બાંગ્લાદેશની વચગાળાની સરકારે શનિવારે સાંજે ભૂતપૂર્વ વડા પ્રધાન શેખ હસીનાની પાર્ટી અવામી લીગ પર પ્રતિબંધ મૂક્યો હતો. આ કાર્યવાહી આતંકવાદ વિરોધી કાયદા હેઠળ કરવામાં આવી છે. વચગાળાના સરકારના વડા મુહમ્મદ યુનુસની અધ્યક્ષતામાં મળેલી કેબિનેટ બેઠકમાં આ નિર્ણય લેવામાં આવ્યો. આ મામલે, બાંગ્લાદેશ સરકારે કહ્યું છે કે આ નિર્ણયની સત્તાવાર સૂચના આગામી કાર્યકારી દિવસે જારી કરવામાં આવશે

બાંગ્લાદેશ સરકારે કહ્યું કે ભૂતપૂર્વ પીએમ શેખ હસીનાની પાર્ટી અવામી લીગ પરનો આ પ્રતિબંધ ત્યાં સુધી અમલમાં રહેશે જ્યાં સુધી ઇન્ટરનેશનલ ક્રાઇમ ટ્રિબ્યુનલ (ICT) માં પાર્ટી અને તેના નેતાઓ સામે ચાલી રહેલા કેસોનો નિકાલ ન આવે.

બાંગ્લાદેશ સરકાર દ્વારા જારી કરાયેલા એક નિવેદનમાં વધુમાં કહેવામાં આવ્યું છે કે આ પગલું દેશની સુરક્ષા અને સાર્વભૌમત્વના રક્ષણ માટે લેવામાં આવ્યું છે. ઉપરાંત, જુલાઈ 2024 ના જાહેર બળવામાં ભાગ લેનારા નેતાઓ, કાર્યકરો, ફરિયાદીઓ અને સાક્ષીઓની સલામતીને ધ્યાનમાં રાખીને આ નિર્ણય લેવામાં આવ્યો છે.