથી અમેરિકા મોકલવામાં આવેલી કેરીઓને 8 અને 9 મેના રોજ વાશી, નવી મુંબઈ ખાતેની સુવિધા ખાતે યુએસ ડિપાર્ટમેન્ટ ઓફ એગ્રીકલ્ચર (USDA) ની દેખરેખ હેઠળ રેડિયેશન ટ્રીટમેન્ટ આપવામાં આવી હતી. જીવાતોને દૂર કરવા અને સંગ્રહ સમય વધારવા માટે આ પ્રક્રિયા ફરજિયાત છે. પરંતુ યુએસ સત્તાવાળાઓએ રેડિયેશન સંબંધિત દસ્તાવેજો (ખાસ કરીને PPQ203 ફોર્મ) માં અનિયમિતતાનો ઉલ્લેખ કરીને આ શિપમેન્ટ્સને પ્રવેશવાની મંજૂરી આપી ન હતી.
PPQ203 એક મહત્વપૂર્ણ પ્રમાણપત્ર છે, જે ભારતમાં ફક્ત યુએસ સત્તાવાળાઓ દ્વારા જારી કરવામાં આવે છે. નિકાસકારો કહે છે કે આ તેમની ભૂલ નથી પણ નવી મુંબઈના રેડિયેશન સેન્ટરની ભૂલ છે. એક નિકાસકારે કહ્યું, "અમે કોઈ ભૂલ કરી નથી, છતાં અમને તેની સજા મળી રહી છે
અહેવાલ મુજબ, આ શિપમેન્ટને ભારત પાછા મોકલવાનો અથવા નાશ કરવાનો વિકલ્પ આપવામાં આવ્યો હતો. પરંતુ કેરીઓ નાશવંત હોવાથી અને તેમના પરિવહન ખર્ચને કારણે, નિકાસકારોએ આ કેરીઓનો નાશ કરવાનું વધુ સારું માન્યું. આના કારણે, લગભગ 5 લાખ ડોલર (લગભગ 4.2 કરોડ રૂપિયા) નુકસાન થવાનો અંદાજ છે
USDA દ્વારા એક નિકાસકારને મોકલવામાં આવેલી સૂચનામાં કહેવામાં આવ્યું હતું કે PPQ203 ફોર્મ ખોટી રીતે જારી કરવામાં આવ્યું હતું, તેથી યુએસ કસ્ટમ્સ વિભાગે કન્સાઇનમેન્ટમાં પ્રવેશ કરવાનો ઇનકાર કર્યો હતો. એ પણ સ્પષ્ટ કરવામાં આવ્યું હતું કે યુએસ સરકાર આ શિપમેન્ટ માટે કોઈ જવાબદારી કે રાહત આપશે નહીં.
આ બાબત પર પ્રતિક્રિયા આપતા, કૃષિ અને પ્રક્રિયાકૃત ખાદ્ય ઉત્પાદનો નિકાસ વિકાસ સત્તામંડળ (APEDA) એ જણાવ્યું હતું કે આ મામલો મહારાષ્ટ્ર રાજ્ય કૃષિ માર્કેટિંગ બોર્ડ (MSAMB) દ્વારા સંચાલિત વાશી કેન્દ્રનો છે, જે USDA દ્વારા માન્યતા પ્રાપ્ત છે. તેથી, ત્યાંથી જરૂરી માહિતી લેવી જોઈએ.
અત્રે ઉલ્લેખનીય છે કે અમેરિકા ભારતમાંથી કેરીનું સૌથી મોટું નિકાસ સ્થળ છે. રેડિયેશન પ્રક્રિયા પૂર્ણ થયા પછી પણ, જો દસ્તાવેજોમાં ભૂલને કારણે શિપમેન્ટ નકારવામાં આવે છે, તો તે માત્ર વ્યવસાયિક નુકસાનમાં પરિણમે છે એટલું જ નહીં પરંતુ એક મોટી પ્રક્રિયા અને વ્યવસ્થાપન ક્ષતિને પણ પ્રકાશિત કરે છે. હવે જોવાનું એ રહે છે કે ભારત સરકાર અને સંબંધિત એજન્સીઓ આ મામલાની તપાસ કરે છે અને જવાબદારી નક્કી કરે છે કે નહીં
(6:32 PM IST)









છેલ્લા 8 દિવસમાં સૌથી લોકપ્રિય 
