નવી દિલ્‍હી, તા.૨૬: ખાનગી હોસ્‍પિટલ્‍સ દ્વારા દર્દીઓ પાસેથી વસૂલાતાં બેફામ ચાર્જીસ પર લગામ કસવા માટે કેન્‍દ્ર સરકાર ટૂંક સમયમાં સ્‍ટાન્‍ડર્ડાઈઝ્‍ડ હોસ્‍પિટલ બિલ ફોર્મ રજૂ કરશે. આ સમાન માપદંડો ધરાવતું બિલ ફોર્મેટ હોસ્‍પિટલ્‍સ, નર્સિંગ હોમ્‍સ તથા નિદાન કેન્‍દ્રો સહિતની તમામ તબીબી સંસ્‍થાઓને લાગુ પડશે. આ એક સમાન બિલ ફોર્મેટમાં હોસ્‍પિટલ્‍સે દર્દીઓ પાસેથી વસૂલવામાં આવતાં તમામ ચાર્જીસને વિગતવાર દર્શાવવાના રહેશે. બ્‍યુરો ઓફ ઈન્‍ડિયન સ્‍ટાન્‍ડર્ડ્‍સ (બીઆઈએસ) એક વર્ષથી બિલિંગ પ્રક્રિયાને વધુ પારદર્શક અને એકસરખી બનાવવાની પ્રક્રિયા પર કામ કરી રહી છે. આ ફોર્મેટને મંજૂરી મળશે તો હોસ્‍પિટલની સારવાર વધુ ગ્રાહકલક્ષી બનશે. બીઆઈએસ દ્વારા કેન્‍દ્રીય આરોગ્‍ય મંત્રાલય ઉપરાંત હેલ્‍થકેર ઈન્‍ડસ્‍ટ્રી, દર્દીના અધિકારો અંગેની સંસ્‍થાઓ તથા અન્‍ય હિસ્‍સેદારો સાથેની મંત્રણા દ્વારા આ ફોર્મેટ તૈયાર કરાઈ રહયું છે. જેની મદદથી દર્દીઓને તેમની સારવાર માટે ઉપયોગમાં લેવાતી તમામ વસ્‍તુઓ, સેવાઓ અને સુવિધાઓની વિગતવાર માહિતી મળી શકશે.(૨૩.૩)