તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Monday, 19th May 2025
પાકિસ્તાની સેનાએ અમૃતસરના 'સુવર્ણ મંદિર' પર ડ્રોન અને મિસાઈલ હુમલો કર્યો હતો :ભારતીય સેનાનો મોટો ખુલાસો
8 મેની સવારે અંધારામાં પાકિસ્તાને મુખ્યત્વે ડ્રોન અને લાંબા અંતરની મિસાઇલોથી મોટો હવાઈ હુમલો કર્યો હતો જેને ભારતીય સેનાએ નિષફ્ળ બનાવ્યો :સુવર્ણ મંદિર પર છોડવામાં આવેલા તમામ ડ્રોન અને મિસાઇલોને તોડી પાડ્યા

નવી દિલ્હી : ઓપરેશન સિંદૂરની મદદથી ભારતીય સેનાએ થોડા જ દિવસોમાં પાકિસ્તાનના આતંકવાદી સંગઠનો અને તેની સેના બંનેને ઘૂંટણિયે પાડી દીધા. જોકે, આ કાર્યવાહી દરમિયાન ભારતે ખાસ ધ્યાન રાખ્યું હતું કે ભારતના હુમલામાં પાકિસ્તાનના સામાન્ય લોકોને કોઈ નુકસાન ન થાય. જોકે, કાયર પાકિસ્તાની સેનાએ જાણી જોઈને ભારતીય નાગરિક લક્ષ્યોને નિશાન બનાવ્યા. હવે ભારતીય સેનાએ પાકિસ્તાનના વધુ એક કાયર કૃત્યનો પર્દાફાશ કર્યો છે. સેનાએ કહ્યું છે કે, પાકિસ્તાની સેનાએ ડ્રોન અને મિસાઇલોથી પંજાબના અમૃતસરમાં સ્થિત પવિત્ર સુવર્ણ મંદિરને નિશાન બનાવવાનો પ્રયાસ કર્યો હતો. જોકે, ભારતીય સેનાએ પાકિસ્તાનના આ પ્લાનને નિષ્ફળ બનાવ્યો.
ભારતીય સેનાના મેજર જનરલ કાર્તિક સી શેષાદ્રીએ આ વિશે જણાવ્યું હતું કે- "તે જાણીતું હતું કે પાકિસ્તાની સેના પાસે કોઈ મર્યાદિત લક્ષ્યો નથી. અમને અંદાજ હતો કે તેઓ લશ્કરી ઠેકાણાઓ, ધાર્મિક સ્થળો સહિત નાગરિક લક્ષ્યોને નિશાન બનાવશે. અમૃતસરનું સુવર્ણ મંદિર આમાં સૌથી અગ્રણી માનવામાં આવતું હતું. અમે સુવર્ણ મંદિરને સંપૂર્ણ હવાઈ સંરક્ષણ આપવા માટે આધુનિક હવાઈ સંરક્ષણ પ્રણાલીઓથી આવરી લીધું. 8 મેની સવારે અંધારામાં પાકિસ્તાને મુખ્યત્વે ડ્રોન અને લાંબા અંતરની મિસાઇલોથી મોટો હવાઈ હુમલો કર્યો. અમે સંપૂર્ણપણે તૈયાર હતા કારણ કે અમે આની અપેક્ષા રાખી હતી. અમારા બહાદુર અને સતર્ક આર્મી એર ડિફેન્સ ગનર્સે પાકિસ્તાની સેનાના નાપાક ઇરાદાઓને નિષ્ફળ બનાવ્યા અને સુવર્ણ મંદિર પર છોડવામાં આવેલા તમામ ડ્રોન અને મિસાઇલોને તોડી પાડ્યા. આ રીતે અમે અમારા પવિત્ર સુવર્ણ મંદિર પર એક પણ ખરોચ આવવા દીધી નહીં."
ભારતીય સેનાએ આકાશ મિસાઇલ સિસ્ટમ, L-70 એર ડિફેન્સ ગન અને અન્ય એર ડિફેન્સ સિસ્ટમ્સની મદદથી અમૃતસરમાં સુવર્ણ મંદિર અને પંજાબના શહેરોને પાકિસ્તાની મિસાઇલ અને ડ્રોન હુમલાઓથી સુરક્ષિત કર્યા હતા. પાકિસ્તાનના બધા ડ્રોન અને મિસાઇલોને હવામાં જ તોડી પાડવામાં આવ્યા.
ભારતીય સેનાના 15મા પાયદળ વિભાગના JOC મેજર જનરલ કાર્તિક સી શેષાદ્રીએ પણ પાકિસ્તાનને ચેતવણી આપી છે. તેમણે કહ્યું, "યાદ રાખો, ઓપરેશન સિંદૂર ફક્ત મુલતવી રાખવામાં આવ્યું છે, તે પૂરું થયું નથી. તેનું સૌથી ખરાબ સ્વરૂપ હજુ આવવાનું બાકી છે."
(2:01 PM IST)









છેલ્લા 8 દિવસમાં સૌથી લોકપ્રિય 
