૪,૭૫,૦૦૦ના મોતઃ ૬૩ લાખ લોકો બેઘર
રશિયા-યુક્રેન યુધ્ધને ૩ વર્ષ પૂરા થયા
વોશિંગ્ટન, તા.૨૪: રશિયા-યુક્રેન યુદ્ધને ત્રણ વર્ષ થઈ ગયા છે. યુદ્ધની ત્રીજી વર્ષગાંઠ પર રશિયાએ ૨૬૭ ડ્રોન સાથે એક સાથે હુમલો કર્યો. યુક્રેનિયન સત્તાવાળાઓના જણાવ્યા અનુસાર, યુક્રેનના ઓછામાં ઓછા ૧૩ પ્રદેશોમાં ડ્રોનને અટકાવવામાં આવ્યા હતા, જેમાં ખાર્કિવ, પોલ્ટાવા, સુમી, કિવ, ચેર્નિહિવ, માયકોલાઈવ અને ઓડેસાનો સમાવેશ થાય છે. આ અત્યાર સુધીના સૌથી મોટા હુમલાઓમાંનો એક છે. આ હુમલો એવા સમયે થયો છે જ્યારે યુએસ રાષ્ટ્રપતિ ડોનાલ્ડ ટ્રમ્પ રશિયા-યુક્રેન યુદ્ધને શકય તેટલી વહેલી તકે સમાપ્ત કરવા માટે દબાણ કરી રહ્યા છે. ૨૪ ફેબ્રુઆરીએ આ યુદ્ધના ત્રણ વર્ષ પૂર્ણ થાય છે. ત્રણ વર્ષ પછી પણ આ યુદ્ધ અટકયું નથી. યુદ્ધ રોકવા માટે, અમેરિકાએ સાઉદી અરેબિયામાં રશિયા સાથે એક બેઠક યોજી હતી, પરંતુ સમગ્ર વિશ્વને આશ્ચર્ય થયું કે યુક્રેનને તેમાં સામેલ કરવામાં આવ્યું ન હતું.
ત્રણ વર્ષના યુદ્ધ પછી, પ્રશ્ન પૂછવામાં આવી રહ્યો છે કે આ યુદ્ધ કયારે સમાપ્ત થશે? ૨૦૨૨ માં રશિયા દ્વારા સંપૂર્ણ પાયે હુમલો કરવામાં આવ્યો હતો. યુક્રેનના ઘણા વિસ્તારો રશિયા દ્વારા કબજે કરવામાં આવ્યા છે. યુક્રેન પશ્ચિમી સાથીઓના લશ્કરી સમર્થનથી લડી રહ્યું છે. લાખો યુક્રેનિયનો વિસ્થાપિત થયા, જ્યારે હજારો લોકો માર્યા ગયા અથવા ઘાયલ થયા.
યુક્રેન યુદ્ધની શરૂઆતમાં, યુક્રેને તેની રાજધાની કિવને રશિયન હુમલાથી બચાવી લીધી. પરંતુ પાછળથી ખાર્કિવ અને ખેરસનના ભાગો પાછા મેળવ્યા. પરંતુ તેને ડોનેટ્સક અને બખ્મુત જેવા પૂર્વીય પ્રદેશોમાં ભારે નુકસાન સહન કરવું પડ્યું. સીએનએનના અહેવાલ મુજબ, ઇન્સ્ટિટયૂટ ફોર ધ સ્ટડી ઓફ વોર દ્વારા ડેટા વિશ્લેષણ દર્શાવે છે કે ૨૦૨૨ના આક્રમણ પછી યુક્રેને તેની લગભગ ૧૧ ટકા જમીન ગુમાવી દીધી છે. ૨૦૧૪ થી, રશિયાએ યુક્રેનના ૧૮ ટકા પ્રદેશ પર કબજો કરી લીધો છે. ૨૦૧૪ માં, રશિયાએ ક્રિમીઆ પર કબજો કર્યો.
