નવી દિલ્હી :ગૃહ મંત્રાલયે કેન્દ્રીય ઔદ્યોગિક સુરક્ષા દળ (CISF) માટે 2,000 થી વધુ કર્મચારીઓ સાથેની બે નવી બટાલિયનને મંજૂરી આપી છે, જે એરપોર્ટ અને ન્યુક્લિયર પાવર પ્લાન્ટ્સ જેવી મહત્વપૂર્ણ સંસ્થાઓનું રક્ષણ કરે છે. નવી બટાલિયનની રચના સાથે ફોર્સના જવાનોની સંખ્યા અંદાજે 2 લાખ સુધી પહોંચી જશે. આ નિર્ણય સીઆઈએસએફની ક્ષમતામાં વધારો તો થશે જ આ ઉપરાંત રાષ્ટ્રીય સુરક્ષા પણ વધુ મજબુત થશે.

CISFના પ્રવક્તાએ મંગળવારે જણાવ્યું કે,"ગૃહ મંત્રાલય (MHA) એ બે નવી બટાલિયનની રચનાને મંજૂરી આપીને CISFના નોંધપાત્ર વિસ્તરણને મંજૂરી આપી છે." વધુમાં તેમણે કહ્યું કે, "તાજેતરમાં મંજૂર કરાયેલ મહિલા બટાલિયન સાથે આ નિર્ણય, દળની ક્ષમતામાં વધારો કરશે, રાષ્ટ્રીય સુરક્ષાને મજબૂત બનાવશે અને 2,000 થી વધુ વ્યક્તિઓ માટે રોજગારીની નવી તકોનું સર્જન કરશે." પ્રવક્તાએ કહ્યું કે સોમવારે મંજૂરી મળી ગઈ છે.

ગયા વર્ષના અંતમાં ફોર્સ માટે મહિલા બટાલિયનને મંજૂરી આપવામાં આવી હતી. ફોર્સમાં હાલમાં 12 રિઝર્વ બટાલિયન છે, દરેકમાં 1,025 કર્મચારીઓ છે. નવી બટાલિયનો આંતરિક સુરક્ષા સંબંધિત તાત્કાલિક જરૂરિયાતોને પહોંચી વળવા માટે પ્રશિક્ષિત કર્મચારીઓનો પૂલ બનાવીને CISFની "વધતી" માંગને પહોંચી વળવામાં પણ મહત્વપૂર્ણ રહેશે. દેશના 68 નાગરિક એરપોર્ટની રક્ષા ઉપરાંત, 1969માં રચાયેલી CISF, પરમાણુ અને એરોસ્પેસ ક્ષેત્રની અનેક સંસ્થાઓ અને તાજમહેલ અને લાલ કિલ્લા જેવા ઐતિહાસિક સ્મારકોને આતંકવાદ વિરોધી સુરક્ષા પૂરી પાડે છે.