ન્યૂયોર્ક : અમેરિકન એરલાઇન્સની એક આંતરરાષ્ટ્રીય ફ્લાઇટમાં ગંભીર ઘટના સામે આવી છે. 37 વર્ષીય મહિલા CEO નીલ એલ્શેરિફે, જે લક્ઝરી વીગન લેધર બ્રાન્ડ મેલા સહિત ત્રણ કંપનીઓની માલિક છે, એરલાઇન્સ વિરુદ્ધ કાનૂની કાર્યવાહી શરૂ કરી છે. નીલે આરોપ લગાવ્યો છે કે ગત વર્ષે 27 મેના રોજ ન્યૂયોર્કથી મિલાન જતી ફ્લાઇટમાં તેમની બાજુમાં બેઠેલા એક પુરુષ સહયાત્રીએ લગભગ એક કલાક સુધી હસ્તમૈથુન જેવી ભૂંડી અશ્લીલ હરકત કરી, પરંતુ ફ્લાઇટ ક્રૂએ તેમની ફરિયાદ પર કોઈ ધ્યાન આપ્યું નહીં.

નીલ એલ્શેરિફે બ્રુકલિન ફેડરલ કોર્ટમાં દાખલ કરેલા દાવામાં જણાવ્યું છે કે તેમણે પ્રીમિયમ ઇકોનોમીમાં સીટ બુક કરી હતી, જેની કિંમત 3,000 ડોલર (લગભગ 2.5 લાખ રૂપિયા) હતી. ફ્લાઇટ દરમિયાન તેમની બાજુમાં બેઠેલા એક પુરુષે શરૂઆતમાં ઘણા ગ્લાસ શેમ્પેન પીધા અને ત્યારબાદ હસ્તમૈથુન જેવું અશ્લીલ હરકતો શરૂ કરી. નીલનું કહેવું છે કે આ ઘટના લગભગ એક કલાક સુધી ચાલી, દરમિયાન કેબિનમાં એક પણ ક્રૂ મેમ્બર ન આવ્યું. તેઓ ડરી ગયા હતા અને પોતાને ફસાયેલા અનુભવી રહ્યા હતા.

જ્યારે આ પુરુષે હરકતો બંધ કરી, ત્યારે નીલે તાત્કાલિક ફ્લાઇટ એટેન્ડન્ટને જાણ કરી. પરંતુ તેમને મદદના બદલે નિરાશા જ હાથ લાગી. એટેન્ડન્ટે કથિત રીતે કહ્યું કે "આવું કરવા માટે તે કંઈ નથી કરી શકતી" અને નીલને કોચ સેક્શનમાં જઈને બેસવાનું સૂચન કર્યું. આશ્ચર્યજનક રીતે, એટેન્ડન્ટે એમ પણ કહ્યું કે "પુરુષો આવું કરતા જ હોય છે" અને પોતાના પતિ પણ આવું જ કરે છે એવું નિવેદન આપ્યું.

નીલે દાવો કર્યો છે કે અમેરિકન એરલાઇન્સે આ ઘટના અંગે કોઈ ગંભીર પગલાં લીધાં નહીં. ક્રૂએ ન તો આ ઘટનાની નોંધ કરી કે ન તો આરોપી સહયાત્રીને રોક્યો. તેમનો એવો પણ આરોપ છે કે આરબ મૂળની હોવાને કારણે તેમની ફરિયાદને ગંભીરતાથી લેવામાં આવી નથી, જે ભેદભાવ દર્શાવે છે. આ કેસમાં નીલે એરલાઇન્સ પર બેદરકારી અને ભાવનાત્મક તકલીફ પહોંચાડવાનો આરોપ લગાવ્યો છે.

આ ઘટના અંગે અમેરિકન એરલાઇન્સના એક પ્રવક્તાએ જણાવ્યું, "અમે દરેક મુસાફરને સકારાત્મક અનુભવ આપવા પ્રયાસ કરીએ છીએ. અમે આ ફરિયાદના આરોપોની સમીક્ષા કરી રહ્યા છીએ." જોકે, હજુ સુધી આ મામલે વધુ કોઈ સત્તાવાર નિવેદન આવ્યું નથી.

આ ઘટનાએ એરલાઇન્સની સુરક્ષા અને સેવા નીતિઓ પર ગંભીર સવાલો ઉભા કર્યા છે. નીલ એલ્શેરિફનો આ કેસ મહિલા મુસાફરોની સુરક્ષા અને એરલાઇન્સની જવાબદારીના મુદ્દાને ચર્ચામાં લાવ્યો છે. આગામી સમયમાં કોર્ટમાં આ મામલો કેવું વળાંક લે છે, તે જોવું રહેશે.