મુંબઈ, તા.૭: મનીકંટ્રોલના ગ્‍લોબલ વેલ્‍થ સમિટમાં, સેબીના નવા વડા તુહિન કાંત પાંડેએ જણાવ્‍યું હતું કે દેશના વિકાસને ટેકો આપવા માટે આપણને સ્‍થાનિક અને વિદેશી રોકાણકારોની જરૂર છે. તેમનું આ નિવેદન એવા સમયે આવ્‍યું છે જ્‍યારે ભારતીય શેરબજાર વેચવાલીનો સમય પસાર કરી રહ્યા છે. સેબીના વડા તુહિન કાંત પાંડેએ જણાવ્‍યું હતું કે, છેલ્લા કેટલાક વર્ષોમાં દેશમાં વૈશ્વિક રોકાણ આવ્‍યું છે. લાંબા ગાળાની મૂડીની હાજરી ઉદ્યોગસાહસિકતાને વધુ વેગ આપશે. તેમણે કહ્યું કે અમે વિદેશી રોકાણને પ્રોત્‍સાહન આપવા માટે અનુકૂળ વાતાવરણની જરૂરિયાતથી વાકેફ છીએ.

સેબી ચીફે કહ્યું કે બજાર સંબંધિત સંસ્‍થાઓમાં વધુ પારદર્શિતા લાવવા માટે આપણે ટેકનોલોજીનો ઉપયોગ કરવો પડશે, અને આ માટે આપણને ટીમવર્કની જરૂર છે.

મનીકન્‍ટ્રોલ ગ્‍લોબલ વેલ્‍થ સમિટમાં, સેબીના વડાએ જણાવ્‍યું હતું કે તેમનું ધ્‍યાન નિયમનકારી મુદ્દાઓ પર રહેશે અને વિદેશી રોકાણકારો માટે નિયમન અને કામગીરી સંબંધિત નિયમોને વધુ સરળ બનાવશે. તેમણે કહ્યું કે વિશ્વાસ અને પારદર્શિતા જાળવવી સૌથી મહત્‍વપૂર્ણ છે.

સેબીના વડા તુહિન કાંત પાંડેએ જણાવ્‍યું હતું કે સ્‍થાનિક સંસ્‍થાકીય રોકાણકારોની વધતી ભાગીદારીને કારણે સ્‍થાનિક માલિકી વધી છે. જોકે, સારી ગતિએ વિકાસ કરવા માટે આપણને સ્‍થાનિક અને વિદેશી બંને પ્રકારના રોકાણોની જરૂર છે.

સેબીના ચેરમેન તુહિન કાંત પાંડેએ જણાવ્‍યું હતું કે પારદર્શિતા સેબી માટે એક મહત્‍વપૂર્ણ પ્રાથમિકતા છે. તેમણે કહ્યું, રોકાણકારોમાં વિશ્વાસ જાળવી રાખવા માટે વિશ્વાસ અને પારદર્શિતા જાળવવી સૌથી મહત્‍વપૂર્ણ છે. તેથી, નિયમનકારી સંસ્‍થાઓ અને બજારના સહભાગીઓએ શાસન અને પારદર્શિતાના ઉચ્‍ચ ધોરણો જાળવવાની જરૂર છે.સેબીના વડાએ એમ પણ કહ્યું કે, સેબી બોર્ડમાં જ હિતોના સંઘર્ષ અંગે વધુ પારદર્શક બનવાની જરૂર છે. અમે (આગળ વધીને) આવા હિતોના સંઘર્ષોને જાહેર જનતા સમક્ષ ખુલ્લા પાડીશું