(સુરેશ એસ ડુગ્ગર દ્વારા)જમ્મુ તા.૭ :  સોમવારે (7 એપ્રિલ) જમ્મુ અને કાશ્મીર વિધાનસભામાં ભારે હંગામો થયો હતો અને તે મારામારી સુધી પહોંચી ગયો હતો. વિધાનસભામાં કોંગ્રેસના ધારાસભ્ય ઈરફાન હાફીઝ લોન અને ભાજપના ધારાસભ્ય વિક્રમ રંધાવા વચ્ચે મારામારી પણ થઈ હતી. આ દરમિયાન કાયદાની નકલો પણ ફાડી નાખવામાં આવી હતી અને એનસીના ધારાસભ્યએ તેમનો કોટ પણ ફાડી નાખ્યો હતો.

કોંગ્રેસના ધારાસભ્ય ઈરફાન લોન વકફ એક્ટ વિરુદ્ધ પોસ્ટર અને કાળા કપડા સાથે વિધાનસભા પહોંચ્યા હતા, જેને તેઓ વિધાનસભામાં લહેરાવવા માંગતા હતા. પોસ્ટર અને કાળા કપડા જોઈને ભાજપના ધારાસભ્યોએ તેનો વિરોધ કર્યો હતો.

બીજેપી ધારાસભ્ય વિક્રમ રંધાવાએ ઈરફાન લોન પાસેથી પોસ્ટર અને કાળું કપડું છીનવવાનો પ્રયાસ કર્યો, ત્યારબાદ વિધાનસભામાં હંગામો શરૂ થયો. આ જોતાં વિધાનસભાના સ્પીકર અબ્દુલ રહીમ રાથેરે વિધાનસભાની કાર્યવાહી દિવસભર માટે સ્થગિત કરી દીધી હતી.

શાસક પક્ષના ધારાસભ્યો વકફ કાયદા પર ચર્ચાની માંગ કરી રહ્યા હતા. આ અંગે ભારે હોબાળો થયો હતો. સોમવારે (7 એપ્રિલ) 12 દિવસ પછી વિધાનસભાની કાર્યવાહી શરૂ થતાં જ નેશનલ કોન્ફરન્સ અને તેના સહયોગી ધારાસભ્યોએ વકફ કાયદા પર ચર્ચાની માંગ કરી હતી. ધારાસભ્યોએ કહ્યું કે આ કાયદો મુસ્લિમો વિરુદ્ધ છે.

શાસક પક્ષના ધારાસભ્યો વેલમાં આવી ગયા હતા અને આ કાયદા પર ચર્ચાની માંગ પર અડગ રહ્યા હતા. ભાજપે વિધાનસભા અધ્યક્ષને પ્રશ્ન-જવાબ આપવાનું શરૂ કરવાની માંગ કરી હતી. નેશનલ કોન્ફરન્સ અને તેના સમર્થક ધારાસભ્યો પણ વિધાનસભામાં પેપર ફાડતા જોવા મળ્યા હતા. આ દરમિયાન જમ્મુ-કાશ્મીર વિધાનસભામાં નેશનલ કોન્ફરન્સના ધારાસભ્ય અબ્દુલ મજીદ લાર્મીએ પોતાનો કાળો કોટ ફાડીને હવામાં લહેરાવ્યો હતો. અન્ય ધારાસભ્યો પણ કાગળો લહેરાવી રહ્યા છે.

ભાજપે કોંગ્રેસ અને નેશનલ કોન્ફરન્સના ધારાસભ્યો વિરુદ્ધ સૂત્રોચ્ચાર કર્યા હતા. જમ્મુ અને કાશ્મીર વિધાનસભાના અધ્યક્ષ અબ્દુલ રહીમ રાથેરે કાયદાને ટાંકીને કહ્યું કે હવે વકફ કાયદાનો મુદ્દો સુપ્રીમ કોર્ટની વિચારણા હેઠળ છે, તેથી તેના પર વિધાનસભામાં ચર્ચા થઈ શકે નહીં. સ્પીકરની આ વાત સાંભળીને વિધાનસભામાં હોબાળો વધી ગયો.