નવી દિલ્‍હી તા.૨: દુનિયામાં સૌથી વધુ ભારતીયો સાઉદી અરેબિયાની જેલમાં કેદ છે. આ યાદીમાં ચીન સહિત અન્‍ય ઘણાં દેશોના નામ પણ સામેલ છે. વિદેશ મંત્રાલય દ્વારા સંસદીય સમિતિ સમક્ષ એક રિપોર્ટ રજૂ કરવામાં આવ્‍યો હતો, જેમાં ભારતની બહાર જેલમાં બંધ ભારતીયોની સંખ્‍યાની વિગતો આપવામાં આવી છે. તાજેતરનો કિસ્‍સો ટેક મહિન્‍દ્રાના અધિકારી અમિત ગુપ્તાનો છે. તેને કતારમાં અટકાયતમાં લેવામાં આવ્‍યો હતો.

વિદેશ મંત્રાલયના રિપોર્ટ અનુસાર, ૮૬ દેશોની જેલોમાં ૧૦,૧૫૨ ભારતીયો બંધ છે. આવા ભારતીયોની સૌથી વધુ સંખ્‍યા સાઉદી અરેબિયા અને સંયુક્‍ત આરબ અમીરાતમાં છે. આ બંને વિસ્‍તારોમાં ભારતીય કેદીઓની સંખ્‍યા ૨ હજારથી વધુ છે. આ ઉપરાંત બહેરીન, કુવૈત અને કતારમાં પણ મોટી સંખ્‍યામાં ભારતીયો કેદ છે.

૧૩૧૯  ભારતીયો નેપાળમાં જેલની સજા ભોગવી રહ્યા છે. જ્‍યારે, મલેશિયામાં તેમની સંખ્‍યા ૩૩૮ અને ચીનમાં ૧૭૩ છે. ચીન, કુવૈત, નેપાળ, કતાર, સાઉદી અરેબિયા અને સંયુક્‍ત આરબ અમીરાત એ ૧૨ દેશોમાં સામેલ છે જ્‍યાં ૧૦૦ થી વધુ ભારતીયો કેદ છે. આમાંથી, ૯ દેશો એવા છે જે સજા પામેલા વ્‍યક્‍તિઓના સ્‍થાનાંતરણ કરારમાં સામેલ છે. આ હેઠળ દોષિત વ્‍યક્‍તિને તેની સજા ભોગવવા માટે તેના દેશમાં મોકલવાની મંજૂરી છે.

રિપોર્ટ અનુસાર, આ કરાર પછી પણ છેલ્લા ત્રણ વર્ષમાં ૮ ભારતીય કેદીઓને દેશમાં પાછા લાવવામાં આવ્‍યા છે અને ભારતીય જેલોમાં રાખવામાં આવ્‍યા છે. આમાંથી ૩ ઈરાનના, ૩ બ્રિટનના, ૨ કંબોડિયાના અને ૨ રશિયાના છે. ભારતીય મિશન નિયમિતપણે વિદેશી જેલમાંથી ભારતીય નાગરિકોને મુક્‍ત કરવા અથવા પ્રત્‍યાર્પણ કરવા માટે કામ કરી રહ્યા છે.

વિદેશ મંત્રાલયે કહ્યું છે કે, ભારતીય મિશન અને પોસ્‍ટ્‍સ વિદેશી જેલોમાં બંધ નાગરિકોને કાનૂની સહાય સહિત તમામ શકય મદદ પૂરી પાડી રહ્યા છે. સંબંધિત ભારતીય દૂતાવાસ તરફથી સહાય મેળવતા ભારતીય કેદીઓ પાસેથી કોઈ ફી લેવામાં આવતી નથી.(