જમ્મુ : ભારત અને પાકિસ્તાન વચ્ચે યુદ્ધવિરામની સહમતિ બાદ પણ સરહદી વિસ્તારોમાં તણાવ યથાવત જોવા મળી રહ્યો છે. રાજસ્થાનના જોધપુર અને જેસલમેરમાં હાલ પૂરતો બ્લેકઆઉટ યથાવત રાખવામાં આવ્યો છે, જ્યારે પઠાણકોટમાં ફરીથી બ્લેકઆઉટ લાગુ કરવામાં આવ્યો છે.
જમ્મુ-કાશ્મીરના મુખ્યમંત્રી ઉમર અબ્દુલ્લા પાકિસ્તાનની આ નાપાક હરકતથી આશ્ચર્યચકિત થયા છે. તેમણે ટ્વીટ કરીને લખ્યું કે આખરે યુદ્ધવિરામનું શું થયું? શ્રીનગરમાં ધડાકાના અવાજો સંભળાયા છે!!! શ્રીનગરમાં ૪-૫ જેટલા ધડાકા સંભળાયા હોવાના અહેવાલ છે, જ્યારે સાંભામાં સાયરન વાગી રહ્યા છે.
દરમિયાન, રાજસ્થાનના બાડમેરમાં યુદ્ધવિરામની સહમતિ બાદ પણ આવનારા હવાઈ હુમલાનું એલર્ટ જાહેર કરવામાં આવ્યું છે અને જિલ્લામાં તાત્કાલિક અસરથી બ્લેકઆઉટ લાગુ કરવામાં આવ્યું છે. આ ઘટનાક્રમ દર્શાવે છે કે યુદ્ધવિરામ માત્ર કાગળ પર જ રહ્યો હોય તેવું લાગી રહ્યું છે અને સરહદી વિસ્તારોમાં સ્થિતિ હજુ પણ તણાવપૂર્ણ છે.