તા. ૧૯ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૦ ગુરૂવાર
News of Thursday, 8th May 2025
પાકિસ્તાન રઘવાયું બન્યું : સરહદ પરના ગામોમાં કરી રહ્યું છે સતત ઉંબાડિયા :ગોળીબાર અને મોર્ટાર શેલ છોડે છે
કુપવાડા, બારામુલ્લા, ઉરી અને અખનૂર વિસ્તારોમાં નિયંત્રણ રેખા પાર નાના હથિયારો અને તોપખાનાનો ઉપયોગ કરીને રહેણાંક વિસ્તારોને નિશાન બનાવે છે

યુદ્ધવિરામનું ઉલ્લંઘન ભારતીય સેના દ્વારા પાકિસ્તાન પર હાથ ધરવામાં આવેલા 'ઓપરેશન સિંદૂર' બાદ ભારત અને પાકિસ્તાન વચ્ચે તણાવ વધી ગયો છે. પાકિસ્તાન જમ્મુ-કાશ્મીરમાં નિયંત્રણ રેખા પર યુદ્ધવિરામનું ઉલ્લંઘન કરી રહ્યું છે અને અંધાધૂંધ ગોળીબાર કરી રહ્યું છે. પાકિસ્તાન દ્વારા રહેણાંક વિસ્તારોને નિશાન બનાવવામાં આવી રહ્યા છે. સરહદ પારના ગામોમાં મોર્ટાર શેલ છોડવામાં આવ્યા હતા, જેના કારણે પૂંછ અને તંગધારમાં અત્યાર સુધીમાં 15 લોકોનાં મોત થયા છે, જ્યારે 43 લોકો ઘાયલ થયા હોવાના અહેવાલ છે.
07 અને 08 મેની રાત્રે, પાકિસ્તાની સેનાની ચોકીઓએ જમ્મુ અને કાશ્મીરના કુપવાડા, બારામુલ્લા, ઉરી અને અખનૂર વિસ્તારોમાં નિયંત્રણ રેખા પાર નાના હથિયારો અને તોપખાનાનો ઉપયોગ કરીને કોઈ ઉશ્કેરણી વિના ગોળીબાર શરૂ કર્યો. ભારતીય સેનાએ પણ આનો યોગ્ય જવાબ આપ્યો છે. પાકિસ્તાન દ્વારા યુદ્ધવિરામ ઉલ્લંઘનનો આ 14મો દિવસ છે અને ભારે તોપમારાનો બીજો દિવસ છે.
'ઓપરેશન સિંદૂર' પછી, પાકિસ્તાન દ્વારા સંભવિત બદલો લેવા અંગે સેના એલર્ટ મોડ પર છે. દરેક ગતિવિધિ પર બારીક નજર રાખવામાં આવી રહી છે. કાશ્મીરના 10 જિલ્લાઓમાં કંટ્રોલ રૂમ સ્થાપવામાં આવ્યા છે. જમ્મુ અને કાશ્મીરમાં વહીવટી અધિકારીઓ અને કર્મચારીઓની રજાઓ હાલ પૂરતી રદ કરવામાં આવી છે.
જમ્મુ અને કાશ્મીરના સાંબા અને કઠુઆ જિલ્લા ઉપરાંત, જમ્મુ જિલ્લાના આરએસપુરા વિસ્તારમાં આગામી 72 કલાક માટે એલર્ટ જારી કરવામાં આવ્યું છે. આ ચેતવણી હેઠળ, સરહદી વિસ્તારોમાં રહેતા લોકોને શક્ય તેટલી વહેલી તકે ગામડાઓ ખાલી કરવા કહેવામાં આવ્યું છે. બુધવારે મોડી રાત સુધી સરહદી વિસ્તારોના ગામડાઓ ખાલી કરાવવાનું ચાલુ રહ્યું. સાવચેતીના પગલા તરીકે, અહીં શાળાઓ, કોલેજો અને તમામ પ્રકારની સંસ્થાઓ બંધ કરી દેવામાં આવી છે.
કેન્દ્રશાસિત પ્રદેશની કાશ્મીર ખીણને પણ એલર્ટ મોડ પર રાખવામાં આવી છે. વર્તમાન પરિસ્થિતિને ધ્યાનમાં રાખીને, ખીણના તમામ જિલ્લાઓમાં કંટ્રોલ રૂમ નંબર જારી કરવામાં આવ્યા છે. આ નંબરો કોઈપણ પ્રકારની મુશ્કેલીના કિસ્સામાં લોકોને મદદ કરવા માટે આપવામાં આવ્યા છે.
ગુરુવારે પણ પાકિસ્તાની સેનાએ જમ્મુ-કાશ્મીરના 4 સેક્ટરમાં નિયંત્રણ રેખા (LoC) પર ગોળીબાર કર્યો હતો. ભારતીય સેનાએ આનો યોગ્ય જવાબ આપ્યો. ઓપરેશન સિંદૂર પછી, પાકિસ્તાની સેનાએ બુધવારે અહીં અનેક સરહદી ગામોને નિશાન બનાવ્યા હતા અને ભારે તોપમારો અને મોર્ટાર છોડ્યા હતા.
સેનાના અધિકારીઓનું કહેવું છે કે ગુરુવારે સરહદ પારથી ગોળીબારની તીવ્રતા ઓછી હતી અને તે ફક્ત ચાર સેક્ટર સુધી મર્યાદિત હતી. સંરક્ષણ પ્રવક્તાએ જણાવ્યું હતું કે, "7 અને 8 મેની રાત્રે, પાકિસ્તાની સેનાએ કુપવાડા, બારામુલ્લા, ઉરી અને અખનૂર સેક્ટરની સામે નિયંત્રણ રેખા પર નાના હથિયારો અને તોપખાનાનો ઉપયોગ કર્યો હતો. આ હુમલાઓ તેમના દ્વારા કોઈપણ ઉશ્કેરણી વિના કરવામાં આવ્યા હતા. ભારતીય સેનાએ આ હુમલાઓનો યોગ્ય જવાબ આપ્યો હતો."
અધિકારીઓએ જણાવ્યું હતું કે આજના ગોળીબારમાં કોઈ જાનહાનિના અહેવાલ નથી. પરિસ્થિતિને ધ્યાનમાં રાખીને, સરહદી વિસ્તારોમાંથી સેંકડો લોકો પહેલાથી જ સુરક્ષિત વિસ્તારોમાં સ્થળાંતર કરી ચૂક્યા છે. તેમણે કહ્યું કે જમ્મુમાં સૌથી વધુ અસરગ્રસ્ત પૂંછ સેક્ટરમાં ગઈકાલે બુધવારે ભારે ગોળીબારમાં 13 લોકો માર્યા ગયા હતા.
(1:54 PM IST)









છેલ્લા 8 દિવસમાં સૌથી લોકપ્રિય 
