ચંદીગઢ, તા. ૬ મે: સરહદ પર પાકિસ્તાન સાથે વધતા તણાવ વચ્ચે પંજાબમાં ખેડૂતોએ ફરી એકવાર આંદોલનનું એલાન કર્યું છે. મોટી સંખ્યામાં ખેડૂતો આજે શંભુ બોર્ડર પર પહોંચવાના હતા અને ત્યાં તેમણે શંભુ પોલીસ સ્ટેશનના ઘેરાવની જાહેરાત કરી હતી. આને પગલે ફરીદકોટ જિલ્લા પોલીસે ભારતીય કિસાન યુનિયન એકતા સિદ્ધપુરના પ્રાંતીય અધ્યક્ષ જગજીત સિંહ ડલ્લેવાલને સોમવારે સવારે તેમના ઘરે જ નજરકેદ કરી દીધા હતા.
શંભુ અને ખનૌરી બોર્ડર પર ખેડૂત મોરચો સમાપ્ત કરાવતી વખતે ખેડૂતોની ટ્રોલીઓ અને અન્ય સામાન ચોરાઈ ગયો હતો. પોલીસે આ અંગે ગુનો નોંધ્યો હતો, પરંતુ મોટાભાગના ખેડૂતોને હજી સુધી તેમનો સામાન પાછો મળ્યો નથી. આ મુદ્દે ખેડૂત મોરચાએ પોલીસ સ્ટેશનનો ઘેરાવ કરવાની જાહેરાત કરી હતી.
એસપી મનવિંદર બીર સિંહ અને ડીએસપી ત્રિલોચન સિંહના નેતૃત્વમાં પોલીસ ટીમે ડલ્લેવાલના ઘરે પહોંચીને તેમને નજરકેદ કર્યા હતા. ડલ્લેવાલે કહ્યું કે રાજ્ય સરકાર લોકોનો અવાજ દબાવી રહી છે. તેમણે જણાવ્યું કે મોરચાએ માત્ર એક દિવસના ઘેરાવની યોજના બનાવી હતી. ખેડૂત નેતાએ કહ્યું કે સરકાર ખેડૂતોને તેમનો હક માંગવાથી રોકી રહી છે. તેમણે તમામ ન્યાયપ્રિય લોકોને સરકારની આ કાર્યવાહી સામે એક થવા હાકલ કરી હતી.
મુખ્યમંત્રી ભગવંત માને કહ્યું હતું કે પંજાબમાં એવી કોઈ પણ જાહેરાત, વિરોધ કે હડતાલ જે રસ્તાઓ કે રેલ્વેને અવરોધે અથવા સામાન્ય લોકોને પરેશાન કરે અને તેમની રોજિંદી પ્રવૃત્તિઓમાં વિક્ષેપ ઊભો કરે, તેને જનતા વિરુદ્ધ ગણવામાં આવશે. તમામ સંસ્થાઓ, સંગઠનો અને યુનિયનોએ આ બાબતનું ધ્યાન રાખવું જોઈએ. વિરોધ કરવાના અન્ય પણ ઘણા રસ્તાઓ છે, માત્ર લોકોને પરેશાન કરવા યોગ્ય નથી. જો આવું કરવામાં આવશે તો કડક કાયદેસરની કાર્યવાહી માટે તૈયાર રહેવું પડશે. આ નિવેદનને ખેડૂતોના ૬ મેના પ્રદર્શનના એલાન સાથે જોડીને જોવામાં આવી રહ્યું છે.