અમેરિકા યુક્રેનનું સૌથી મોટું સાથી રહ્યું છે. ૨૦૨૨ થી, તેણે ૯૫ બિલિયન ડોલરની લશ્કરી, માનવતાવાદી અને નાણાકીય સહાય પૂરી પાડી છે. પરંતુ ટ્રમ્પ વહીવટ હેઠળ આ સહાય જોખમમાં મુકાઈ શકે છે. ટ્રમ્પે ૨૦૨૪ના ચૂંટણી પ્રચાર દરમિયાન યુક્રેનને આપવામાં આવતી અમેરિકાની સહાયની ટીકા કરી હતી. તાજેતરમાં જ તેણે મદદના બદલામાં યુક્રેન પાસેથી દુર્લભ ખનિજોની માંગણી કરી છે. જોકે, ઝેલેન્સકીએ આ પ્રસ્તાવને નકારી કાઢયો છે. તાજેતરમાં USAID ભંડોળ સ્થગિત કરવાથી યુક્રેનિયન NGO અને સખાવતી સંસ્થાઓ પર અસર પડી છે. તેઓ કર્મચારીઓની છટણી કરી રહ્યા છે અને આત્મહત્યા નિવારણ હેલ્પલાઈન અને HIV પરીક્ષણ જેવા પ્રોજેક્ટ બંધ કરવાની ફરજ પડી છે.
રશિયાના હુમલા બાદ લાખો યુક્રેનિયન નાગરિકોને પોતાના ઘર છોડવા પડ્યા હતા. સંયુક્ત રાષ્ટ્ર શરણાર્થી એજન્સી અનુસાર, ૨૦૨૪ ના અંત સુધીમાં, ૬.૩ મિલિયન યુક્રેનિયન શરણાર્થીઓ યુરોપમાં રહેતા હશે. ૧૨ લાખ જર્મનીમાં, ૯ લાખ પોલેન્ડમાં, ૩.૯ લાખ ચેક રિપબ્લિકમાં રહે છે. એટલું જ નહીં, ૧૨ લાખ યુક્રેનિયન શરણાર્થીઓ પણ રશિયામાં રહે છે. સંયુક્ત રાષ્ટ્ર માનવાધિકાર કાર્યાલય અનુસાર, યુક્રેનમાં ૪૦,૦૦૦ થી વધુ નાગરિકો માર્યા ગયા હતા.
યુક્રેન યુદ્ધના કારણે લાખો લોકો મળત્યુ પામ્યા છે. યુક્રેનિયન રાષ્ટ્રપતિ ઝેલેન્સકીએ ફેબ્રુઆરીની શરૂઆતમાં કહ્યું હતું કે યુદ્ધના પરિણામે ૪૫,૦૦૦ સૈનિકો માર્યા ગયા છે. તે જ સમયે, તેમણે દાવો કર્યો હતો કે ૩૯૦,૦૦૦ થી વધુ રશિયન સૈનિકો મળત્યુ પામ્યા હતા. જો આ આંકડાઓ પર વિશ્વાસ કરીએ તો, અત્યાર સુધીમાં બંને બાજુથી ૪ લાખ ૭૫ હજાર લોકો મળત્યુ પામ્યા છે.આ યુદ્ધમાં ઉત્તર કોરિયાના સૈનિકો પણ રશિયા વતી લડતા જોવા મળ્યા છે. યુક્રેને રશિયાના કુર્સ્ક પ્રદેશ પર હુમલો કર્યો છે. આ તે જગ્યા છે જ્યાં ઉત્તર કોરિયાના સૈનિકો લડી રહ્યા હતા. મોટી સંખ્યામાં ઉત્તર કોરિયાના સૈનિકોના પણ મોત થયાના અહેવાલો છે. પણ હવે તે પાછળ હટી ગયો છે. (રર.૩)
(10:41 AM IST)
છેલ્લા 8 દિવસમાં સૌથી લોકપ્રિય 
