નવી દિલ્હીઃ 8 અને 9 મેના રોજ જ્યારે પાકિસ્તાની ડ્રોન અને મિસાઇલો ભારતીય શહેરો માટે ખતરો બનીને આવ્યા, ત્યારે ભારતનું સ્વદેશી આકાશ મિસાઇલ સિસ્ટમ્‍સ સુરક્ષાની મજબૂત દીવાલ બની ગયું. આ સિસ્ટમ્‍સ દુશ્મનના હવાઈ હુમલાઓને સચોટ રીતે રોકી અને નષ્ટ કરી દીધા. આ સિસ્ટમ્‍સને બનાવનારા DRDOના પૂર્વ વૈજ્ઞાનિક ડૉ. પ્રહલાદ રામારાવ તેની સફળતાના નાયક છે.

"આ મારા જીવનનો સૌથી ખુશીનો દિવસ છે. મારી બનાવેલી મિસાઇલએ દુશ્મનના હવાઈ ઠેકાણાઓને એટલી સચોટતાથી નષ્ટ કરી!" - ડૉ. પ્રહલાદ રામારાવ

 ડૉ. રામારાવને ભારતના "મિસાઇલ મેન" ડૉ. એ.પી.જે. અબ્દુલ કલામે આકાશ પ્રોજેક્ટનું નેતૃત્વ સોંપ્યું હતું. તે સમયે તેઓ સૌથી યુવાન પ્રોજેક્ટ ડિરેક્ટર હતા. શરૂઆતમાં ભારતીય સેના આ સિસ્ટમ પર વિશ્વાસ રાખતી નહોતી.

"સેનાએ આકાશમાં રસ દાખવ્યો નહોતો. પરંતુ અમે તેને ડ્રોન, મિસાઇલ, હેલિકોપ્ટર અને અહીં સુધી કે પાકિસ્તાનના સુપરસોનિક F-16 જેટ જેવા ખતરાઓને રોકવા માટે બનાવ્યું."

આજે આકાશ સિસ્ટમ ભારતની હવાઈ રક્ષા માટે મજબૂત પાયાનો સ્તંભ છે. તેને DRDOએ તૈયાર કર્યું અને ભારત ડાયનેમિક્સ લિમિટેડ (BDL)એ બનાવ્યું. અનેક રીતે આ ડિફેન્સ સિસ્ટમ ખૂબ જ ખાસ છે.

આકાશ ડૉ. રામારાવના શાનદાર કરિયરનો માત્ર એક ભાગ છે. તેમણે ભારતની લગભગ દરેક મિસાઇલ પર કામ કર્યું છે.