નવી દિલ્‍હીઃ કેન્દ્ર સરકારના કર્મચારીઓ અને પેન્શનરો 2026થી પગાર અને પેન્શન વધવાની અપેક્ષા રાખી રહ્યા છે, પરંતુ લેટેસ્ટ રિપોર્ટ્સ મુજબ, સુધારેલા પગાર ધોરણ અને પેન્શન ફેરફારો 2027ની શરૂઆતમાં લાગુ થઈ શકે છે.

સૂત્રોના જણાવ્યા અનુસાર, કમિશનની ભલામણોને અંતિમ સ્વરૂપ આપવામાં 15-18 મહિના લાગી શકે છે, જેનાથી અમલવારીમાં વધુ વિલંબ થશે. પરંતુ, જ્યારે પણ નવો પગાર ધોરણ લાગુ થશે, કર્મચારીઓ અને પેન્શનરોને 12 મહિનાનો બાકી પગાર મળશે.

16 જાન્યુઆરી 2025 ના રોજ કેન્દ્ર સરકારે 8મા પગાર પંચની રચનાની જાહેરાત કરી. ત્યારબાદ, કમિશનની સંદર્ભ શરતો (ToR) અને પ્રક્રિયાઓ અંગે મહત્વપૂર્ણ વિકાસ થયા. રિપોર્ટ્સ અનુસાર, કેન્દ્ર સરકાર આગામી મહિને ToR ને મંજૂરી આપી શકે છે, જેના બાદ કમિશન એપ્રિલ 2025થી કાર્ય શરૂ કરશે.

હાલમાં જ સંસદમાં 8મા પગાર પંચની શરતો અને પેનલ સભ્યોની નિમણૂક વિશે પ્રશ્ન ઉઠ્યો હતો. સરકારના જણાવ્યા અનુસાર, નવા પગાર પંચના ચેરમેન, સભ્યો અને સમયરેખા અંગે ટૂંક સમયમાં વિચારણા કરીને નિર્ણય લેવામાં આવશે.