નવી દિલ્‍હીઃ  ભારત અને પાકિસ્તાન વચ્ચે ચાર દિવસના ખતરનાક લશ્કરી તણાવ પછી, જ્યારે શનિવારે યુદ્ધવિરામની જાહેરાત કરવામાં આવી, ત્યારે બંને દેશોએ રાહતનો શ્વાસ લીધો. દરમિયાન, પાકિસ્તાનના સંરક્ષણ પ્રધાન ખ્વાજા આસિફે રવિવારે એક મોટું નિવેદન આપતા કહ્યું છે કે જો ભવિષ્યમાં ભારત સાથે વાતચીત થાય છે, તો કાશ્મીર, સિંધુ જળ સંધિ (IWT) અને આતંકવાદ જેવા મુખ્ય મુદ્દાઓ તે ચર્ચાનો ભાગ હોઈ શકે છે.
એક ટેલિવિઝન ચેનલને આપેલા ઇન્ટરવ્યુમાં આસિફે કહ્યું, "આ ત્રણ મહત્વપૂર્ણ મુદ્દાઓ છે જેના પર ચર્ચા થઈ શકે છે. અમે યુદ્ધવિરામને વળગી રહીશું." તેઓ ભારત સાથે લાંબા સમયથી ચાલતા વિવાદાસ્પદ મુદ્દાઓનો ઉલ્લેખ કરી રહ્યા હતા, જેના પર પહેલા ઘણી વખત વાતચીત થઈ હતી પરંતુ કોઈ નિર્ણાયક પરિણામ આવ્યું ન હતું.
આ નિવેદન એવા સમયે આવ્યું છે જ્યારે ભારત અને પાકિસ્તાન તાત્કાલિક અસરથી જમીન, હવા અને સમુદ્ર પર તમામ લશ્કરી કાર્યવાહી બંધ કરવા માટે "સહમત" થયા છે. પાકિસ્તાને તેને યુદ્ધવિરામ કરાર ગણાવ્યો હતો, પરંતુ ભારતે તેને ફક્ત "પરસ્પર સમજૂતી" ગણાવી હતી.
પાકિસ્તાનના સંરક્ષણ પ્રધાને કહ્યું કે જો આ યુદ્ધવિરામ કાયમી શાંતિ તરફનું પ્રથમ પગલું સાબિત થાય છે, તો તેને સકારાત્મક સંકેત માનવામાં આવશે. જોકે, તેમણે એમ પણ ઉમેર્યું કે હમણાં કંઈ પણ કહેવું વહેલું ગણાશે. ઉલ્લેખનીય છે કે ગયા અઠવાડિયે દક્ષિણ કાશ્મીરના પહેલગામમાં થયેલા આતંકવાદી હુમલા બાદ ભારતે પાકિસ્તાન અને પાકિસ્તાન અધિકૃત કાશ્મીર (POK)માં આતંકવાદી લોન્ચપેડ પર ડ્રોન અને મિસાઈલ હુમલા કર્યા હતા. જવાબમાં પાકિસ્તાને પણ વળતો જવાબ આપ્યો અને હુમલો કર્યો, જેના કારણે બંને દેશો વચ્ચે તણાવ ચરમસીમાએ પહોંચી ગયો.
આસિફે આશા વ્યક્ત કરી કે સમય જતાં શાંતિની શક્યતાઓ વધી શકે છે. તેમણે કહ્યું, "અમને આશા છે કે ભારત અને ખાસ કરીને તેનું નેતૃત્વ રાજકારણ એક દિવસ સમગ્ર દક્ષિણ એશિયાના ભવિષ્યને તેમના પક્ષના હિતોથી ઉપર રાખશે." પાકિસ્તાનના સંરક્ષણ પ્રધાને તે દેશોની પણ પ્રશંસા કરી જેમણે વર્તમાન કટોકટીમાં રાજદ્વારી સંતુલન જાળવવામાં મદદ કરી. આમાં ચીન, તુર્કી, અઝરબૈજાન અને ગલ્ફ દેશોનો ખાસ ઉલ્લેખ કરવામાં આવ્યો હતો.
ખ્વાજા આસિફના નિવેદન પર ભારત તરફથી હજુ સુધી કોઈ સત્તાવાર પ્રતિક્રિયા આવી નથી. પરંતુ નિષ્ણાતો માને છે કે આ નિવેદન પાકિસ્તાનની વ્યૂહાત્મક વિચારસરણી અને શાંતિ માટેની તૈયારીમાં નરમાઈ દર્શાવવાનો પ્રયાસ હોઈ શકે છે, ખાસ કરીને જ્યારે દેશ આંતરિક રાજકીય અસ્થિરતા અને આંતરરાષ્ટ્રીય દબાણનો સામનો કરી રહ્યો છે.