ઢાકા, તા. ૬ મે: બાંગ્લાદેશની એક કોર્ટે મંગળવારે (૬ મે, ૨૦૨૫) જેલમાં બંધ હિન્દુ નેતા ચિન્મય કૃષ્ણ દાસની વધુ ચાર કેસમાં ધરપકડનો આદેશ આપ્યો છે. આ પહેલાં સોમવારે કોર્ટે તેમની વિરુદ્ધ હત્યાના કેસમાં પણ આવો જ આદેશ આપ્યો હતો.
સરકારી સમાચાર એજન્સી બીએસએસના અહેવાલ અનુસાર, ચટ્ટોગ્રામ મેટ્રોપોલિટન મેજિસ્ટ્રેટ એસ.એમ. અલાઉદ્દીન મહમૂદે વર્ચ્યુઅલ સુનાવણી બાદ આ આદેશ જારી કર્યો હતો. આઈએસકેઓએન (ઇન્ટરનેશનલ સોસાયટી ફોર કૃષ્ણ કોન્શિયસનેસ)ના ભૂતપૂર્વ નેતા દાસની રાષ્ટ્રધ્વજના કથિત અપમાનના રાજદ્રોહના કેસમાં ગયા વર્ષે ૨૫ નવેમ્બરે ઢાકાના હઝરત શાહજલાલ આંતરરાષ્ટ્રીય એરપોર્ટ પરથી ધરપકડ કરવામાં આવી હતી. ચટ્ટોગ્રામની એક કોર્ટે તેમની જામીન અરજી ફગાવી દીધી હતી અને બીજા દિવસે તેમને જેલમાં મોકલી દીધા હતા. તેમની ધરપકડ બાદ ઢાકા અને અન્ય સ્થળોએ તેમના અનુયાયીઓએ વ્યાપક વિરોધ પ્રદર્શનો કર્યા હતા.
સહાયક સરકારી વકીલ મોહમ્મદ રૈહાનુલ વાજેદ ચૌધરીના જણાવ્યા અનુસાર, કોર્ટવાલી પોલીસ સ્ટેશનમાં પોલીસ ફરજમાં અવરોધ અને વકીલો તથા ન્યાય માંગનારાઓ પર હુમલા સહિતના ચાર કેસોમાં મંગળવારે કોર્ટે કાર્યવાહી કરી હતી. ન્યૂઝ પોર્ટલ બીડીન્યૂઝ૨૪એ ચૌધરીને ટાંકીને જણાવ્યું હતું કે, "સુનાવણી બાદ તેમને (દાસ) ધરપકડ કરાયેલા બતાવવાની અરજી કોર્ટે મંજૂર કરી હતી." અહેવાલ અનુસાર, એક અધિકારીને ટાંકીને કહેવામાં આવ્યું હતું કે દાસને તેમની "સુરક્ષા અને એકંદર પરિસ્થિતિ"ને ધ્યાનમાં રાખીને સુનાવણી માટે વર્ચ્યુઅલ રીતે કોર્ટમાં રજૂ કરવામાં આવ્યા હતા.
બીએસએસના અહેવાલ મુજબ, વર્ચ્યુઅલ સુનાવણીની અપેક્ષાએ મંગળવાર સવારથી ચટ્ટોગ્રામ કોર્ટ પરિસરમાં સુરક્ષા વધારી દેવામાં આવી હતી. તેણે ઉમેર્યું હતું કે ચટ્ટોગ્રામ જેલની સામે પણ સુરક્ષા વધારી દેવામાં આવી હતી.
સોમવારે કોર્ટે હિન્દુ નેતાની ધરપકડ બાદ ફાટી નીકળેલા હિંસક વિરોધ દરમિયાન હત્યા કરાયેલા સહાયક સરકારી વકીલ સૈફુલ ઇસ્લામ આલિફની હત્યાના સંબંધમાં દાસની ધરપકડનો આદેશ આપ્યો હતો. ૩૦ એપ્રિલે હાઈકોર્ટની બેન્ચે દાસને જામીન પર મુક્ત કરવાનો આદેશ આપ્યો હતો. જો કે, આ નિર્ણયને એપલેટ ડિવિઝનના ચેમ્બર જજ જસ્ટિસ રેઝાઉલ હકે પડકાર્યો હતો, જેમણે આ ચુકાદા પર સ્ટે મૂક્યો હતો. અગાઉ હિન્દુ સમુદાયના નેતાના વકીલો તેમને જામીન અપાવવામાં નિષ્ફળ રહ્યા હતા કારણ કે ચટ્ટોગ્રામની નીચલી કોર્ટે તેમની અરજીઓ ફગાવી દીધી હતી. ટોચના બચાવ પક્ષના વકીલ અપૂર્વ કુમાર ભટ્ટાચાર્યએ અગાઉ કહ્યું હતું કે, "રાષ્ટ્રધ્વજનું અપમાન કરવાનો આરોપ પાયાવિહોણો છે, કારણ કે તે રાષ્ટ્રધ્વજ નહોતો."