તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Saturday, 22nd March 2025
પતિ ૧ લાખ રૂપિયા કમાય છે અને હું ૬૦ હજાર રૂપિયા કમાઉ છું : મારે ભરણપોષણ જોઈએ છે
સુપ્રીમ કોર્ટેમાં મહિલાએ પોતાની અરજીમાં દાવો કર્યો હતો કે પોતાની આવક હોવા છતાં તે ભરણપોષણ મેળવવા માટે હકદાર છે : જો પત્નિ આત્મનિર્ભર હોય અને પોતાની આવકમાંથી ગુજરાન ચલાવી શકે, તો પતિ ભરણપોષણ આપવા માટે જવાબદાર નથીઃ સુપ્રીમ કોર્ટે : મહિલાની ભરણપોષણની માંગણી ફગાવી

નવી દિલ્હી, તા.૨૨: એક મહત્વપૂર્ણ નિર્ણયમાં સુપ્રીમ કોર્ટે કહયું છે કે જો પતિ અને પત્નીની આર્થિક અને સામાજિક સ્થિતિ સમાન હોય, તો પત્નીને ભરણપોષણ આપવાની કોઈ જરૂર નથી. એક મહિલા દ્વારા તેના અલગ થયેલા પતિ પાસેથી ભરણપોષણ મેળવવા માટે દાખલ કરાયેલી અરજીની સુનાવણી દરમિયાન આ નિર્ણય લેવામાં આવ્યો. આ કેસમાં, કોર્ટે જોયું કે બંને પક્ષો સહાયક પ્રોફેસર તરીકે કામ કરી રહયા હતા અને મહિલા સ્વતંત્ર રીતે પોતાની જરૂરિયાતો પૂરી કરવા સક્ષમ હતી.
જસ્ટિસ અભય એસ. ઓકા અને ઉજ્જવલ ભુઇયાની બેન્ચે આ કેસની સુનાવણી કરી. ‘‘અરજદાર અને પ્રતિવાદી (પતિ-પત્ની) બંને એક જ પદ એટલે કે સહાયક પ્રોફેસર ધરાવે છે. તેથી, આ ખાસ રજા અરજી ફગાવી દેવામાં આવે છે,'' કોર્ટે તેના ટૂંકા આદેશમાં જણાવ્યું હતું. કોર્ટે એ પણ સ્પષ્ટ કર્યું કે જો પત્ની આત્મનિર્ભર હોય અને પોતાની આવકમાંથી ગુજરાન ચલાવી શકે, તો પતિ ભરણપોષણ આપવા માટે જવાબદાર નથી.
મહિલાએ પોતાની અરજીમાં દાવો કર્યો હતો કે પોતાની આવક હોવા છતાં તે ભરણપોષણ મેળવવા માટે હકદાર છે. તેણીએ કહયું કે તેના પતિની માસિક આવક લગભગ ૧ લાખ રૂપિયા છે, જ્યારે તેની આવક લગભગ ૬૦,૦૦૦ રૂપિયા છે. જોકે, પતિ વતી એડવોકેટ શશાંક સિંહે કોર્ટને જણાવ્યું હતું કે બંનેના સંજોગો સમાન હોવાથી ભરણપોષણ આપવાની કોઈ જરૂર નથી. આ દાવાની પુષ્ટિ કરવા માટે, કોર્ટે બંને પક્ષોને છેલ્લા એક વર્ષની પગાર સ્લિપ સબમિટ કરવા કહયું હતું.
મધ્યપ્રદેશ હાઈકોર્ટ અને નીચલી કોર્ટે મહિલાની ભરણપોષણની માંગણી ફગાવી દીધા બાદ આ મામલો સુપ્રીમ કોર્ટમાં પહોંચ્યો હતો. સુપ્રીમ કોર્ટના આ નિર્ણયને મહિલાઓના આત્મનિર્ભરતા અને સમાનતાના સંદર્ભમાં એક મહત્વપૂર્ણ પગલું માનવામાં આવી રહયું છે. આ નિર્ણય એવા કિસ્સાઓમાં એક ઉદાહરણ બની શકે છે જ્યાં પતિ અને પત્ની બંનેની નાણાકીય સ્થિતિ સમાન હોય અને કોઈ પણ પક્ષ બીજા પર નિર્ભર ન હોય.(૨૩.૨)
(9:53 AM IST)









છેલ્લા 8 દિવસમાં સૌથી લોકપ્રિય 
