નવી દિલ્હી :AIMIMના વડા અસદુદ્દીન ઓવૈસીએ બુધવારે પાકિસ્તાનમાં આતંકવાદી છાવણીઓ પર સંરક્ષણ દળો દ્વારા કરવામાં આવેલા સર્જિકલ સ્ટ્રાઈકનું સ્વાગત કર્યું અને કહ્યું કે પાડોશી દેશમાં આતંકવાદી માળખાને સંપૂર્ણપણે નાશ કરવો જોઈએ. આ દરમિયાન, તેમણે સોશિયલ મીડિયા પ્લેટફોર્મ X પર એક વીડિયો પણ પોસ્ટ કર્યો, જેમાં તેઓ પાકિસ્તાન મુર્દાબાદ અને હિન્દુસ્તાન ઝિંદાબાદના નારા લગાવતા જોવા મળ્યા

  આ પહેલા ઓવૈસીએ સોશિયલ મીડિયા પ્લેટફોર્મ 'X' પર એક પોસ્ટમાં કહ્યું હતું કે, "પાકિસ્તાનના 'ડીપ સ્ટેટ'ને એટલો કડક પાઠ ભણાવવો જોઈએ કે પહેલગામ જેવી ઘટના ફરી ક્યારેય ન બને." પાકિસ્તાનના આતંકવાદી માળખાને સંપૂર્ણપણે નાશ કરવો જ જોઇએ. જય હિંદ!'' પહેલગામ આતંકવાદી હુમલાના જવાબમાં, ભારતીય સશસ્ત્ર દળોએ મંગળવારે મોડી રાત્રે પાકિસ્તાન અને પાકિસ્તાન અધિકૃત કાશ્મીરમાં નવ આતંકવાદી છાવણીઓ પર મિસાઇલ હુમલા કર્યા, જેમાં જૈશ-એ-મોહમ્મદના ગઢ બહાવલપુર અને લશ્કર-એ-તૈયબાના કેન્દ્ર મુરીદકેનો સમાવેશ થાય છે

  જમ્મુ અને કાશ્મીરના પહેલગામમાં 22 એપ્રિલે 26 નાગરિકોના હત્યાકાંડના બે અઠવાડિયા પછી, 'ઓપરેશન સિંદૂર' હેઠળ આ મિસાઇલ હુમલા કરવામાં આવ્યા હતા. પહેલગામ હુમલા બાદ તેમણે મંગળવારે કહ્યું હતું કે ભારતે આ હુમલાનો યોગ્ય જવાબ આપવો જોઈએ. પહેલગામ ઘટના અંગે ઓવૈસીએ પત્રકારોને જણાવ્યું હતું કે તે એક આતંકવાદી હુમલો હતો, કાયરતાપૂર્ણ હુમલો હતો. આપણે આની જેટલી નિંદા કરીશું તેટલી ઓછી છે. આપણે જોયું છે કે પાકિસ્તાનના આતંકવાદીઓએ કેવી રીતે 26 લોકોની હત્યા કરી. .

   તેમણે કહ્યું કે જે રીતે બાળકો અને મહિલાઓને અલગ કરીને અને પુરુષોને તેમના ધર્મ વિશે પૂછીને મારી નાખવામાં આવ્યા, તે ભયાનક અને અમાનવીય હતું. "જેઓ કલમાનો પાઠ કરી શકતા ન હતા તેમને ગોળી મારી દેવામાં આવી," ઓલ ઈન્ડિયા મજલિસ-એ-ઇત્તેહાદુલ મુસ્લિમીન (AIMIM) ના નેતાએ કહ્યું. આ બર્બરતા છે." ઓવૈસીએ કહ્યું કે કાશ્મીરના સ્થાનિક રહેવાસીઓ આ હુમલાનો ભોગ બની રહ્યા છે કારણ કે પર્યટન ક્ષેત્રને અસર થઈ છે. "મોટી સંખ્યામાં પ્રવાસીઓ અહીંથી ચાલ્યા ગયા છે," તેમણે કહ્યું. અમે ઈચ્છીએ છીએ કે અમારી સરકાર આનો યોગ્ય જવાબ આપે. અમે સર્વપક્ષીય બેઠકમાં પણ આ જ વાત કહી હતી.