<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 19th May 2025

ઓપરેશન સિંદૂરે પાકિસ્તાનને શીખવ્યો કડક પાઠ : ભારતે વિકસિત રાષ્ટ્ર બનવાના લક્ષ્ય તરફ મક્કમ પગલાં ભરવા પડશે

આતંકવાદ સામેની કાર્યવાહીમાં ભારતે પાકિસ્તાનની ૨૦ ટકા લશ્કરી ક્ષમતાનો કર્યો નાશ : વ્યૂહાત્મક લાભ મેળવ્યો : ૨૦૪૭ સુધીમાં વિકસિત ભારતનું લક્ષ્ય સાકાર કરવા આર્થિક વિકાસ અને રોજગારી પર ધ્યાન કેન્દ્રિત કરવું પડશે

નવી દિલ્હી: ઓપરેશન સિંદૂર હેઠળ ભારતે પાકિસ્તાનમાં આતંકવાદી ઠેકાણાઓ પર કરેલો હુમલો આતંકવાદ સામેની એક નિર્ણાયક કાર્યવાહી હતી. પાકિસ્તાને ભારતના લશ્કરી અને નાગરિક લક્ષ્યોને નિશાન બનાવીને સંઘર્ષને વધારવાનો પ્રયાસ કર્યો, પરંતુ ભારતના વ્યૂહાત્મક ઠેકાણાઓ પરના ઘાતક હુમલાએ પાકિસ્તાનને શાંતિની અપીલ કરવા મજબૂર કરી દીધું. ભારતે લશ્કરી કાર્યવાહી દ્વારા પાકિસ્તાનની ૨૦ ટકા લશ્કરી ક્ષમતાનો નાશ કરીને તેને કડક પાઠ ભણાવ્યો એટલું જ નહીં, પરંતુ સંઘર્ષને મર્યાદિત રાખીને વધુ પરિપક્વતા પણ દર્શાવી. કારણ કે ભારત તેની વિશાળ વસ્તીની સારા જીવનની આકાંક્ષાઓ પૂર્ણ કરવા અને ૨૦૪૭ સુધીમાં વિકસિત રાષ્ટ્ર બનવાના લક્ષ્યને પ્રાપ્ત કરવા માટે પ્રતિબદ્ધ છે.
આવી સ્થિતિમાં, સંઘર્ષને લંબાવવો માત્ર આર્થિક રીતે ખર્ચાળ જ નહીં, પરંતુ આતંકવાદના મુદ્દાને પણ પાછળ ધકેલી દેત. ભારતે પાકિસ્તાનને સ્પષ્ટ સંદેશ આપ્યો છે કે આતંકવાદી હુમલાઓની તેને એવી કિંમત ચૂકવવી પડશે જે તે સહન નહીં કરી શકે. વડાપ્રધાન નરેન્દ્ર મોદીએ પણ સ્પષ્ટ કર્યું છે કે આતંકવાદનો સામનો કરવાની આ નીતિ હવે નવી સામાન્ય બાબત છે. આ સંઘર્ષમાં પાકિસ્તાનને શીખવવામાં આવેલા પાઠ અને ભારતની પરિપક્વતાનું મૂલ્યાંકન કરવું આજે મહત્વપૂર્ણ છે.
ઓપરેશન સિંદૂરમાં સ્વદેશી શસ્ત્રો અને હવાઈ સંરક્ષણ પ્રણાલીઓએ તેમની ક્ષમતા સાબિત કરી છે. ભારતે વિશ્વને બતાવ્યું છે કે તે સ્વદેશી ટેકનોલોજીથી નેટવર્ક કેન્દ્રિત યુદ્ધ ચલાવી શકે છે અને જીતી શકે છે. આકાશ અને આકાશતીર જેવી સ્વદેશી હવાઈ સંરક્ષણ પ્રણાલીઓ તેના ઉદાહરણ છે. ભારતે પાકિસ્તાનની હવાઈ સંરક્ષણ પ્રણાલીને નિષ્ક્રિય કરીને તેના ઇચ્છિત સ્થળો પર સફળતાપૂર્વક હુમલો કર્યો અને તેના મુખ્ય વ્યૂહાત્મક ઠેકાણાઓ અને સંપત્તિઓનો નાશ કર્યો. આ સ્પષ્ટ સંદેશ છે કે પાકિસ્તાનનો નાશ કરવા માટે ભારત પાસે લશ્કરી ક્ષમતા અને આધુનિક ટેકનોલોજી છે અને જરૂર પડ્યે તેનો ઉપયોગ કરવામાં આવશે.
