નવી દિલ્‍હી તા.૮: સોમવારે ભારે ઘટાડા બાદ આજે શેરબજારમાં જબરદસ્‍ત તેજી જોવા મળી છે. બીએસઈ સેન્‍સેક્‍સ ઇન્‍ટ્રા ડે ૧૭૦૦ પોઈન્‍ટથી વધુ વધીને ટ્રેડ થઈ રહ્યો છે, જ્‍યારે નિફ્‌ટીમાં ૫૦૦ પોઈન્‍ટનો વધારો જોવા મળી રહ્યો છે. બપોરે ૧.૩૦ વાગ્‍યા સુધીમાં, સેન્‍સેક્‍સ ૭૪,૮૦૦ અને નિફ્‌ટી ૨૨,૬૫૦ પર હતો. બજારમાં આ વધારો RBIની MPC બેઠકના નિર્ણય પહેલા આવ્‍યો છે.આ લખાય છે ત્‍યારે સેન્‍સેક્‍સ ૧૧૨૯ વધીને ૭૪૨૬૭ અને નિફ્‌ટી ૪૧૦ વધી ને ૨૨૫૭૨ ઉપર છે

એવી અપેક્ષા છે કે ભારતીય રિઝર્વ બેંક (RBI) રેપો રેટમાં ૨૫ બેસિસ પોઈન્‍ટનો ઘટાડો કરી શકે છે. બજારમાં વધારા સાથે, BSE માર્કેટ કેપિટલાઇઝેશનમાં પણ વધારો થયો છે અને તે ૪.૬૧ લાખ કરોડ રૂપિયા વધીને ૩૯૩.૮૬ લાખ કરોડ રૂપિયાને પાર કરી ગયું છે. નિફ્‌ટી કન્‍ઝયુમર ડ્‍યુરેબલ ઇન્‍ડેક્‍સમાં ૩ ટકાનો વધારો થયો છે, જ્‍યારે મેટલ, રિયલ્‍ટી અને નાણાકીય ક્ષેત્રોમાં ૨ ટકાથી વધુનો વધારો થયો છે. ઇન્‍ડિયા ફિયર ગેજ (ઇન્‍ડિયા VIX) ૧૦.૨% ઘટીને ૨૦.૪૭ થયો છે.

બજારમાં શા માટે મોટો ઉછાળો જોવા મળ્‍યો?

અમેરિકન અને એશિયન બજારોમાં ભારે ઉછાળાને કારણે, આજે ભારતીય બજારમાં પણ તેજી જોવા મળી રહી છે. ખાસ કરીને આઇટી શેરમાં વધારો જોવા મળી રહ્યો છે. દરમિયાન, જાપાનનો નિક્કી ૫.૬ ટકા વધ્‍યો છે.

RBI MPC ની બેઠકના નિર્ણયો ૯ એપ્રિલે આવવાના છે, આવી સ્‍થિતિમાં રેપો રેટમાં ૨૫ ટકાનો ઘટાડો થવાની ધારણા છે. જેના કારણે બજાર સકારાત્‍મક રહે છે.

સોમવારે મોટા ઘટાડા પછી, રોકાણકારોએ ઘણી ખરીદી કરી છે, જેના કારણે નિફ્‌ટી અને સેન્‍સેક્‍સમાં વધારો જોવા મળી રહ્યો છે. આ ઘટાડા વચ્‍ચે મોટા રોકાણકારો પણ તેમના પોર્ટફોલિયોમાં સારા શેર ઉમેરી રહ્યા છે.

ક્રૂડ ઓઇલના ભાવમાં ઘટાડો થયો છે. તે પ્રતિ બેરલ ઼૬૫ ની નીચે આવી ગયું છે. જે ઓગસ્‍ટ ૨૦૨૧નું સૌથી નીચું સ્‍તર છે. ટ્રમ્‍પના ટેરિફને કારણે મોટો ઘટાડો થયો છે.

બીએસઈના ટોચના ૩૦ શેરોમાં, બધા શેર ગ્રીન ઝોનમાં ટ્રેડ થઈ રહ્યા હતા. સૌથી મોટો ઉછાળો ઝોમેટો અને ટાઇટનના શેરમાં જોવા મળ્‍યો છે, જેમાં ૪ ટકાથી વધુનો વધારો થયો છે. બીજી તરફ, SBI, LT અને એશિયન પેઇન્‍ટ્‍સના શેરમાં ૩ ટકાનો વધારો થયો છે.

ફાઇવ સ્‍ટાર બિઝનેસના શેરમાં ૭ ટકાનો વધારો થયો છે. પીજી ઇલેક્‍ટ્રોપોસ્‍ટના શેરમાં ૬.૩૬ ટકા, કેન્‍સ ટેકનોલોજીના શેરમાં ૫ ટકા, પોલિસી બજારના શેરમાં ૬ ટકા, એલઆઈસી હાઉસિંગ ફાઇનાન્‍સના શેરમાં ૬ ટકા અને બાયકોનના શેરમાં ૫ ટકાનો વધારો થયો છે