તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Wednesday, 29th January 2025
મુંબઈના સિદ્ધિવિનાયક મંદિરમાં ડ્રેસ કોડ લાગુ
ટૂંકા સ્કર્ટ કે શરીર દેખાય તેવા કપડાં પહેરેલા ભક્તોને પ્રવેશ નહીં મળે

મુંબઈ, તા.૨૯: લાખો ભક્તોની આસ્થાનું કેન્દ્ર એવા મુંબઈના સિદ્ધિવિનાયક મંદિરની મુલાકાત લેવા માટે હવે તમારે તમારા કપડાંનું ધ્યાન રાખવું પડશે. કારણ કે મંદિર પ્રશાસને ભક્તો માટે ડ્રેસ કોડ લાગુ કર્યો છે. શ્રી સિદ્ધિવિનાયક ગણપતિ મંદિર ટ્રસ્ટ (SSGTT)એ જણાવ્યું કે, ભક્તોએ યોગ્ય અને શરીર ઢંકાય તેવા કપડાં પહેરવા પડશે. કાપેલા કે ફાટેલા કાપડવાળા ટ્રાઉઝર, ટૂંકા સ્કર્ટ અથવા શરીરના ભાગો ખુલ્લા દેખાતા કપડાં પહેરેલા ભક્તોને મંદિરમાં પ્રવેશવાની મંજૂરી આપવામાં આવશે નહીં.
સિદ્ધિવિનાયક મંદિર ટ્રસ્ટે આ સંદર્ભમાં એક સત્તાવાર પત્ર જારી કર્યો છે. જેમાં જણાવાયું છે કે, ગણેશ ભક્તોએ ભારતીય પરંપરા મુજબ કપડાં પહેરવા જોઈએ જેથી અન્ય નાગરિકો સિદ્ધિવિનાયક મંદિરમાં જવા માટે શરમ ન અનુભવે. ભક્તોએ શરીર ઢંકાય તેવા કપડાં પહેરવા જ જોઈએ.
મંદિર ટ્રસ્ટે જણાવ્યું કે, મંદિરમાં દેશભરમાંથી દરરોજ હજારો ભક્તો આવે છે અને ઘણા મુલાકાતીઓએ પૂજા સ્થળ પર પહેરવામાં આવતા પોશાક અંગે ચિંતા વ્યક્ત કરી હતી જે તેમને અપમાનજનક લાગતું હતું. વારંવાર અયોગ્ય કપડાં અંગેની ઘણી વિનંતીને પગલે આ નિર્ણય લેવામાં આવ્યો છે અને તે બધા માટે ફરજિયાત રહેશે.
(10:13 AM IST)









છેલ્લા 8 દિવસમાં સૌથી લોકપ્રિય 
