મુંબઈ: મુંબઈ અને તેના મહાનગરીય પ્રદેશોમાં બુધવારે સળંગ બીજા દિવસે પ્રિ-મોન્સૂન વરસાદનું જોરદાર આગમન થયું હતું. ગાજવીજ અને વીજળીના કડાકા સાથે વરસેલા વરસાદે લોકોને તીવ્ર ગરમીથી કામચલાઉ રાહત અપાવી હતી. જો કે, સાંજે ભારે પવન સાથેના વરસાદના કારણે ૧૦૦થી વધુ વૃક્ષોની ડાળીઓ તૂટી પડી હતી અને લોકલ ટ્રેન સેવા પણ ખોરવાઈ ગઈ હતી.
ભારતીય હવામાન વિભાગ (IMD) અનુસાર, આગામી ૨૪ કલાક દરમિયાન મુંબઈ શહેર અને ઉપનગરોમાં ગાજવીજ અને વીજળીના કડાકા સાથે વાદળછાયું વાતાવરણ ચાલુ રહેશે અને છૂટાછવાયા સ્થળોએ ૫૦-૬૦ કિમી પ્રતિ કલાકની ઝડપે પવન ફૂંકાઈ શકે છે. ઉપનગરોમાં મધ્યમથી ભારે વરસાદની શક્યતા છે. મુંબઈ, થાણે, પાલઘર અને રાયગઢ જિલ્લાઓ માટે ગુરુવાર, ૮મી મે સુધી વરસાદ અને ગાજવીજનું યલો એલર્ટ જારી કરવામાં આવ્યું છે.
બુધવારે બપોરે IMDએ મુંબઈ, થાણે અને પાલઘર જિલ્લાઓ માટે મધ્યમ વરસાદ, ગાજવીજ અને ૫૦-૬૦ કિમી પ્રતિ કલાકની ઝડપે પવન ફૂંકાવાની ચેતવણી જારી કરી હતી. મુંબઈ શહેર કરતાં ઉપનગરોમાં વધુ વરસાદ નોંધાયો હતો. IMD અનુસાર, સાંજે ૫.૩૦ વાગ્યા સુધીમાં સાન્તાક્રુઝ વેધશાળાએ ૨૧.૨ મીમી વરસાદ અને ૩૩.૮ °C મહત્તમ તાપમાન નોંધ્યું હતું, જ્યારે કોલાબા વેધશાળાએ ૩ મીમી વરસાદ અને ૩૨.૪ °C મહત્તમ તાપમાન નોંધ્યું હતું.
BMC આપત્તિ વ્યવસ્થાપન વિભાગ અનુસાર, સાંજે ૪ થી ૫ વાગ્યાના એક કલાકના ગાળામાં, જ્યારે ગાજવીજ તીવ્ર હતું, ત્યારે ૧૩ વૃક્ષોની ડાળીઓ તૂટી પડી હતી. સૌથી વધુ વરસાદ ભંડુપ, પોવાઈ, એલબીએસ રોડ, બીકેસી, આરે કોલોની, વર્સોવા, મસ્જિદ અને નરીમાન પોઈન્ટ વિસ્તારોમાં નોંધાયો હતો.
દરમિયાન, પ્રિ-મોન્સૂન વરસાદને કારણે સાંજના પીક અવર્સ દરમિયાન સેન્ટ્રલ અને વેસ્ટર્ન લાઇન બંને પર લોકલ ટ્રેન સેવા ખોરવાઈ ગઈ હતી. વેસ્ટર્ન રેલ્વે પર, ઓવરહેડ ઇલેક્ટ્રિક વાયર (OHE) પર વૃક્ષની ડાળી પડવાના કારણે ઉપનગરીય ટ્રેન સેવા પ્રભાવિત થઈ હતી. સ્લો લાઇન સેવા થોડા સમય માટે બંધ કરવામાં આવી હતી, જેના કારણે ટ્રેનો મોડી દોડી રહી હતી. સેન્ટ્રલ રેલ્વે પર, કેટલીક મેઇનલાઇન સેવાઓ મોડી ચાલી રહી હતી, જ્યારે હાર્બર લાઇન પરની ટ્રેનો પણ મોડી દોડી રહી હતી.
હવામાન વિભાગ અનુસાર, પ્રિ-મોન્સૂન વરસાદ આગામી બે થી ત્રણ દિવસ સુધી ચાલુ રહેવાની શક્યતા છે અને તેનાથી તાપમાનમાં ઘટાડો થશે, જેનાથી ગરમીથી થોડી રાહત મળશે. જો કે, ભેજથી વધુ રાહત મળશે નહીં, કારણ કે પશ્ચિમી પવનો ભેજ ખેંચી રહ્યા છે અને ભેજનું સ્તર વધવાની ધારણા છે.