અમૃતસર: અટારી-વાઘા બોર્ડર પર ભારત અને પાકિસ્તાન વચ્ચે એક નવો રાજદ્વારી વિવાદ ઊભો થયો છે. ભારતથી પોતાના દેશ પરત ફરી રહેલા પાકિસ્તાની નાગરિકોને પાકિસ્તાને લેવાનો ઇનકાર કરી દીધો છે. ભારતીય ઇમિગ્રેશન અધિકારીઓના જણાવ્યા અનુસાર, પાકિસ્તાને આજે સવારે 8 વાગ્યાથી પોતાના રિસીવિંગ કાઉન્ટર બંધ કરી દીધા છે, જેના કારણે ડઝનેક પાકિસ્તાની નાગરિકો બોર્ડર પર ફસાયેલા છે.
આ ફસાયેલા લોકોમાં વૃદ્ધો, મહિલાઓ અને બાળકોનો સમાવેશ થાય છે. તેમની પાસે ન તો રહેવાની જગ્યા છે અને ન તો ખાવા-પીવાની વ્યવસ્થા. આ અણધાર્યા નિર્ણય બાદ અટારી બોર્ડર પર સુરક્ષા વધારી દેવામાં આવી છે. પાકિસ્તાનની આ હરકતની સોશિયલ મીડિયા પર ઘણી ટીકા થઈ રહી છે અને લોકો તેને શરમજનક ગણાવી રહ્યા છે.
જો કે, ભારત સરકારે સ્પષ્ટ કર્યું છે કે તે પાકિસ્તાની નાગરિકોને તેમના દેશ પરત ફરવાની મંજૂરી આપતી રહેશે. ગૃહ મંત્રાલયે પોતાના જૂના આદેશમાં ફેરફાર કરીને બોર્ડરને હાલ પૂરતી ખુલ્લી રાખવાનો નિર્ણય લીધો છે. અગાઉ 30 એપ્રિલથી બોર્ડર બંધ કરવાનો નિર્દેશ જારી કરવામાં આવ્યો હતો.
ઉલ્લેખનીય છે કે આ નિર્ણય 22 એપ્રિલે જમ્મુ-કાશ્મીરના પહલગામમાં થયેલા એક ભીષણ આતંકવાદી હુમલા બાદ લેવામાં આવ્યો હતો, જેમાં 26 લોકો માર્યા ગયા હતા. આ હુમલાને સરહદ પારથી આવેલો આતંકવાદી હુમલો જણાવવામાં આવ્યો હતો. ત્યારબાદ ભારત સરકારે કડક વલણ અપનાવતા પાકિસ્તાની નાગરિકોના વિઝા રદ કરવાનું શરૂ કરી દીધું હતું.
છેલ્લા એક સપ્તાહમાં ભારતથી લગભગ 800 પાકિસ્તાની નાગરિકો પોતાના દેશ પરત ફર્યા છે, જેમાં 55 રાજદ્વારી અને તેમના સ્ટાફના સભ્યોનો પણ સમાવેશ થાય છે. જ્યારે, લગભગ 1,500 ભારતીય નાગરિકો પણ પાકિસ્તાનથી પરત ફર્યા છે. સરકારની કડકાઈને લાગુ કરવા માટે કેન્દ્રીય ગૃહ મંત્રી અમિત શાહે તમામ રાજ્યોના મુખ્યમંત્રીઓ સાથે વાત કરી અને સુનિશ્ચિત કરવા કહ્યું કે કોઈ પણ પાકિસ્તાની નાગરિક નિર્ધારિત સમય મર્યાદાથી વધુ ભારત માં ન રોકાય.