જયપુર:અમેરિકાના ઉપરાષ્ટ્રપતિ જેડી વેન્સ, જેઓ ચાર દિવસની ભારત મુલાકાતે છે, તેમણે જયપુરમાં રાજસ્થાન ઇન્ટરનેશનલ સેન્ટર ખાતે ભારત-અમેરિકા સંબંધો પર ભાષણ આપ્યું. તેમણે વડાપ્રધાન નરેન્દ્રભાઈ મોદીની મહેમાનગતિની પ્રશંસા કરી અને એક રસપ્રદ ઘટના શેર કરી. 

વેન્સે જણાવ્યું કે, “મારો સાત વર્ષનો પુત્ર ઇવાન, જ્યારે અમે વડાપ્રધાનના નિવાસસ્થાને રાત્રિભોજન કર્યું, ત્યારે ખોરાક એટલો સ્વાદિષ્ટ હતો અને વડાપ્રધાને અમારા ત્રણ બાળકો સાથે એટલી ઉષ્માપૂર્વક વાત કરી કે ઇવાને કહ્યું, ‘પપ્પા, હું કદાચ ભારતમાં રહીશ.’”  

વેન્સે વડાપ્રધાન મોદી સાથે દિલ્હીમાં થયેલી બેઠકનો ઉલ્લેખ કર્યો, જેમાં બંને નેતાઓએ વેપાર, સંરક્ષણ અને ટેકનોલોજીમાં સહકાર વધારવા ચર્ચા કરી. તેમણે ભારત-અમેરિકા વચ્ચે દ્વિપક્ષીય વેપાર કરારની પ્રગતિને આવકારી અને જણાવ્યું કે આ સદીની સમૃદ્ધિ અને શાંતિ માટે બંને દેશોનો સહકાર મહત્ત્વપૂર્ણ છે.  

વેન્સની પત્ની ઉષા વેન્સ, જેમના મૂળ ભારતના આંધ્રપ્રદેશમાં છે, તેઓ પણ આ મુલાકાતમાં તેમની સાથે છે. તેમના પરિવારે દિલ્હીના અક્ષરધામ મંદિરની મુલાકાત લીધી અને જયપુરના આમેર કિલ્લાની સાંસ્કૃતિક પ્રસ્તુતિનો આનંદ માણ્યો.