દિલ્હી હાઈકોર્ટ આવતીકાલે એક્સાઈઝ પોલિસી સંબંધિત મની લોન્ડરિંગ કેસમાં દિલ્હીના ભૂતપૂર્વ મુખ્યમંત્રી અરવિંદ કેજરીવાલને મળેલા જામીનને પડકારતી એન્ફોર્સમેન્ટ ડિરેક્ટોરેટ (ED) દ્વારા દાખલ કરવામાં આવેલી અરજી પર સુનાવણી કરશે. આ અરજીની સુનાવણી જસ્ટિસ રવિન્દ્ર દુડેજાની કોર્ટમાં થશે. અગાઉ, કોર્ટે તપાસ એજન્સીના વકીલની વિનંતી પર સુનાવણી મુલતવી રાખી હતી.

કેજરીવાલના વકીલોનું કહેવું છે કે આ કેસમાં અન્ય તમામ આરોપીઓને જામીન મળી ગયા હોવાથી કેજરીવાલના જામીન પણ યથાવત રાખવા જોઈએ. અગાઉ, સુપ્રીમ કોર્ટે 12 જુલાઈ, 2024 ના રોજ કેજરીવાલને વચગાળાના જામીન આપ્યા હતા અને પ્રિવેન્શન ઓફ મની લોન્ડરિંગ એક્ટ (PMLA) હેઠળ તેમની ધરપકડની "આવશ્યકતા અને કારણ" અંગેના કેટલાક મુખ્ય પ્રશ્નો મોટી બેન્ચને મોકલ્યા હતા.

20 જૂન, 2024 ના રોજ, દિલ્હીની એક નીચલી કોર્ટે કેજરીવાલને 1 લાખ રૂપિયાના વ્યક્તિગત બોન્ડ પર જામીન આપ્યા હતા, પરંતુ EDની અરજી પર હાઇકોર્ટે આ આદેશ પર રોક લગાવી દીધી હતી. ED અને CBI એ કેજરીવાલની મની લોન્ડરિંગ અને ભ્રષ્ટાચારના કેસમાં અનુક્રમે 21 માર્ચ અને 26 જૂન, 2023 ના રોજ ધરપકડ કરી હતી.

ઉલ્લેખનીય છે કે, દિલ્હીના લેફ્ટનન્ટ ગવર્નરે સીબીઆઈને તેમાં કથિત અનિયમિતતાઓ અને ભ્રષ્ટાચારની તપાસ કરવાનો નિર્દેશ આપ્યા બાદ 2022માં 2021ની એક્સાઇઝ પોલિસી રદ કરવામાં આવી હતી. ED અને CBIનો આરોપ છે કે નીતિમાં ફેરફાર કરીને, દારૂના લાઇસન્સ ધારકોને અનુચિત લાભ આપવામાં આવ્યા હતા, જેના કારણે ભ્રષ્ટાચાર અને મની લોન્ડરિંગ થયું હતું.