<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 19th May 2025

વિદેશ જનારા સાંસદોના પ્રતિનિધિમંડળના નહિ જાય યુસુફ પઠાણ:TMCએ નામ પાછું ખેંચી લીધું

ટીએમસીએ કહ્યું- આતંકવાદ સામેની લડાઈમાં અમે કેન્દ્ર સરકાર સાથે ઉભા છીએ. આતંકવાદના મુદ્દા પર પાકિસ્તાનને આખી દુનિયા સમક્ષ ખુલ્લું પાડવું જોઈએ, પરંતુ મારી પાર્ટીમાંથી કોણ જશે અને વિપક્ષી પાર્ટીમાંથી કોણ જશે, તે પાર્ટી નક્કી કરશે. ભાજપ આનો નિર્ણય લેશે નહીં.

નવી દિલ્હી :ઓપરેશન સિંદૂર પછી, કેન્દ્ર સરકારે એક સમિતિની રચના કરી છે જે વિશ્વના વિવિધ દેશોમાં જશે અને ભારતનો પક્ષ રજૂ કરશે. આ જૂથમાં વિવિધ પક્ષોના નેતાઓનો સમાવેશ કરવામાં આવ્યો છે. જોકે, તૃણમૂલ કોંગ્રેસ (TMC) એ પોતાના સાંસદને મોકલવાનો ઇનકાર કર્યો છે. કેન્દ્ર સરકારે કોંગ્રેસ સહિત અનેક વિપક્ષી પક્ષોના સાંસદોને આ ઝુંબેશનો ભાગ બનાવ્યા છે. તે જ સમયે, આ યાદીમાં TMC સાંસદ યુસુફ પઠાણનું નામ પણ સામેલ હતું. જોકે, TMCએ યુસુફ પઠાણનું નામ પાછું ખેંચી લીધું છે.

 

TMC રાજ્યસભાના સાંસદ ડેરેક ઓ'બ્રાયને આ જાહેરાત કરી છે. આ સાથે તેમણે આ પાછળનું કારણ પણ સ્પષ્ટ કર્યું છે. ડેરેક કહે છે કે આંતરરાષ્ટ્રીય સ્તરે રાજદ્વારીની જવાબદારી કેન્દ્ર સરકારની છે. ડેરેકે કહ્યું- તૃણમૂલ કોંગ્રેસ સંપૂર્ણપણે રાષ્ટ્રીય હિતની સાથે છે, પરંતુ આંતરરાષ્ટ્રીય સ્તરે રાજદ્વારી કામગીરી કરવાનું કામ કેન્દ્ર સરકારનું છે અને આ કામ ફક્ત કેન્દ્રને જ કરવાની મંજૂરી આપવી જોઈએ.

 

પાકિસ્તાનમાં ઓપરેશન સિંદૂર અને આતંકવાદનો પર્દાફાશ કરવા માટે, કેન્દ્ર સરકારે 7 પ્રતિનિધિમંડળોની રચના કરી છે, જેમાં વિવિધ પક્ષોના 51 સાંસદોનો સમાવેશ થાય છે. આ યાદીમાં ભાજપના બૈજયંત પાંડા અને રવિશંકર પ્રસાદ, જેડીયુના સંજય કુમાર ઝા, શિવસેનાના શ્રીકાંત શિંદે, કોંગ્રેસના શશિ થરૂર, ડીએમકેના કનિમોઝી કરુણાનિધિ અને એનસીપી-એસપીના સુપ્રિયા સુલેના નામ સામેલ છે.

 

આ અંગે પ્રતિક્રિયા આપતા TMCના મહાસચિવ અભિષેક બેનર્જીએ કહ્યું કે, અમે તમને ખૂબ જ સ્પષ્ટપણે કહી રહ્યા છીએ કે આતંકવાદ સામેની લડાઈમાં અમે કેન્દ્ર સરકાર સાથે ખભા મિલાવીને ઉભા છીએ. આતંકવાદના મુદ્દા પર પાકિસ્તાનને આખી દુનિયા સમક્ષ ખુલ્લું પાડવું જોઈએ, પરંતુ મારી પાર્ટીમાંથી કોણ જશે અને વિપક્ષી પાર્ટીમાંથી કોણ જશે, તે પાર્ટી નક્કી કરશે. ભાજપ આનો નિર્ણય લેશે નહીં. 

 

સરકારે સાંસદોના પ્રતિનિધિમંડળમાં યુસુફ પઠાણનો સમાવેશ કર્યો હતો. એક અહેવાલ મુજબ, સરકારે પઠાણનો સીધો સંપર્ક કર્યો હતો. ભારતે પહેલગામ આતંકવાદી હુમલાનો જવાબ ઓપરેશન સિંદૂર દ્વારા આપ્યો . તેણે પાકિસ્તાન અને પીઓકેમાં સ્થિત 9 આતંકવાદી ઠેકાણાઓનો નાશ કર્યો હતો. જવાબમાં, પાકિસ્તાને આક્રમક વલણ અપનાવ્યું અને અનેક શહેરો પર હુમલો કરવાનો પ્રયાસ કર્યો, જોકે ભારતે દરેક હુમલાને નિષ્ફળ બનાવ્યો. હવે ભારત વિશ્વભરમાં પ્રતિનિધિમંડળો મોકલવાની તૈયારી કરી રહ્યું છે. તે દુનિયાને પાકિસ્તાન વિશે સત્ય કહેશે

(1:55 PM IST)