નવી દિલ્હી : જુનિયર રેસલર સાગરની હત્યા કેસમાં કુસ્તીબાજ સુશીલ કુમારને તિહાર જેલમાંથી જામીન પર મુક્ત કરવામાં આવ્યો હતો. દિલ્હી હાઈકોર્ટે કુમારને નિયમિત જામીન આપ્યા હતા.

ઓલિમ્પિક મેડલ વિજેતા પહેલવાન સુશીલ કુમાર તિહાર જેલમાંથી બહાર આવી ગયો છે. જુનિયર પહેલવાન સાગર ધનખર હત્યા કેસમાં દિલ્હી હાઈકોર્ટે સુશીલ કુમારને નિયમિત જામીન આપ્યા હતા. બે દિવસ પહેલા મંગળવારે (૪ માર્ચ) ના રોજ, પહેલવાન સુશીલ કુમારને હાઈકોર્ટમાંથી જામીન મળ્યા અને ગુરુવારે (૬ માર્ચ) બહાર આવ્યો.

જસ્ટિસ સંજીવ નરુલાએ કુસ્તીબાજ સુશીલ કુમારને રાહત આપી હતી અને તેમને 50,000 રૂપિયાના વ્યક્તિગત બોન્ડ અને એટલી જ રકમના બે જામીન રજૂ કરવાનો નિર્દેશ આપ્યો હતો. આ કેસ રાષ્ટ્રીય રાજધાનીના છત્રસાલ સ્ટેડિયમમાં ભૂતપૂર્વ જુનિયર રાષ્ટ્રીય કુસ્તી ચેમ્પિયન સાગર ધનખરની હત્યા સાથે સંબંધિત છે.

સુશીલ કુમાર અને અન્ય લોકો પર મે 2021માં કથિત મિલકત વિવાદને લઈને ધનખર પર હુમલો કરવાનો આરોપ છે. આ હુમલામાં ધનખરના બે મિત્રો પણ ઘાયલ થયા હતા. પોસ્ટમોર્ટમ રિપોર્ટ મુજબ, ધનખરને કોઈ વસ્તુથી અથડાયા બાદ માથામાં ઈજા થઈ હતી. સુશીલ કુમાર વતી હાજર રહેલા વકીલો આરએસ મલિક અને સુમિત શૌકીને કહ્યું હતું કે કુમાર છેલ્લા સાડા ત્રણ વર્ષથી જેલમાં છે અને ફરિયાદ પક્ષે 200 સાક્ષીઓને ટાંકી છે, જ્યારે અત્યાર સુધીમાં ફક્ત 31 સાક્ષીઓએ જ જુબાની આપી છે.

ફરિયાદ પક્ષે અરજીનો વિરોધ કર્યો હતો, પરંતુ એડવોકેટ મલિકે દલીલ કરી હતી કે ટ્રાયલ પૂર્ણ થવામાં ઘણો સમય લાગશે અને વિલંબના આધારે કુમારને રાહત આપવી જોઈએ. રેસલર સુશીલ કુમારની મે 2021માં ધરપકડ કરવામાં આવી હતી અને ઘૂંટણની સર્જરી માટે તેને એક અઠવાડિયા માટે વચગાળાના જામીન આપવામાં આવ્યા હતા.

 ઓક્ટોબર 2022માં, ટ્રાયલ કોર્ટે કુમાર વિરુદ્ધ ભારતીય દંડ સંહિતા (IPC) હેઠળ હત્યા, ગુનાહિત કાવતરું, ધાકધમકી અને આર્મ્સ એક્ટ ઉપરાંત ઘાતક હથિયારથી હુમલો સહિતના ગુનાઓ માટે આરોપો ઘડ્યા હતા. નીચલી કોર્ટે કહ્યું હતું કે ધનખરનું અપહરણ કરીને સ્ટેડિયમમાં લાવવામાં આવ્યા બાદ ઘણા આરોપીઓએ બેઝબોલ અને હોકી સ્ટીકથી તેમના પર ક્રૂર હુમલો કર્યો હતો.