કેરળ,તા.૧૧

કેરળના કોલ્લમમાં એક ચર્ચ પરિસરમાં સુટકેસની અંદરથી એક કંકાળ મળી આવ્યું છે. આ કંકાળ CSI ચર્ચના કબ્રસ્તાન પાસે મળી આવ્યું હતું. પોલીસ ઘટનાસ્થળે પહોંચી ગઈ છે અને તપાસ શરૃ કરવામાં આવી છે. શરૃઆતની તપાસમાં જાણવા મળ્યું કે તે માનવ કંકાળ હતું.

પોલીસનું માનવું છે કે આ લાશ ઘણા વર્ષો જૂની છે. આ હત્યાનો કેસ હોઈ શકે છે. પોલીસે આ કેસની વૈજ્ઞાનિક રીતે તપાસ શરૃ કરી દીધી છે અને જૂના ગુમ થયેલા રેકોર્ડની પણ તપાસ કરવામાં આવી રહી છે. કંકાળ સડી ગયેલી સ્થિતિમાં છે. પોલીસનું કહેવું છે કે શક્ય છે કે કોઈએ તેને બોક્સમાં મૂકીને ત્યાં જ છોડી દીધું હોય શકે છે. આજે સવારે ચર્ચમાં કામ પર આવેલા લોકોએ આ સુટકેસ જોઈ હતી. પાઇપલાઇન રૃટ પર કામ કરતી વખતે, ચર્ચ કબ્રસ્તાન પાસેના જંગલ વિસ્તારમાંથી સુટકેસ મળી આવી.

આ પહેલા જાન્યુઆરી ૨૦૨૫ માં લગભગ ૧૨ એકર જમીન પર બનેલા એક ઘરની અંદર રાખેલા રેફ્રિજરેટરમાંથી માનવ ખોપરી અને હાડકાં મળી આવ્યા હતા. આ સમાચારથી સમગ્ર વિસ્તારમાં ખળભળાટ મચી ગયો. ખરેખર આ ઘર છેલ્લા ૧૨ વર્ષથી ઉજ્જડ પડ્યું હતું. આ જગ્યા ઉજ્જડ હોવાથી, અસામાજિક તત્વો અહીં ભેગા થવા લાગ્યા. જ્યારે પડોશીઓએ આ અંગે પોલીસને ફરિયાદ કરી, ત્યારે પોલીસે ઘટનાસ્થળે પહોંચીને ઘરની તપાસ કરી. આ દરમિયાન ફ્રિજમાંથી માનવ ખોપરી અને હાડકાં મળી આવ્યા હતા. આ ઘટનાથી સમગ્ર વિસ્તારમાં તણાવ ફેલાઈ ગયો હતો.

આ કેસ કેરળના ચોટ્ટાનિક્કારાનો હતો. પોલીસે આ મામલે તપાસ પણ શરૃ કરી દીધી હતી. ફ્રિજમાંથી મળેલા હાડકાં પ્લાસ્ટિકની થેલીમાં પેક કરીને સરસ રીતે રાખવામાં આવ્યા હતા. જે ઘરમાંથી તેઓ મળી આવ્યા હતા તે ઘરનો માલિક વ્યવસાયે ડૉક્ટર છે અને ઘણા વર્ષોથી કોચીમાં રહે છે. તેમના બાળકો વિદેશમાં રહે છે.