લુધિયાણા પોલીસે સવારે કિસાન મજદૂર યુનિયનના પ્રધાન દિલબાગ સિંહને જીવનપુરમાં તેમના નિવાસસ્થાને જ નજરકેદ કરી દીધા હતા. આ દરમિયાન દિલબાગ સિંહને ન તો ઘરની બહાર જવાની પરવાનગી હતી અને ન તો કોઈ તેમને મળી શકે તેમ હતું. તેમના ઘરની બહાર પોલીસે સુરક્ષા ઘેરો બનાવી લીધો હતો. આ માહિતી દિલબાગ સિંહે સોશિયલ મીડિયા પર શેર કરી હતી. દિલબાગ સિંહે કહ્યું કે રાજ્ય સરકારે ખેડૂત મોરચાને બળજબરીથી હટાવી દીધો હતો. આ દરમિયાન તેમની ટ્રોલીઓ વગેરેમાં રાખેલો લાખો રૂપિયાનો સામાન નાશ પામ્યો હતો. દિલબાગ સિંહે કહ્યું કે કિસાન મજદૂર મોરચા (ભારત) અને સંયુક્ત કિસાન મોરચા (ગેર-રાજકીય)એ ૬ મેના રોજ શંભુ પોલીસ સ્ટેશનની બહાર 'જબરદસ્તી વિરોધી ધરણા' કરવાની જાહેરાત કરી છે. દિલબાગનો આરોપ છે કે તાજેતરમાં થયેલા ખેડૂત આંદોલન દરમિયાન સરકારે બળજબરીથી વિરોધ સ્થળોને હટાવી દીધા, નેતાઓને વિશ્વાસઘાત કરીને કસ્ટડીમાં લીધા. આ ધરણાને લઈને પોલીસે ખેડૂત નેતાઓ પર કડક કાર્યવાહી શરૂ કરી દીધી છે.
પંજાબ પોલીસે લગભગ ૨૫ ખેડૂત નેતાઓ સામે મોટી કાર્યવાહી કરી છે. તેમાંથી ઘણાને તેમના ઘરોમાં જ નજરકેદ કરવામાં આવ્યા છે, જ્યારે કેટલાકની અટકાયત પણ કરવામાં આવી છે. મંગળવારે પટિયાલાના શંભુ પોલીસ સ્ટેશનનો ઘેરાવ કરીને ખેડૂતો દ્વારા ધરણા કરવાની જાહેરાતના એક દિવસ પહેલાં કરવામાં આવેલી આ કાર્યવાહીને લઈને ખેડૂત સંગઠનોમાં ભારે રોષ જોવા મળી રહ્યો છે. ખેડૂત સંગઠનોએ ચેતવણી આપી છે કે જો સરકારના કહેવાથી પંજાબ પોલીસ દ્વારા ખેડૂતો પર આ રીતે દબાણ ચાલુ રહેશે, તો આખું પંજાબ જામ કરવામાં આવશે. કિસાન મજદૂર સંઘર્ષ સમિતિના પ્રદેશ નેતા સતનામ સિંહ પન્નુએ જાહેરાત કરી દીધી છે કે ખેડૂતો ડરશે નહીં અને ન તો ઝૂકશે. મંગળવારે દરેક હાલતમાં શંભુ પોલીસ સ્ટેશનની બહાર શાંતિપૂર્ણ રીતે ધરણા કરવામાં આવશે. તેના બીજા દિવસે સાત મેના રોજ દેવીદાસપુરમાં અમૃતસર-દિલ્હી રેલ માર્ગ પણ જામ કરવામાં આવશે. ખેડૂત નેતા તેજવીર સિંહ પંજોખડાએ જણાવ્યું કે સોમવારે વહેલી સવારથી અત્યાર સુધીમાં પોલીસે પંજાબમાં લગભગ ૨૫ ખેડૂત નેતાઓ સામે કાર્યવાહી કરી છે. લુધિયાણામાં ખેડૂત નેતા દિલબાગ સિંહ ગિલ, ખેડૂત નેતા જસવિંદર કૌર, કિસાન મજદૂર સંઘર્ષ મોરચાના નેતા મલકીત સિંહને ફિરોઝપુરમાં, ભારતીય કિસાન યુનિયન દોઆબાના પ્રદેશ પ્રધાન મનજીત સિંહ રાયને હોશિયારપુરમાં, કરનૈલ સિંહ લંગને પટિયાલામાં, બલવંત સિંહ બહેરામકેને મોગામાં તેમના ઘરોમાં નજરકેદ કરવામાં આવ્યા છે. જ્યારે કિસાન મજદૂર સંઘર્ષ સમિતિ જિલ્લા મોગાના પ્રધાન ગુરદેવ સિંહ શાહ વાલા અને ઝોન ફતેહગઢ પંજતૂરના પ્રધાન હરબંસ સિંહ શાહ વાલાની વહેલી સવારે પોલીસે ધરપકડ કરી લીધી છે.