ભારતના પડોશી દેશ મ્યાનમારમાં આવેલા શક્તિશાળી ભૂકંપથી ધરતી ધ્રુજી ઉઠી. તેની અસર થાઇલેન્ડની રાજધાની બેંગકોકમાં પણ જોવા મળી. ભૂકંપનું કેન્દ્રબિંદુ મ્યાનમારમાં હતું અને તેની તીવ્રતા રિક્ટર સ્કેલ પર 7.7 માપવામાં આવી હતી. બેંગકોકમાં ભૂકંપના આંચકાને કારણે નિર્માણાધીન બહુમાળી ઇમારત ધરાશાયી થઈ ગઈ. સોશિયલ મીડિયા પર વાયરલ થયેલા એક વિડિયોમાં ધૂળના વાદળ વચ્ચે એક બહુમાળી ઇમારત ધરાશાયી થતી જોઈ શકાય છે, જ્યારે અંદરના લોકો ચીસો પાડતા અને બહાર દોડી રહ્યા છે.

રોઇટર્સના અહેવાલ મુજબ, શુક્રવારે 7.7 ની તીવ્રતાના શક્તિશાળી ભૂકંપ અને ત્યારબાદ 6.4 ની તીવ્રતાના આંચકાએ મ્યાનમારમાં ભારે વિનાશ સર્જ્યો હતો. આ દુર્ઘટનામાં અત્યાર સુધીમાં 144 લોકોના મોત થયા છે અને 732 લોકો ઘાયલ થયાના અહેવાલ છે. આ આંકડો વધુ વધવાની ધારણા છે, આ માહિતી મ્યાનમારની લશ્કરી સરકારના વડા (જુન્ટા) દ્વારા આપવામાં આવી છે. ભૂકંપના કારણે ઘણી ઇમારતો ધરાશાયી થઈ ગઈ અને મોટા વિસ્તારમાં માળખાગત સુવિધાઓને નુકસાન થયું. ભૂકંપની અસર થાઇલેન્ડ પર પણ પડી છે. એક અધિકારીએ જણાવ્યું હતું કે થાઇ રાજધાની બેંગકોકમાં ઓછામાં ઓછા નવ લોકોના મોત થયા છે.

આ વિનાશકારી ભૂકંપ વચ્ચે દાવો કરવામાં આવી રહ્યો છે કે અભિજ્ઞ આનંદે 3 અઠવાડિયા પહેલા આ ભયાનક ભૂકંપની આગાહી કરી હતી. 1 માર્ચના રોજ અભિજ્ઞના યુટ્યુબ ચેનલ પર અપલોડ કરાયેલા આ વિડિયોમાં દાવો કરવામાં આવ્યો હતો કે આગામી થોડા અઠવાડિયામાં અથવા આ વર્ષના મધ્યમાં એક મોટો ભૂકંપ તબાહી મચાવશે. ચાલો જાણીએ કે આ વ્યક્તિ કોણ છે જેણે આ ભૂકંપની અગાઉથી આગાહી કરી હતી.
અભિજ્ઞ 20 વર્ષનો છે અને 11 વર્ષની ઉંમરથી જ્યોતિષ શીખી રહ્યો છે. અભિજ્ઞ આનંદ મૂળ કર્ણાટકના મૈસુરનો રહેવાસી છે, જે સૌથી નાની ઉંમરનો જ્યોતિષી છે. તેણે માત્ર 7 વર્ષની ઉંમરે આખી ભગવદ ગીતા કંઠસ્થ કરી લીધી હતી. અભિજ્ઞએ ખૂબ જ નાની ઉંમરે સંસ્કૃત શીખવાનું શરૂ કર્યું હતું. તેણે કહ્યું કે તેની માતાએ તેને આ કરવા માટે પ્રોત્સાહન આપ્યું. અભિજ્ઞ એક વિડિયો ચેનલ ચલાવે છે જેમાં સેંકડો વિડિયો અપલોડ થાય છે, જેમાં તેણે ઘણી મોટી આગાહીઓ કરી છે.
તેણે આ ભૂકંપની આગાહી 3 અઠવાડિયા પહેલા કરી હતી. આ ઉપરાંત તેણે નકશા દ્વારા તારીખ તેમજ સ્થળો વિશે પણ માહિતી આપી હતી. એક હિન્દી વેબસાઈટ સાથેની એક ખાસ વાતચીત દરમિયાન, અભિજ્ઞએ જણાવ્યું કે ભગવાન કૃષ્ણએ તેમને આ માર્ગ પર ચાલવા માટે માર્ગદર્શન આપ્યું હતું. તે માત્ર સંસ્કૃત અને જ્યોતિષ જ શીખ્યા નહીં, પરંતુ હવે તેઓ 2018માં શરૂ થયેલી તેમની સંસ્થા પ્રજ્ઞા જ્યોતિષ દ્વારા 1200 બાળકો અને 150 સંશોધકોને શિક્ષણ આપી રહ્યા છે. અભિજ્ઞએ માત્ર 12 વર્ષમાં વાસ્તુશાસ્ત્રમાં સ્નાતકની ડિગ્રી મેળવી હતી.
અભિજ્ઞની ચેનલ અનુસાર, તે દાવો કરે છે કે તેણે પહેલા પણ ઘણી આગાહીઓ કરી છે, જે સાચી સાબિત થઈ છે. અગાઉ અભિજ્ઞાન 2020માં કોવિડ, 2022માં રશિયા-યુક્રેન યુદ્ધ, 2023માં હમાસ આતંકવાદી હુમલો અને 2024માં બાંગ્લાદેશમાં બળવા વિશે આગાહી કરી હતી.