પાકિસ્તાનને સ્પષ્ટ સંદેશ આપવામાં આવ્યો છે કે ભારત સામે આતંકવાદને પ્રોત્સાહન આપવાની તેને ભારે કિંમત ચૂકવવી પડશે. જો તેની સેના આતંકવાદી ઠેકાણાઓ પરના હુમલા દરમિયાન વચ્ચે આવશે, તો ભારત સેના અને લશ્કરી ઠેકાણાઓનો પણ નાશ કરશે, ભલે તેનું પરિણામ સંપૂર્ણ યુદ્ધ હોય. આ સંઘર્ષમાં પાકિસ્તાનને થયેલા નુકસાનના સ્તરને જોતાં, ભવિષ્યમાં ભારતમાં આતંકવાદી હુમલા કરતાં પહેલાં તેણે અનેકવાર વિચારવું પડશે. ઓપરેશન સિંદૂર દ્વારા ભારતે વિશ્વને પણ સંદેશ આપ્યો છે કે પાકિસ્તાન પ્રાયોજિત આતંકવાદને સહન કરવામાં નહીં આવે અને ભારત તેનો જવાબ લશ્કરી કાર્યવાહી દ્વારા આપશે. ભારત પાકિસ્તાનના પરમાણુ બ્લેકમેલ સામે ઝૂકશે નહીં અને આતંકવાદી હુમલાઓ પછી પુરાવાઓથી વિશ્વને સંતુષ્ટ કરવાનો પ્રયાસ કરવાને બદલે પોતાની રીતે સુરક્ષા જોખમો પર નિર્ણયો લેશે અને પોતાની સુવિધા મુજબ પગલાં લેશે. પાકિસ્તાનમાં પંજાબ સહિત નવ આતંકવાદી ઠેકાણાઓનો નાશ કરીને ભારતે આતંકવાદીઓને સંદેશ આપ્યો છે કે તેઓ પાકિસ્તાનના કોઈપણ ખૂણામાં સુરક્ષિત નથી અને ભારત તેમને ગમે ત્યાં નિશાન બનાવી શકે છે. ભવિષ્યમાં આતંકવાદી હુમલાઓ માટે જવાબદાર લોકો પર પણ કાર્યવાહી કરવામાં આવશે.
વિકસિત ભારતનું લક્ષ્ય પ્રાપ્ત કરવા માટે ભારતે આર્થિક વિકાસને વેગ આપવો પડશે અને રોજગારીની નવી તકો ઊભી કરવી પડશે. હાલના વૈશ્વિક અર્થતંત્રમાં ૩૨ ટ્રિલિયન ડોલરનું નિકાસ બજાર છે, જેમાં ભારતનો હિસ્સો વધારવાની અપાર સંભાવનાઓ છે. માલની નિકાસમાં ભારતનો હિસ્સો હાલમાં બે ટકાથી ઓછો છે, જેને ૪ ટકા સુધી વધારી શકાય છે, જ્યારે સેવાઓની નિકાસમાં ભારતનો હિસ્સો ૪ ટકા છે, જેમાં પણ વૃદ્ધિની સારી તક છે. વિકસિત દેશ બનવા માટે ભારતની પ્રતિ વ્યક્તિ આવક લગભગ $૧૨,૮૦૦ અથવા $૧૨,૯૦૦ હોવી જોઈએ, જે ૨૦૨૨-૨૦૨૩માં લગભગ $૨૫૦૦ હતી. આ લક્ષ્યને હાંસલ કરવા માટે ભારતે લગભગ ૭.૬ ટકાના GDP વૃદ્ધિ દરની જરૂર પડશે. અદ્યતન ટેકનોલોજીમાં મોટા પાયે રોજગારીની તકો ઊભી કરવી એક પડકાર છે, જેના માટે શિક્ષણ, આરોગ્ય અને કૃષિ ક્ષેત્રે સુધારા કરવા પડશે. સંયુક્ત રાષ્ટ્ર અનુસાર, ૨૦૨૦ સુધીમાં વિશ્વના ૧૨૬ દેશો વિકાસશીલ દેશોની યાદીમાં સામેલ હતા અને ભારત પણ આ શ્રેણીમાં છે. વિકસિત રાષ્ટ્ર બનવા માટે ભારતે હજુ લાંબી મજલ કાપવાની છે.

 

(4:43 PM IST)