વોશિંગ્‍ટન,તા.૩૦: અમેરિકાના રાષ્‍ટ્રપતિ ડોનાલ્‍ડ ટ્રમ્‍પે મંગળવારે કહ્યું કે ભારત સાથે વેપાર કરાર અંગે વાટાઘાટો ખૂબ સારી રીતે ચાલી રહી છે અને તેમને આશા છે કે બંને દેશો ટૂંક સમયમાં કોઈ કરાર પર પહોંચી શકે છે. મિશિગનમાં એક રેલી પહેલા વ્‍હાઇટ હાઉસની બહાર પત્રકારો સાથે વાત કરતી વખતે ટ્રમ્‍પે આ નિવેદન આપ્‍યું હતું. રોઇટર્સના અહેવાલ મુજબ, ટ્રમ્‍પે એમ પણ કહ્યું કે તેઓ ૯૦ દિવસના ટેરિફ ફ્રીઝ દરમિયાન આફ્રિકાની મુલાકાત લેવાની અને ઓસ્‍ટ્રેલિયન અધિકારીઓ સાથે વાતચીત કરવાની યોજના ધરાવે છે.

અગાઉ, યુએસ વાણિજ્‍ય સચિવ હોવર્ડ લુટનિકે પણ એક મુલાકાતમાં કહ્યું હતું કે ટ્રમ્‍પ વહીવટીતંત્રે ભારત સાથે વેપાર કરારને અંતિમ સ્‍વરૂપ આપી દીધું છે અને હવે તે ફક્‍ત ભારતીય વડા પ્રધાન અને સંસદની મંજૂરીની રાહ જોઈ રહ્યું છે. ૅમારી પાસે સોદો તૈયાર છે... પરંતુ મારે ભારતીય વડા પ્રધાન અને તેમની સંસદની મંજૂરી માટે રાહ જોવી પડશે, તેમણે સીએનબીસીને જણાવ્‍યું.

આ અઠવાડિયે, યુએસ ટ્રેઝરી સેક્રેટરી સ્‍કોટ બેસન્‍ટે પણ કહ્યું હતું કે ભારત યુએસ સાથે વેપાર કરાર પર હસ્‍તાક્ષર કરનારા પ્રથમ દેશોમાં સામેલ થઈ શકે છે, જોકે તેમણે વિગતવાર માહિતી આપી ન હતી. ડોનાલ્‍ડ ટ્રમ્‍પે ભારત પર ૨૬ ટકા પ્રતિશોધાત્‍મક ટેરિફ લાદ્યો હતો પરંતુ બાદમાં ૯૦ દિવસની રાહતની જાહેરાત કરી અને ઘણા દેશો સાથે વેપાર કરારો પર વાટાઘાટો શરૂ કરવાની વાત કરી.

ફેબ્રુઆરીમાં, ભારત અને અમેરિકા વેપાર કરારના પ્રથમ તબક્કા પર કામ શરૂ કરવા સંમત થયા હતા, જેનો ઉદ્દેશ વર્ષના અંત સુધીમાં તેને અંતિમ સ્‍વરૂપ આપવાનો અને ૨૦૩૦ સુધીમાં દ્વિપક્ષીય વેપારને ઼૫૦૦ બિલિયન સુધી લઈ જવાનો હતો.

ઉલ્લેખનીય છે કે વડા પ્રધાન નરેન્‍દ્ર મોદી ફેબ્રુઆરીમાં અમેરિકા ગયા હતા, જ્‍યાં તેઓ ટ્રમ્‍પને મળ્‍યા હતા. આ સમય દરમિયાન, બંને નેતાઓએ શકય તેટલી વહેલી તકે વેપાર કરાર પર ચર્ચા શરૂ કરવા અને ટેરિફ અંગે ચાલી રહેલા મતભેદોને ઉકેલવા સંમતિ આપી હતી. જોકે, ભારત સરકારે સ્‍પષ્ટ કર્યું છે કે કોઈપણ કરારમાં દેશના હિત સાથે સમાધાન કરવામાં આવશે નહીં. કેન્‍દ્રીય મંત્રી પીયૂષ ગોયલે કહ્યું કે ભારત પર કોઈપણ પ્રકારનું દબાણ સ્‍વીકારવામાં આવશે નહીં અને દેશવાસીઓના હિતોને સર્વોચ્‍ચ પ્રાથમિકતા આપવામાં આવશે.